“YENİ AZƏRBAYCAN” MÜXALİFƏTƏ VƏ ATALARIMIZA QARŞI...

	13 fevral 2012


Onlayn ictimai-siyasi qəzet

Media

“YENİ AZƏRBAYCAN” MÜXALİFƏTƏ VƏ ATALARIMIZA QARŞI...

2010-09-05

“Qara piar”ı davam etdirən qəzet atalar sözümüzü də təhrif edib

“Yeni Azərbaycan” qəzeti “qara piar”ını davam etdirir. Hərçənd ki, bu qəzetdə çalışan hörmətli həmkarlarımız yazırlar ki, onların başlatdıqları kampaniyanın “qara piar”a dəxli yoxdur... Ötən saylarımızda da göstərmişik: bu qəzetin 6-cı səhifəsində müxalifət liderlərinə qarşı tipik qaralama kampaniyası aparılır. Bu zaman stereotip kimi bir atalar misalımızdan istifadə olunur. Lakin qəzet həmin ata sözünü də təhrif edir; “Düşmənimin düşməni mənim dostumdur” el məsəli “Düşmənimin dostu mənim düşmənimdir” kimi tirajlanır. Üstəlik, qarşısında “Azərbaycan xalqının atalar sözü” deyə təqdimat da verilir.

Qəzet artıq iki həftədir ki, “Gündəlik Azərbaycan” və “Realnıy Azerbaydjan” qəzetlərinin hazırda həbsdə olan baş redaktoru Eynulla Fətullayevin ermənilərlə dostluq etdiyini iddia edir və onun vaxtilə qondarma Dağlıq Qarabağ Respublikasında olarkən Arkadi Qukasyanla və digər situasiyalarda çəkdirdiyi şəkilləri, yanında isə Müsavat başqanı İsa Qəmbərin, AXCP sədri Əli Kərimlinin, ALP lideri Lalə Şövkətin və politoloq Eldar Namazovun şəkillərini dərc edir. Baş redaktorun şəkillərinin üzərində “Bu Eynulla Fətullayevdir! Azərbaycanın düşmənləri ilə birlikdə”, müxalifətçilərin fotolarının üzərinə isə “Bunlar isə Eynulla Fətullayevi dəstəkləyənlərdir”, yazılıb. Yuxarıda qeyd etdiyimiz təhrif olunmuş el məsəli də həmin şəkillərin altında iri hərflərlə verilib.
Qəzetimizin ötən saylarından birində həmin mənzərə ilə bağlı yazı dərc etmişdik və müsahiblərimizə istinadən bildirmişdik ki, əsl “qara piar” elə “Yeni Azərbaycan”da dərc olunan bu materialdır. Adıçəkilən qəzetin son saylarından birində isə həmin material “fotofakt və atalar sözü” adlandırılır və qeyd olunur ki, “Yeni Azərbaycan”da yazılan hər yazı müxalifətin gözünə “qara piar” kimi görünür. Yazının müəllifi hörmətli Pərviz Sadayoğludur. Pərviz bəy bir vaxtlar müstəqil jurnalistikanın sıralarında idi; bizimlə bərabər bu hökuməti yıxıb-sürüyən yazılar yazırdı, ölkədə aparılan siyasəti tənqid edirdi. İndi hökumət qəzetində işləyir; bizi tənqid edir. Buna da deyəcəyimiz yox...
Amma onun və çalışdığı qəzetin iddialarına deyəcəklərimiz var. Həm də ölkənin tanınmış politoloqlarının, üstəlik də “qara piar”a hədəf olan liderlərin təşkilatlarının ifasında.
Politoloq Eldar Namazov hesab edir ki, “Yeni Azərbaycan”da dərc olunan həmin material qara “piar”dır. Onun sözlərinə görə, “qara piar”ı adi tənqiddən fərqləndirən ilk xüsusiyyət qarşı tərəfin mövqeyinin öyrənilməməsidir: “Əgər kiməsə bir irad varsa, həmin adama da şərait yaradılmalıdır ki, öz mövqeyini ifadə etsin. Bununla oxuculara da imkan yaradılır ki, iki mövqe arasında bir seçim edə bilsin. Ancaq birtərəfli qaydada ittihamlar irəli sürülürsə və bu, davamlı olursa, deməli, bu, ”qara piar" kampaniyasıdır". E.Namazov təəssüflə qeyd etdi ki, Azərbaycanda “qara piar” dövlət səviyyəsində aparılır: “Biz hamımız bilirik ki, ölkədə hansı mühit formalaşıb, siyasi opponentlərə qarşı hansı kampaniyalar aparılır. Təəssüf ki, Azərbaycanda belə hallar dövlət səviyyəsində həyata keçirilir”.
Media eksperti Zeynal Məmmədli də hesab edir ki, əgər materialda qarşı tərəfin mövqeyinin əks etdirilməsinə şərait yaradılmayıbsa, burada “qara piar”ın elementləri görsənir. Bununla belə, ekspertin fikrincə, bu tipli materialları şeylər totalitar-avtoritar dövlətin və mətbuatın təcrübəsindən qalmış ənənə kimi qiymətləndirmək olar: “Həmin materialı indiki Azərbaycan şərtlərində konkret partiya qəzetində getdiyi üçün birmənalı olaraq ”qara piar" saymaq mümkün olmasa da, o, ictimai rəy yaratmağa yox, ictimai ikrah yaratmağa qadirdir".

Sevinc TELMANQIZI

605 dəfə baxılıb