TELEKANALLARIN DA REKLAM BAZASI GENİŞLƏNDİRİLƏCƏK

	12 fevral 2012


Onlayn ictimai-siyasi qəzet

Media

TELEKANALLARIN DA REKLAM BAZASI GENİŞLƏNDİRİLƏCƏK

2010-09-03

Azərbaycanda KİV-in reklam bazarının genişləndirilməsi ölkədə fəaliyyət göstərən teleradio kanallarına da şamil olunacaq. Bu barədə “Trend”ə Televiziya və Radio Şurasının (MTRŞ) sədri Nuşirəvan Məhərrəmli bildirib.

“Hazırda reklamla bağlı məsələ gündəmdədir və gələcəkdə MTRŞ bu məsələyə xüsusi önəm verəcək. Bu baxımdan mediadan söz gedirsə, teleradio kanalları da reklam üzrə ümumi vergidən azad edilməsindən kənarda qalmamalıdırlar”, - şura sədri bildirib.
N.Məhərrəmlinin sözlərinə görə, hazırda dövri mətbuatın, yəni qəzet və jurnalların reklamla bağlı vəziyyətləri bir o qədər ürəkaçan deyil və bu səbəbdən, onlar xüsusi olaraq reklam bazarının yaxşılaşdırılması sahəsinə maraq göstərirlər. Lakin şura sədri bildirib ki, televiziyalar da bu işlərdən kənarda qalmayacaqlar.
MTRŞ sədri qeyd edib ki, medianın əsas hissəsini elektron media təşkil edir - dövri mətbuatdan fərqli olaraq, elektron medianın cəmiyyətə təsir imkanları daha böyükdür, insanların məlumat əldə etməsində dövri mətbuatla elektron media arasında fərq çox böyükdür.
Biz də öz növbəmizdə Mətbuat Şurasından KİV-in reklam bazarının genişləndirilməsi ilə bağlı nə kimi işlər görüldüyünü soruşduq. Şuradan “Yeni Müsavat”a bildirildi ki, adətən yay aylarında mətbuata reklam axını zəif olur və bu, təbiidir. Amma şura səviyyəsində problemin həlli üçün kompleks tədbirlər görülür. Bununla bağlı yaxın vaxtlarda media nümayəndələrinin iştirakı ilə tədbir keçiriləcək və tədbirlərə planı müzakirə olunacaq.

Sevinc TELMANQIZI

346 dəfə baxılıb