JURNALİSTLƏRİN İFADƏSİ TƏHRİF OLUNUB, VƏKİL ŞİKAYƏT HAZIRLAYIR

	13 fevral 2012


Onlayn ictimai-siyasi qəzet

Media

JURNALİSTLƏRİN İFADƏSİ TƏHRİF OLUNUB, VƏKİL ŞİKAYƏT HAZIRLAYIR

2010-08-31

Fariz Namazlı: “Bunun adı absurddur”

Qəzetimizin ötən sayında xəbər vermişdik ki, “Yeni Müsavat” qəzetinin reportyoru Elmin Bədəlovun və “Milli yol” qəzetinin əməkdaşı Anar Əliyevin (Gəraylı) nəqliyyat naziri Ziya Məmmədovun imarətinin qarşısında vəhşicəsinə döyülməsi ilə bağlı polis araşdırması ilə bağlı yekun qərar zərərçəkənlərin əlinə çatıb. Döyülən jurnalistlər isə onların ifadələrinin bu qərarda təhrif olunaraq kontekstdən çıxarıldığını deyirlər.

E.Bədəlov bizə açıqlamasında bildirdi ki, iş saxtalaşdırılıb. Onun sözlərinə görə, zərərçəkənlərin ifadələri qərarda təhrif olunaraq kontekstdən çıxarılıb: “Orada yazılır ki, jurnalistlərdən biri hasara çıxıb, amma ikisi yıxılıb. Bu necə olur, bir nəfər hasara çıxır, amma iki nəfər yıxılır? Heç ekspertiza rəyini və ifadələrimizi də bizə təqdim etmədilər. Halbuki işlə tanış olmaq bizim haqqımızdır. Bizə ”sizinlə birgə hadisə yerinə baxış keçirəcəyik" desələr də bizi çağırmadılar. Yalan ifadələr əsasında belə uydurma qərar hazırlayıblar. Jurnalistə zor tətbiq edilməsə, o, çəkdiyi fotoların silinməsinə razı olmaz".
A.Əliyev(Gəraylı) da Xəzər Rayon Polis İdarəsində verdiyi izahat işinin araşdıranlar tərəfindən ciddi təhrif olunduğunu hesab edir. Onun sözlərinə görə, işi araşdıran baş təhqiqatçının hazırladığı qərarda da kifayət qədər təhrif var: “Qərarda yazılıb ki, guya mən öz izahatımda ”bağ evinin şəklini çəkərkən qapının ağzına gələn şəxslər tərəfindən döyülməmişəm, lakin sonradan gözətçi otağına aparıldığımızda bir-iki sillə vurublar" yazmışam. Bəyan edirəm ki, qərarda mənə aid olduğu iddia edilən bu fikirlər tam uydurmadı, izahatımda belə ifadələr işlətməmişəm. İzahatımda xüsusi vurğulamışam ki, bizi darvazanın qarşısında şəkil çəkərkən sillə-təpiklə maşına basıblar, sonra da eyni prosesi aparıldığımız nəzarət otağında davam etdiriblər".
Media Hüququ İnstitutunun hüquqşünası Fariz Namazlı isə qərardan Xəzər Rayon Məhkəməsinə şikayət verəcəklərini dedi. Onun sözlərinə görə, şikayətdə iş materialları ilə tanış olunması barədə vəsatət qaldırılacaq: “Düzü, cinayət işinin başlanması rədd olunanda iş materialları zərərçəkənlərə verilmir. İş tam aparılanda isə onlara ittiham aktı verilir. Biz şikayət materiallarını əldə edəndə biləcəyik ki, konkret təhrif harada var”.
F.Namazlı onu da dedi ki, qərarda ziddiyyətli məqamlar var. Belə ki, ekspertizanın verdiyi rəyə görə, jurnalistin üzərindəki bir neçə xəsarətin bir dəfə yıxılmaqla baş verməsi absurd məsələdir. Ümumiyyətlə, qərar özü qanunsuzdur: “Onlar jurnalistlərin xəsarət almasına qanuni don geyindirmək üçün belə bir absurd qərar hazırlayıb. Jurnalistlərin isə ifadəsinin təhrif olunması cinayət işinin rədd olunması üçün hazırlanmış planın bir hissəsidir. Heç jurnalistləri də təhqiqat materialları ilə tanış etməyiblər, onlarla birgə hadisə yerində araşdırma aparılmayıb. Heç bəlkə o şahidlər də hadisə vaxtı ərazidə olmayıblar”.

Sevinc TELMANQIZI

336 dəfə baxılıb