PREZİDENT APARATI BİNASINI ÇƏKMƏK NİYƏ QADAĞANDIR

	13 fevral 2012


Onlayn ictimai-siyasi qəzet

Media

PREZİDENT APARATI BİNASINI ÇƏKMƏK NİYƏ QADAĞANDIR?

2010-09-04

Rəşid Hacılı: “Əgər adamlar ora yığışıb etiraz edirsə, gizlilikdən, sirdən danışmaq olmaz”

Qəzetimizin ötən sayında xəbər vermişdik ki, iki jurnalist - Reportyorların Azadlıq və Təhlükəsizlik İnstitutunun və “Turan” İnformasiya Agentliyinin əməkdaşları Prezident Administrasiyasının qarşısında təzyiqlə üzləşiblər. Polis və mühafizə xidməti əməkdaşları 7-ci mikrorayondakı qəbiristanlığın bir hissəsinin köçürülməsinə etiraz edən vətəndaşların keçirdiyi aksiyadan çəkiliş aparmağa gələn jurnalistləri administrasiya binasına aparıblar. Orada özünü təqdim etməyən şəxs jurnalistlərə bildirib ki, Prezident Administrasiyasının binasını çəkmək qadağandır. O, fotoaparatlara baxış keçirib və administrasiya binasının çəkilmədiyinə əmin olduqdan sonra jurnalistləri sərbəst buraxıb.

Avqustun 30-da baş vermiş bu hadisədən məlumat yayan Reportyorların Azadlıq və Təhlükəsizlik İnstitutu əlavə edib ki, Prezident Administrasiyasının görüntüsünü çəkdiyinə görə jurnalistlərin saxlanması halları dəfələrlə baş verib: “Reportyorların Azadlıq və Təhlükəsizlik İnstitutu Prezident Administrasiyasına yazılı sorğu ilə müraciət edərək binanın çəkilməsinin qadağan edilməsinin hansı qanunla tənzimləndiyini soruşsa da, 4 ay keçməsinə baxmayaraq hələ də rəsmi yazılı cavab almayıb”.
Bu arada xatırladaq ki, “Yeni Müsavat” qəzeti reportyorları da dəfələrlə bu cür təzyiq halları ilə qarşılaşıblar. “Dövlət əhəmiyyətli binaların fotosunu çəkmək olmaz” tipli qadağalar isə heç bir qanunvericiliklə əsaslandırılmayıb. Biz də öz növbəmizdə bunun qanuni tərəfləri ilə maraqlandıq.
Media Hüquqlari İnstitutunun rəhbəri Rəşid Hacılı bizə açıqlamasında bildirdi ki, hər hansı binanın çəkilişinin aparılması ilə bağlı qadağa müəmmalıdır. Onun sözlərinə görə, ortada əsaslandırma olsa, başa düşmək mümkündür. Müsahibimiz dedi ki, Prezident Aparatı, eləcə də orada baş verən olaylar hər zaman diqqətdədir: “Əgər ora adamlar yığışıb, nəyəsə etiraz edirsə, gizlilikdən, sirlərdən danışmaq çətindir”.
R.Hacılı dedi ki, əgər bu günə qədər Prezident Aparatı mühafizəçiləri tərəfindən jurnalistlərin fotoaparatına müdaxilə edilibsə, bunun səbəbləri barədə açıqlama verilməlidir. Müsahibimizin sözlərinə görə, dövlət orqanlarının binaları qorunur, təhlükəsizlik tədbirləri görülür: “Amma bu, hansısa jurnalistin fəaliyyətinə əngəl törətmək üçün bəraət sayıla bilməz. Əgər binanın görüntüsü, oradakı hansısa detallar fotoaparatın yaddaşına düşürsə, demək, bu, adi gözlə də görünə bilər. Konkret nələrin təhlükəsizlik xidməti əməkdaşları üçün problem sayıla biləcəyi ilə bağlı yəqin ki, sahə üzrə ekspertlər danışa bilər. Amma ortada konkret normativlər olmalıdır ki, binanın hansı yönünü, hansı səbəbdən çəkmək olmaz”.
Bu arada onu da xatırladaq ki, görüntüsü açıq olan hər hansı obyektdən çəkiliş aparan jurnalistin fəaliyyətinə mane olmaq qanunsuzluq sayılır. Bundan başqa, şəxsin mənzilinin, villasının içini çəkmək qanunla qadağandır, çünki, bu, özəl həyata müdaxilə sayılır. Amma onun hamının gördüyü xarici görünüşünün çəkilişi qanunla qadağan deyil.

SEVİNC

990 dəfə baxılıb