EVSİZ JURNALİSTLƏRİN SİYAHISI NECƏ HAZIRLANACAQ

	12 fevral 2012


Onlayn ictimai-siyasi qəzet

Media

EVSİZ JURNALİSTLƏRİN SİYAHISI NECƏ HAZIRLANACAQ?

2010-08-28

Mehman Əliyev: “Redaksiyada qapalı sorğu keçirmək olar”
Azər Əhmədov: “Bu məsələni daxili iclasda müzakirəyə çıxaracağıq”
Aydın Quliyev: “Evsiz jurnalist fərdi şəkildə fonda müraciət etməlidir”

Qəzetimizin ötən sayında xəbər vermişdik ki, Kütləvi İnformasiya Vasitələrinin İnkişafına Dövlət Dəstəyi Fondu evsiz jurnalistlər üçün tikiləcək binanın yerini müəyyənləşdirib. Bayıl qəsəbəsində, 50 sot torpaq sahəsində ilk mərhələdə bir, növbəti illərdə maliyyə ayrılarsa, daha üç binanın tikilməsi nəzərdə tutulur. Xatırladaq ki, fond ilk olaraq bir bloklu, 16 mərtəbəli, hər mərtəbəsində 4-5 mənzil olan binanın tikilməsini planlaşdırır.

Təxminən 70-80 mənzilin jurnalistlərə hansı qayda, seçim əsasında paylanacağı isə hələlik dəqiqləşməyib. Fondun icraçı direktoru Vüqar Səfərli “Yeni Müsavat”a açıqlamasında bildirib ki, binanın tikintisinə start veriləndən sonra qaydalar müəyyənləşəcək. İlkin açıqlamalara görə, bu zaman redaksiyalardan gələn rəylər də nəzərə alınacaq.
Maraqlıdır, bəs redaksiyalar evsiz jurnalistlər arasında seçim edərkən hansı kriteriyaları əsas götürəcəklər? Siyahıya düşəcək jurnalistlərin sayı məhdud olacağından hamını razı salan seçim etmək çətin olmayacaq? Bu, redaksiya daxilində intriqa, soyuq ab-havaya əsas yaratmayacaq? Bu suallarla bir neçə redaktora müraciət etdik.
“Turan” İnformasiya Agentliyinin direktoru Mehman Əliyev hesab edir ki, əslində evsiz jurnalistlərin problemini bu qaydada həll etmək doğru deyil. Onun sözlərinə görə, jurnalistlərə 30 illik güzəştli kreditlərlə ev verilməsi daha doğrudur. Bu halda jurnalist ayda 100 manat kredit ödəməklə bu problemini həll edə bilər: “İndiki varianta qalanda isə fond gərək əvvəlcə monitorinq aparaydı. Öyrənəydi ki, real qəzetlərin jurnalistləri arasında nə qədər jurnalistin mənzilə ehtiyacı var. Siyahı bəlli olandan sonra müzakirələr aparıb, ortaya sanballı nəticə qoymaq olardı”.
O ki qaldı evsiz jurnalistlərin siyahısını müəyyənləşdirərkən, “Turan”ın tutacağı mövqeyə, M.Əliyev bildirdi ki, seçim iki mərhələ nəticəsində müəyyənləşməlidir. Onun sözlərinə görə, ilk növbədə evsiz jurnalistlər öz vəziyyətlərini, evə ehtiyacı olmalarını əsaslandırmalıdırlar: “Redaksiyada evə iddialı olanların siyahısı müəyyənləşəndən sonra qapalı sorğu keçirilməliidir ki, ev konkret kimə daha çox lazımdır”.
M.Əliyev hesab edir ki, ümumiyyətlə, bu ev məsələsi mediada qeyri-sağlam bir mühit, pərakəndəlik yaradacaq. Onun sözlərinə görə, sivil cəmiyyətlərdə jurnalistlər kreditlə ev sahibi ola bilir. Müsahibimiz Azərbaycanda hətta normal qazanan jurnalistin belə bu hüquqdan məhrum olunduğunu dedi: “Çünki həmin jurnalist ayda 600-700 manat qazansa da, sənəddə onun məvacibi 100-150 manat göstərilir. Kredit verəndə isə iş yerindən arayış istəyir, məvacibin durumu ilə maraqlanırlar. 150 manat maaş alan jurnalistə kim ev verər?”
“Azadlıq” qəzetinin baş direktoru Azər Əhmədov isə bildirdi ki, təmsil etdiyi qəzetdə cəmi iki nəfərin şəxsi evi var - özünün və baş redaktor Qənimət Zahidin. Hər ikisinin “Azadlıq” qəzeti nəşr olunana qədər ev sahibi olduqlarını xatırladan müsahibimiz hazırda redaksiya kollektivində redaktordan, texniki işçidən tutmuş jurnalistlərə qədər hər kəsin evsiz olduğunu dedi: “Hələ bilinmir ki, hər redaksiyaya konkret neçə ev veriləcək. Bu zaman qəzetin nüfuzu, yaşı, iqtidar-müxalifyönlü olması nəzərə alınacaqmı? O ki qaldı bizim bu seçimi necə gerçəkləşdirəcəyimizə, məncə, bu, AXCP-Müsavat birliyinin 11 dairədən namizəd müəyyənləşdirməsi qədər çətin olacaq”.
A.Əhmədov seçim edərkən jurnalistlərin staj baxımdan qəzetdəki rolu, yerinin əhəmiyyət daşıyacağını dedi. Müsahibimiz bu məsələnin redaksiya daxilində konflikt yaradacağına inanmır: “Biz adətən bu sayaq məsələləri redaksiya daxili yığıncaqda həll edirik. Yəqin ki, bu dəfə də redaksiyanın bir neçə dəfə iclası çağırılacaq. Ümumi konsensus əsasında qərarımızı verəcəyik. Arzu edək ki, bu layihə davam etsin. Növbəti dəfə də daha 80 jurnalistə ev verilsin”.
“Bakı-xəbər” qəzetinin baş redaktoru Aydın Quliyev isə bildirdi ki, hələlik redaksiyalardan hansı formada təqdimat istənildiyi bəlli deyil. Müsahibimiz təklif edir ki, bu təşəbbüs evsiz jurnalistlərin özləri tərəfindən olsun: “Yəni, evə iddialı olan jurnalist fərdi şəkildə sənədini fonda təqdim etsin, fondda da bu məsələ şəffaf şəkildə müzakirə olunaraq qərar verilsin”.
A.Quliyev hesab edir ki, siyahı redaksiya tərəfindən tərtib olunsa, redaksiyalarda ciddi problemlər yarana bilər.