“YENİ MÜSAVAT” OXUYAN TƏLƏBƏ HÜCUMA MƏRUZ QALIB

	23 may 2012


Onlayn ictimai-siyasi qəzet

Media

“YENİ MÜSAVAT” OXUYAN TƏLƏBƏ HÜCUMA MƏRUZ QALIB

2011-05-01

Rüfət Əliyevi buna görə hətta polisə də aparmaq istəyiblər

Bakı Dövlət Universitetinin (BDU) 2 saylı korpusunda maraqlı hadisə baş verib. azxeber.com saytının məlumatına görə, universitetin 2 saylı təhsil binasında dayanan bir gənc “Yeni Müsavat” qəzeti oxuduğu üçün mühafizəçilər tərəfindən kobudcasına çölə çıxarılıb.

Hadisə ilə bağlı portalın əməkdaşları həmin gənclə görüşüb. Qərb Universitetinin tələbəsi olduğunu söyləyən Rüfət Əliyev hadisənin təfərrüatları barədə danışıb: “Universitetin qapısında müəlliməyə dərslə bağlı vərəqlər verəcəkdim. BDU-nun tələbəsi olmadığım üçün məni yalnız qapının qarşısında gözləməyə icazə verdilər. Mənsə bir kənarda sakitcə müəlliməmi gözləyirdim. Bu zaman özünü mühafizəçilərin rəisi kimi təqdim edən bir şəxs mənə yaxınlaşdı və əlimdəki "Yeni Müsavat" qəzetini gördü. Həmin şəxs mənə “Bu nə qəzetdi, başqa qəzet tapmadın oxumağa?” deyərək qolumdan tutdu və itələdi. Mənsə bunun səbəbini anlamadığımı və hər kəsin qəzet oxumaq hüququmun olduğunu söylədim. Onlar isə buna məhəl qoymadan məni çölə çıxartmağa çalışdılar, mənə kobudluq etdilər".
Tələbə hətta onu bölməyə aparmaq istədiklərini də söyləyib. Heç bir partiya üzvü olmadığını deyən R.Əliyevin sənədlərini də yoxlayıblar: “Bəli, mən onlara sadəcə dərs vəsaitlərini vermək üçün burada olduğumu söylədim. Onlar da mənim tələbə biletim olmadığı üçün haqlı olaraq qapıda gözləməyimi xahiş etdilər. Mən də razılaşdım. Sonra isə əlimdə "Yeni Müsavat"ı görüb mənə aqressiv davranmağa başladılar".

Elmin BƏDƏLOV

1070 dəfə baxılıb