“REKET” QƏZET YAP-ın BALANSINDA OLAN BİNADA YERLƏŞİR

	13 fevral 2012


Onlayn ictimai-siyasi qəzet

Media

“REKET” QƏZET YAP-ın BALANSINDA OLAN BİNADA YERLƏŞİR

2010-09-01

Qəzetimizin ötən sayında xəbər vermişdik ki, “Azad Azərbaycan” adlı qəzet Mətbuat Şurasının “qara siyahı”sına salınıb. Fəaliyyətində reketçiliyə xas əlamətlər olduğundan sözügedən nəşrlə bağlı belə qərar verilib.

Məlumdur ki, adı “qara siyahı”ya düşənlər “Azərbaycan” nəşriyyatında yerləşirlərsə, dərhal oradan çıxarılır. Amma əldə etdiyimiz məlumata görə, “Azad Azərbaycan” Yeni Azərbaycan Partiyasının “Sahil” metrosu yaxınlığındakı binasında yerləşir. Eyni binada hakim partiyanın mətbu orqanları olan “Səs” və “Yeni Azərbaycan” qəzeti də yerləşir. Maraqlıdır, hakim partiya adı “qara siyahı”ya düşən qəzeti öz binasında saxlayacaqmı?
YAP-ın mətbuat xidmətindən bildirdilər ki, sözügedən nəşr YAP-ın mərkəzi qərargahında yox, Sahil bağının digər tərəfində yerləşən binada yerləşir. Amma müxbirimizin “adı qara siyahıya düşən nəşrin binanızda qalmasına niyə icazə verirsiniz” sualına konkret cavab verən olmadı. Bizə bildirildi ki, bu məsələ ilə bağlı partiyada hər hansı müzakirə aparılmayıb.
Redaksiyanın şəhər telefonlarına zəng edəndə isə adının çəkilməsini istəməyən bir müxbir bildirdi ki, qəzet hələ redaksiyada fəaliyyətini davam etdirir. Onlara binadan çıxmaları ilə bağlı göstəriş verilməyib.
Sözügedən binada yerləşən “Səs” və “Yeni Azərbaycan” qəzetlərindən isə “reket qonşu” ilə bağlı şərh vermək istəyən tapılmadı. Suallarımıza bir qayda olaraq “”bu, bizə aidiyyəti olan məsələ deyil" şəklində cavab verildi.
Mətbuat Şurasından isə dedilər ki, məsələ onların nəzarətindədir. Bu və ya digər nəşrin adının “qara siyahı”ya salınması onun gələcək fəaliyyətini mümkünsüz edir. İstisna hal kimi qəzet özünü doğruldan, səhvindən nəticə çıxaran addımlar atdıqda onunla bağlı məsələ təkrar müzakirə edilir və siyahıdan çıxarılması ehtimalı gündəmə gəlir. Şura indiki halda adını siyahıya saldıqları bütün nəşrlər kimi “Azad Azərbaycan”ın məsələsini də diqqətdə saxlayır.

Xəbər xidməti

399 dəfə baxılıb