QƏZETLƏRİMİZİ TÜRK QƏZETLƏRİNƏ OXŞADACAQLAR

	13 fevral 2012


Onlayn ictimai-siyasi qəzet

Media

QƏZETLƏRİMİZİ TÜRK QƏZETLƏRİNƏ OXŞADACAQLAR

2010-09-05

Elşad Eyvazlı: “Hürriyet”in dizayneri bir həftə qəzetlərin birinin üzərində işləyəcək”

“Bugünkü ”Xalq qəzeti" ilə “Kommunist” qəzetinin dizaynı arasında heç bir fərq yoxdur". Bu sözləri bizə açıqlamasında Parlament Jurnalistlər Birliyinin sədri Elşad Eyvazlı dedi. Onun sözlərinə görə, hazırda Azərbaycanda qəzet satışının aşağı olmasının bir səbəbi də onların dizaynındakı qüsurlardadır.

E.Eyvazlı bu məsələdə beynəlxalq ekspertlərin təcrübəsindən yararlanmağın vacib olduğunu düşünür. Bu səbəbdən də rəhbəri olduğu təşkilat Prezident yanında KİV-in İnkişafına Dövlət Dəstəyi Fondunun dəstəyi ilə “Qəzetlərin tərtibatında Türkiyə təcrübəsinin tətbiqi” adlı layihə həyata keçirəcək: “İlkin variantda ölkənin aparıcı 10 qəzetinin tərtibat, dizayn və başlıqlar məsələsi müzakirə ediləcək. Mütəxəssislər və ayrı-ayrı oxucu kütləsinin bu barədə fikri alınacaq. Nəticədə ən yaxşı tərtibatı olan qəzetlər müəyyənləşəcək. Sonra isə Türkiyəninn ”Hürriyet" qəzetindən Azərbaycana mütəxəssis dəvət olunacaq. Qəzet dizaynerləri üçün seminar təşkil olunacaq. Sonra bu seminarın qəzetlərin dizayna təsiri məsələsi öyrəniləcək".
E.Eyvazlı bu layihə ilə bağlı Türkiyə Qəzetçilər Federasiyası ilə razılığa gəldiklərini dedi. Onun sözlərinə görə, layihə çərçivəsində iki tanınmış qəzetin dizaynerinin Türkiyədə təcrübə keçmək üçün göndərilməsi də planlaşdırılır. Türkiyədən dəvət ediləcək dizaynerin bir həftə boyunca ölkə qəzetlərindən hansındasa çalışması da nəzərdə tutulur: “Qəzet rəhbərliyi razılıq versə, Türkiyədən gələn dizayner o qəzetdə bir həftə çalışaraq yeniliklər edəcək, qəzetin dizaynerləri də bunu öyrənəcək. Məncə, bununla qəzetlərin satışı da yüksələcək. Çünki oxucu qəzeti əlinə götürdüyü ilk bir neçə saniyə ərzində onu alıb-almayacağına qərar verir. Bu qərarında isə qəzetin xarici görünüşü, dizaynı böyük rol oynayır. İndi qəzetlərin əksəriyyətinin bir-birinə bənzəməsi isə işləri çətinləşdirir”.

Sevinc TELMANQIZI

532 dəfə baxılıb