SÖZ VƏ İFADƏ AZADLIĞINA DƏSTƏK FORUMU İŞƏ BAŞLAYIR

	13 fevral 2012


Onlayn ictimai-siyasi qəzet

Media

SÖZ VƏ İFADƏ AZADLIĞINA DƏSTƏK FORUMU İŞƏ BAŞLAYIR

2010-09-07

Üç gün davam edəcək tədbirin sonunda “İfadə azadlığı” mükafatı da veriləcək

Azərbaycanda ilk dəfə olaraq keçirilən Söz və İfadə Azadlığına İctimai Dəstək Forumu bu gün öz işinə başlayır. Saat 12:00-da Azərbaycan Media Mərkəzində foruma konfransla start veriləcək. Konfrans dünyanın 10-dan artıq nüfuzlu beynəlxalq təşkilatının nümayəndələrinin, dövlət orqanları təmsilçilərinin, vətəndaş cəmiyyəti fəallarının, media rəhbərlərinin iştirakı ilə keçiriləcək.

Tədbirdə forum çərçivəsində düzənlənəcək tədbirlər silsiləsinin yeri və vaxtı barədə məlumat veriləcək. Forum üç gün davam edəcək. İlk gün debatların da təşkil olunacağı gözlənilir. Konfrans təşkilatçıları müxtəlif ictimai qruplar arasında 50 minə yaxın vərəqələrin paylanılmasını nəzərdə tutub. Forum çərçivəsində kitab, foto və karikatura sərgisi, "Frontline" diskussiya klubunun açılışı, dünyanın 10-dan artıq nüfuzlu beynəlxalq təşkilatının rəhbər nümayəndələrinin, dövlət orqanları təmsilçilərinin, vətəndaş cəmiyyəti fəallarının, jurnalistlərin iştirakı ilə yekun konfrans keçiriləcək.
Foruma dünyanın “Freedom House”, “ARTİCLE - 19", ”Sərhədsiz Reportyorlar" kimi mətbuat məsələləri ilə məşğul olan aparıcı təşkilatları nümayəndələrinin də qatılacağı nəzərdə tutulub. Sentyabrın 8-də bu mövzuda kitab və karikatura sərgisi keçiriləcək. Dünyanın tanınmış siyasət və fikir adamlarının forum iştirakçılarına salamları nəzərdə tutulub. “Frontlayn” diskussiya klubunun açılışı də bu günlərdə gerçəkləşəcək. Forumun sonuncu günü - ayın 9-da konfrans nəzərdə tutulub. Konfrans çərçivəsində bir çox ciddi məruzələr olacaq. Eyni zamanda Azərbaycanda söz və ifadə azadlığı kontekstində təzyiqlərə məruz qalmış, məhkəmələrdən keçmiş insanlar arasında keçirilən sorğuya görə “İfadə azadlığı” mükafatı təqdim olacaq. Xatırladaq ki, mükafat da konfransda təqdim olunacaq.

S.TELMANQIZI

638 dəfə baxılıb