“AZƏRBAYCANDA SÖZ VƏ İFADƏ AZADLIĞINA DƏSTƏK” FORUMUNA START VERİLDİ

	13 fevral 2012


Onlayn ictimai-siyasi qəzet

Media

“AZƏRBAYCANDA SÖZ VƏ İFADƏ AZADLIĞINA DƏSTƏK” FORUMUNA START VERİLDİ

2010-09-08

Arif Əliyev: “O problemləri ki, biz həll etməliyik, onu başqalarından gözləmək olmaz”

“Azərbaycanda söz və ifadə azadlığına ictimai dəstək” Forumu öz işinə başlayıb. Dünən forum təşkilatçıları Azərbaycan Media Mərkəzində keçirdikləri mətbuat konfransında bu barədə məlumat verdilər. Tədbiri giriş sözü ilə açan “Yeni Nəsil” Jurnalistlər Birliyinin sədri Arif Əliyev bildirdi ki, forumun keçirilməsi barədə təklif yarım il əvvəl irəli sürülüb. Onun sözlərinə görə, o vaxt cəmiyyətdə növbəti dəfə söz azadlığı və mətbuatla bağlı vəziyyət gərgin idi. “Belə bir fikir yarandı ki, söz və ifadə azadlığının müdafiəsi ictimai missiyadır” deyən çıxışçı daha sonra forumun keçirilmə səbəblərinə də toxundu: “Çoxplanlı aksiya kimi forum vətəndaş cəmiyyətinin bu istiqamətdə səylərinin konsolidasiyasına, hökumət və digər sektorlarla dialoq və əməkdaşlıq üçün platformanın yaradılmasına çalışır. Prinsipcə, bu tədbirə ictimai dəstək forumu kimi baxmaq lazımdır. Amma istərdik ki, hökumət orqanları heç olmasa foruma loyal münasibət bəsləsin”.

A.Əliyev artıq forumla bağlı vərəqələrin küçələrdə paylandığını da dedi. Xatırladaq ki, həmin vərəqələrdə ifadə azadlığı ilə bağlı bütün lazımi məlumatlar əks olunub. Çıxışçı onu da dedi ki, hətta vərəqələrlə tanış olanlar “siz müxalifətdənsiniz” sualını yönəldiblər: “Bizsə bildiririk ki, bu aksiyanın siyasi yönü yoxdur. Biz göstərmək istəyirik ki, Azərbaycan ictimaiyyəti diri ictimaiyyətdir, ifadə azadlığına əzmini göstərir. Sərhədlərimiz genişdir, heç bir siyasi yönü olmadan hər kəsi bu aksiyaya dəvət edirik”.
Konfransda o da bildirildi ki, forum Azərbaycanda çox tanınmış ictimai və media təşkilatlarının təşəbbüsü ilə keçirilir. Bunların sırasında Avrointeqrasiya Milli Komitəsi, “Yeni Nəsil” Jurnalistlər Birliyi, İfadə Azadlığı Komitəsi, “Azərbaycan Naminə” İctimai Forumu, Azərbaycan Jurnalistlər İttifaqı, Açıq Cəmiyyət İnstitutu - Yardım Fondu və "Turan" İnformasiya Agentliyi yer alır.
Forumun ilk iki günündə söz və fikir azadlığına həsr olunmuş kitab, foto və karikatura sərgisi keçiriləcək. Digər tədbirlər, o cümlədən Frontlayn(ön xətt) jurnalist diskussiya klubunun açılışı olacaq. Tədbirin sonuncu günündə beynəlxalq konfrans keçiriləcək. Konfransda tanınmış xarici və yerli ekspertlər, jurnalistlər, ictimai xadimlər, dövlət qurumlarının nümayəndələri və bir sıra iri beynəlxalq təşkilatların rəhbərləri də iştirak edəcəklər.
A.Əliyev onu da bildirdi ki, forum Azərbaycanda söz və ifadə azadlığının inkişafındakı xidmətlərinə görə xüsusi mükafatın təqdim olunması ilə başa çatacaq. Laureatı əvvəllər məhkəmə çəkişmələrinə məruz qalmış və peşə fəaliyyəti ilə əlaqədar cinayət məsuliyyətinə cəlb olunmuş jurnalistlər seçəcəklər. Konfransda həmçinin forumun qətnaməsinin, ictimaiyyət və dövlət qurumları üçün fikir azadlığının inkişafına dair təkliflər və tövsiyələr paketinin qəbulu gözlənilir. Bundan başqa, xarici nümayəndələrdən ibarət missiya rəsmi şəxslər, ictimai təşkilatlar və KİV nümayəndələri ilə müxtəlif görüşlər keçirəcək.
Daha sonra jurnalistlərin suallarını cavablandıran forum təşkilatçıları sözügedən tədbirin mümkün nəticələrinə də toxundular. “Azərbaycan Naminə” İctimai Forumun rəhbəri Eldar Namazov bildirdi ki, bu tədbirin hansısa nəticəsi olmasa belə, onu keçirəcəklər. Çıxışçının sözlərinə görə, bu cür ciddi problem dərhal həll olunmasa da, onunla bağlı müzakirələrə zərurət var.
A.Əliyev də dedi ki, keçirdikləri forum mübarizədə bir mərhələ deyil. “Bunun xeyri olacaqmı" sualının cavabı özümüzdədir" deyən çıxışçının fikrincə, ictimaiyyət silkələnməlidir: “Hər şey Prezident Aparatı və ya ”Article 19" təşkilatı ilə həll olunmur. O şeyləri ki biz həll etməliyik, onu başqalarından gözləməməliyik".
“Yeni Nəsil”in sədri onu da dedi ki, forumda iştirak etmələri üçün hakimiyyət nümayəndələrinə dəvət göndərilib, çıxışlar da təklif olunub. Amma onların qatılıb-qatılmayacaqları bəlli deyil: “Foruma beynəlxalq maraq var. BMT-nin insan haqları üzrə məruzəçisi forum iştirakçılarına salamlarını göndərib”.

Sevinc TELMANQIZI

566 dəfə baxılıb