XƏSTƏ HƏKİMDƏN ŞİKAYƏTÇİDİR | Oxucu_poçtu

	23 may 2012


Onlayn ictimai-siyasi qəzet

Oxucu poçtu

XƏSTƏ HƏKİMDƏN ŞİKAYƏTÇİDİR

2009-07-19

Baş həkim isə onun yalan danışdığını deyir

Redaksiyamıza vətəndaş Məhbubə Muradovanın şikayət məktubu daxil olub. Məktubda Respublika Endokrinoloji Mərkəzin həkimi, Bakının baş endokrinoloqu Rəna Cavadovaya qarşı ittihamlar yer alıb.

Şikayətçi bildirir: “1 iyun tarixində Rəna Cavadovanın qəbulunda oldum. Zob xəstəliyi ilə bağlı müraciət etdiyim həkim mənə 210 manatlıq müalicə yazdı, ardınca da məndən müayinə üçün 10 manat tələb etdi. Dedi ki, sənə vaxtım gedib”.
M.Muradovanın sözlərinə görə, girişdə tarixçə açdırmaq üçün qeydiyyat aparan katibəyə də 1 manat verib. Ancaq hər şey bununla bitməyib: “Ayın 2-si analizlərin cavabını aldım. Saat 12-də həkimə zəng vurdum. Amma onun işdə olmadığını dedilər. Dövlət qulluğunda saat 12-dən işdən çıxmaq nə deməkdir, başa düşmürəm”.
Nəhayət, xəstə həkimlə görüşə nail olub: “3 gündən sonra həkimin yanına müayinə kağızlarımı, USM cavablarını apardım. Mənə dedi ki, oxuya bilmirəm və məni başdan elədi”.
M.Muradova mərkəzdə işləyən Lalə Səlimova adlı həkimdən də şikayətçidir: “Həkim müayinəyə baxaraq dedi ki, yorğunam, heç nə yaza bilmərəm. Görəsən dövlət xəstəxanalarında işləyən bu cür həkimlər xəstələnib eyni rəftara tuş gəlsələr, necə olar?”
Oxucunun şikayəti ilə bağlı mərkəzin direktoru Rauf Cabbarovla əlaqə saxladıq. O, M.Muradova adlı xəstənin göstərilən tarixdə klinikaya gəlmədiyini söylədi: “Mən bütün qeydiyyat vərəqələrini qaldırıb araşdırma apardım. Bu adda xəstə bizim xəstəxanaya gəlməyib. Bu şikayət məktubunun arxasında nə ola bilər, anlaya bilmirəm”.

Nailə RÖVŞƏNQIZI

1066 dəfə baxılıb