SEÇKİ İLİNDƏ MƏTBUATI YENƏ TƏHLÜKƏLƏR GÖZLƏYİR

	13 fevral 2012


Onlayn ictimai-siyasi qəzet

Media

SEÇKİ İLİNDƏ MƏTBUATI YENƏ TƏHLÜKƏLƏR GÖZLƏYİR?

2010-09-03

Seçkiöncəsi və seçkidən sonrakı dönəm Azərbaycan mətbuatı üçün hər zaman gərgin keçib. Ölkə mətbuatının tarixində jurnalistlərə qarşı ən güclü təzyiq halları məhz bu dönəmlərə təsadüf edir. Buna səbəb isə hökumətin strategiyasıdır - məqsəd yerli və xarici təşkilatların, cəmiyyətin diqqətini seçki saxtakarlıqlarından yayındırıb, jurnalist təzyiqlərinin üzərində cəmləşdirməkdir. Maraqlıdır, builki seçkiöncəsi dönəm mətbuat üçün hansı spesifik cəhətləri ilə diqqət çəkir?

Tanınmış media mütəxəssisi Zeynal Məmmədli hesab edir ki, ümumiyyətlə, mətbuatın durumunun seçkiöncəsi-seçkisonrası dönəmlərdə yada salınması doğru deyil. Z.Məmmədlini sözlərinə görə, media mühitin və cəmiyyətin havasından gedirsə, durumunun ildən-ilə gerilədiyi görünür: “Xalqın mediaya münasibəti necədirsə, seçkilərə də elədir. Sanki nə seçkilərin, nə də medianın ona dəxli var. Xalq ümidsizdir. Media isə seçkiöncəsi ondan yararlanmaq istəyənlərə lazımdır. Builki seçkiöncəsi vəziyyət də stəkanda fırtınaya bənzəyir. Amma təəssüf ki, stəkanın da həcmi ildən-ilə kiçilir”.
Z.Məmmədli bu il media olaylarının yadda qalmayacağını proqnozlaşdırır. Müsahibimizin fikrincə, buna səbəb ortada mediaya dair hər hansı seçki layihəsinin olmamasıdır: “Seçki söhbətləri bir qrup tənqidçinin dili ilə qəzetdə öz əksini tapır. Amma ölkədə seçki ilə bağlı bir neçə qəzet birləşib ortaq layihə ilə çıxış edirmi? Halbuki bu təcrübə mümkün ola bilərdi”.
Müsahibimiz müasir medianın durumunu polisin hadisə yerinə daim gec çatması ilə müqayisə etdi. Onun sözlərinə görə, media da polis kimi ya hadisə yerinə gecikir, ya da ortada olay olmadığı üçün hərəkətsiz qalır.
“Turan” İnformasiya Agentliyinin direktoru Mehman Əliyev isə hesab edir ki, bu il seçkiöncəsi mətbuat üçün heç bir problem olmayacaq. Onun sözlərinə görə, hər şey əvvəlki illərdən daha sakit olacaq. Müsahibimiz hesab edir ki, buna səbəb əksər KİV-in hakimiyyət tərəfindən satın alınmasıdır: “Hansısa mətbuat orqanlarına qarşı epizodik təzyiqlər ola bilər. Amma ümumən vəziyyəti elə neytrallaşdıracaqlar ki, təzyiqə ehtiyac qalmayacaq”.

Sevinc TELMANQIZI

654 dəfə baxılıb