600 MİLYARDDAN BİZİM MƏTBUATA NƏ DÜŞƏ BİLƏR

	13 fevral 2012


Onlayn ictimai-siyasi qəzet

Media

600 MİLYARDDAN BİZİM MƏTBUATA NƏ DÜŞƏ BİLƏR?

2010-09-05

Dünya mediası reklam bazarından astronomik qazanc götürür, biz isə...

Son günlər mediada ən çox müzakirə olunan mövzulardan biri də çap mediasının reklam bazarı ilə bağlı gözlənilən dəyişikliklərdir. Xatırladaq ki, mətbuatın yaranmasının 135 illiyi ilə əlaqədar Mətbuat Şurasının (MŞ) yeni ofisində prezident İlham Əliyevin iştirakı ilə keçirilən toplantıda MŞ sədri Əflatun Amaşov qəzet və jurnalların reklam gəlirlərinin azlığına toxunaraq bildirib ki, 40 milyon manat olan Azərbaycanın illik reklam bazarının cəmi 2 milyon manatı və ya 5 faizi mətbu orqanların payına düşür.

Bu fakta münasibətini bildirən dövlət başçısı isə reklam payının belə bölgüsünün ədalətsiz və dözülməz hal olduğunu deyib və bu məsələ ilə bağlı müəyyən addımlar atılacağını deyib. Hələlik MŞ bu sahədə müəyyən araşdırmalar aparır.
Amma Milli Teleradio Şurası rəhbərliyi də bu yazınlarda telekanalların reklama iddialı olması barədə açıqlama verib. Azərbaycanda isə çap və elektron medianın reklam təminatı ilə bağlı ortada xeyli fərqlər var. Öncə dünya miqyasından bəzi paralellər.
İngiltərədə bir ildə ölkə üzrə verilən reklamın 23-25 faizi televiziya və mətbuatın payına düşür. 30 milyard dollara yaxın olan reklam bazarının təxminən 6 milyard dolları media strukturlarına xərclənir. Bu qədər vəsaitin 48 faizi mətbuat orqanlarının, 52 faizi isə televiziyanın payına düşür.
Türkiyədə reklam bazarının həcmi isə 2,145 milyard dollardır. Reklam sifarişlərindən mətbuatın aldığı illik pay təxminən 250 milyon dollardır. Televiziyaların reklamdan qazancı isə bundan 4-5 dəfə çoxdur. Türkiyədə reklam bazarının adambaşına düşən payı 28,7 dollardır. Azərbaycanda isə bu göstərici 4-5 dollar səviyyəsindədir. Dünya üzrə reklam bazarının həcmi 600 milyard dollara bərabərdir. Kütləvi informasiya vasitələri bunun 55-60 faizinə sahibdir.
Ekspertlər hesab edir ki, bütün dünyada KİV-ə reklam verilməsi onların tirajı, reytinqinə müvafiq olaraq tənzimlənir. Azərbaycanda isə artıq bu göstəricilərə əhəmiyyət verilmir. Siyasi məqamlar reklam verənlər üçün böyük önəm daşıyır. MŞ və MTRŞ rəhbərliyinin vədlərinə görə, yaxın gələcəkdə bu problem yoluna qoyulacaq. O zaman gerçək rəqəmlərdən danışmaq mümkündür.

Sevinc TELMANQIZI

1487 dəfə baxılıb