“SARKOZİNİN MƏKTƏBİ”nin TƏMƏLİNİ SÖKDÜLƏR

	23 may 2012


Onlayn ictimai-siyasi qəzet

Proje

“SARKOZİNİN MƏKTƏBİ”nin TƏMƏLİNİ SÖKDÜLƏR

2011-10-09

Əməkdaşımız Fransız Liseyinin tikiləcəyi ərazidə oldu

Oktyabrın 7-də Bakıda ilk Fransız Liseyinin təməli qoyuldu. Təməlqoyma mərasimində prezident İlham Əliyev, həmin ölkəmizdə səfərdə olan Fransa prezidenti Nikola Sarkozi və Heydər Əliyev Fondunun prezidenti Mehriban Əliyeva iştirak edib. Bir vaxtlar Nobel qardaşlarının yaşadıqları Fəhlə prospektində həmçinin Paris məhəlləsinin də (“Ağ şəhər” hissəsində) salınması planlaşdırılır. Dünən bu əraziyə baş çəkdik.

Bildirək ki, Fransız Liseyi ARDNŞ-nin və Heydər Əliyev Fondunun təşəbbüsü ilə tikilir. Fondun yaydığı məlumatda bildirilir ki, məktəbin tədris planı uşaq bağçasından başlayaraq 12 illik ümumi təhsil müəssisəsində tətbiq edilən klassik fransız tədris planı olacaq. Tədris proqramı Fransa milli təhsil sisteminin tələblərinə uyğun olaraq fransız dilində aparılacaq. Şagirdlərə veriləcək attestat Fransa Milli Təhsil Nazirliyinin standartlarına və tələblərinə cavab verəcək və nazirlik tərəfindən tanınacaq. Həmçinin məktəbin məzunları öz seçimlərinə uyğun olaraq təhsillərini Fransanın istənilən ali təhsil müəssisəsində davam etdirmək imkanı qazanacaqlar. Tikiləcək liseyin stendində nəzər yetirdikdə, məktəbin möhtəşəm tikili olacağı görünür. Ərazini mühafizə edən Dövlət Neft Şirkətinin əməkdaşları deyir ki, məktəbin sragün qoyulan təməli sökülür. Elə biz də orada olarkən bunun şahidi olduq. Gətirilən bütün avadanlıqlar və aparılan tikinti dağıdılırdı. Ərazidə çalışan fəhlələrdən biri isə belə deyir: “Bu tikiliyə nə qədər xərc çəkilib. Nə olsun ki, prezident gələcək. İndi də hamısını uçurub-tökürlər”. ARDNŞ-in əməkdaşlarının sözlərinə görə, tikintini Dövlət Neft Şirkəti aparacaq. Onlar liseyin tikintisinə ayrılan vəsaitin məbləğini bilmədiklərini söylədilər: “Hər halda nəhəng tikili olacaq. Yəqin ki, çox pul xərclənər”. Tikintiyə bu ayın sonundan başlanacağını söylədilər. Onu da öyrəndik ki, podratçı şirkət işləri prezidentlərin təməlqoyma mərasiminə qatılacağı günə qədər başa çatdıra bilmədiyi üçün tez-bazar təməl düzəldib. İndi də həmin təməli sökmək məcburiyyətində qalıblar.

Azərbaycanda Fransız mərkəzlərinin sayı çoxdur. Misal üçün, Viktor Hüqo adına Fransız Dili və Mədəniyyəti Mərkəzi, Fransa Mədəniyyət Mərkəzi, Fransız Resurs və Layihələr mərkəzi və sair.
Azərbaycanda olan Fransız dili müəllimləri isə bu mərkəzin açılmasını müsbət hal kimi qiymətləndirir. Viktor Hüqo adına Fransız Dili və Mədəniyyəti Mərkəzinin mütəxəssisi deyir ki, burada tələbələrə və Fransız dilini öyrənənlərə Fransanın tarixi, mədəniyyəti və siyasi sistemi öyrədilir: “Fransanın dövlət, mədəniyyət və elm xadimləri ilə görüşlər təşkil olunur. Belə tədbirlər xalqlar arasında qarşılıqlı dialoqun inkişafına, hər iki xalqın mədəniyyətini daha yaxından tanımağa imkan yaradır. Bu baxımdan həmin liseyin açılması təqdirəlayiqdir. Burada həmçinin Fransa vətəndaşları da oxuya biləcəklər”.
Qeyd edək ki, Fransız mərkəzləri Türkiyə və digər ölkələrdə də var. Ancaq bəzi təhsil ekspertləri deyir ki, əvvəlcə milli məktəblərə diqqət artırılmalı, tədris bazası gücləndirilməlidir. Çünki hazırda Bakıda təmirsiz məktəblərin sayı kifayət qədərdir.

Günay MUSAYEVA

1930 dəfə baxılıb