“YENİ AZƏRBAYCAN” HAKİMİYYƏTİN MEDİA İLƏ BAĞLI DÜNYAYA YENİ MODEL TƏKLİF ETDİYİNİ YAZIB

	13 fevral 2012


Onlayn ictimai-siyasi qəzet

Media

“YENİ AZƏRBAYCAN” HAKİMİYYƏTİN MEDİA İLƏ BAĞLI DÜNYAYA YENİ MODEL TƏKLİF ETDİYİNİ YAZIB

2010-07-28

Rəşid Hacılı: “Belə layihələr çox olub, amma son nəticədə heç biri uğur qazanmayıb”

“Yeni Azərbaycan” qəzetinin dünənki sayında Azərbaycan mediasının durumu ilə bağlı “təhlil” yazısı yer alıb. “ABŞ-da jurnalistlər, hətta, toy mərasimini çəkdiklərinə görə həbs olunurlar” başlıqlı məqalədə Azərbaycanın dünyaya söz və fikir azadlığının təminatı, mətbuata dövlət qayğısı ilə bağlı yeni model təklif etməsi barədə fikirlər yer alıb.

Məqalə müəllifi qeyd edib ki, “özünü dünyaya ”ən məqbul təcrübə" kimi təqdim etməyi bacarmış qüvvələr maraqları naminə demokratiyanın ali prinsiplərindən təzyiq vasitəsi kimi istifadə edir, mənfi presedent formalaşdırırlar". Belə qüvvələrdən birinin ABŞ olduğunu yazan müəllif sözügedən ölkədə ABŞ-ın keçmiş prezidenti Bill Klinton və onun həyat yoldaşı, hazırkı dövlət katibi Hillari Klintonun qızları Çelsi Klintonun iyulun 31-də biznesmen Mark Mezvinsklə nikah mərasimindən çəkiliş aparmaq istəyən iki norveçli jurnalistin həbsini xatırladıb. Yazıda bu, Amerikanın ikili standartlarla işləməsi adlandırılıb: “Əgər bu hadisə Azərbaycanda baş versəydi, artıq bu gün Avropanın və okeanın o tayında qərar tutmuş təşkilatlar Azərbaycan hakimiyyətini demokratik dəyərlərin düşməni adlandıracaqdılar. Amma Azərbaycan hakimiyyətinin mətbuatı ictimai-siyasi həyatın bir hissəsi sayaraq, onun inkişafı üçün bu günə qədər hansı mühüm qərarlar qəbul etməsini görməzdən gələcəkdilər”.
Publikaya hesablanmış, eləcə də faktların təhrif olunduğu bu məqalədə səslənən fikirlərlə bağlı Media Hüquqları İnstitutunun direktoru Rəşid Hacılı ilə danışdıq. Müsahibimiz bildirdi ki, media ilə bağlı dünyaya fərqli modellər təklif edən ölkələr çox olub. Onun sözlərinə görə, son nəticədə onların heç biri uğur qazanmayıb. Müsahibimiz demokratiyanı təhqir edən bir çox avtoritar ölkələrin belə modellərə üstünlük verdiyini dedi: “Söz azadlığının bir modeli var. Həmin modelə görə, media o qədər güclü olmalıdır ki, dövlətin qayğısına ehtiyacı olmasın, ondan asılı vəziyyətə düşməsin. Əgər hökumət mediaya qayğı göstərirsə, bundan iki nəticə çıxır: 1. Hökumət çox güclüdür. Hətta o qədər ki, mətbuatın da problemlərini həll edir. 2. Mətbuat hökumətdən asılı vəziyyətə düşəcək qədər zəifdir. Bütövlükdə isə ”hakimiyyətin qayğısı" sözündə mətbuatın gücsüzlüyü faktoru dayanır".
R.Hacılı bildirdi ki, hakimiyyətin media ilə bağlı hazırda həyata keçirdiyi layihədə demokratiya və söz azadlığı yoxdur. Müsahibimiz hakimiyyətin humanitar yox, siyasi struktur olduğunu xatırladaraq, onun medianı özündən asılı vəziyyətə salmasını təqdir yox, tənqid olunası hadisə adlandırdı.

Sevinc TELMANQIZI

432 dəfə baxılıb