RADARA DÜŞƏN SÜRÜCÜ CƏRİMƏNİ NECƏ ÖDƏMƏLİDİR

	13 fevral 2012


Onlayn ictimai-siyasi qəzet

Oxucu poçtu

RADARA DÜŞƏN SÜRÜCÜ CƏRİMƏNİ NECƏ ÖDƏMƏLİDİR?

2009-09-08

Son aylar redaksiyamıza yollara qoyulmuş radarlarla bağlı çoxsaylı şikayətlər daxil olmaqdadır. Sürücülər əsasən radara düşərkən cərimələri neçə ödəyəcəkləri ilə maraqlanırlar. Məsələni araşdırmaq üçün Bakı Şəhər Yol Polis İdarəsinin əməkdaşı Ənvər Mirzəyevlə əlaqə saxladıq.

Yol polisi əməkdaşı bildirdi ki, magistral yollarda və Bakı küçələrində qoyulmuş radarlar avtomobillərin hərəkətinə mərkəzləşdirilmiş qaydada nəzarət etmək üçündür: “Məqsəd maşınların hərəkətini izləmək və yol hərəkət qaydalarını pozan maşınları dərhal müəyyənləşdirməkdi. Magistral yollarda və Bakı küçələrində qoyulmuş radarlar qaydanı pozan sürücünü nəzarətə götürür. Sürücünün idarə etdiyi maşının fotosu və dövlət nömrə nişanı dərhal mərkəzə göndərilir. Bundan sonra yol hərəkət qaydalarını pozan sürücünün ünvanı müəyyənləşdirilir və protokol yazılaraq adıçəkilən ünvana göndərilir. Magistral yollarda da radarlara düşən maşınların sürücülərinə eyni qaydada cərimə yazılaraq onların yaşadığı ünvana göndərilir. Bundan sonra cərimə edilən sürücü yaşadığı rayonun polis idarəsinə gələrək müvafiq qaydalar əsasında cəriməsini ödəyir”.
Yol polisinin sözlərinə görə, radara düşən sürücünün yerindəcə cərimə ödəməsi qadağandı: “Magistral yollarda radarlara əsasən sürət həddini pozan sürücülər düşür. Dərhal həmən maşının fotosu və surəti mərkəzə ötürülür. Belə olan təqdirdə bütün məsələlər baş idarənin nəzarətində olur”.
Qeyd edək ki, söylənilənləri bugünlərdə radara düşmüş əməkdaşımız da təsdiqləyib. Deyilənlərlə bağlı ötən gün yaşadığı ünvana çağırış gəldiyini söyləyən həmkarımız cərimə ilə əlaqədar rayon Yol Polisi İdarəsinə çağırıldığını dedi: “Radara düşməyimlə əlaqədar cəriməni yerində ödəmək istədim. Amma yol polisləri imtina etdi”.

SEYMUR

2593 dəfə baxılıb