ƏMƏKDAŞLARIMIZ HACIQABULDA PROBLEMLƏRİ ARAŞDIRDI

	23 may 2012


Onlayn ictimai-siyasi qəzet

Proje

ƏMƏKDAŞLARIMIZ HACIQABULDA PROBLEMLƏRİ ARAŞDIRDI

2011-12-15

Rayon icra hakimiyyətinin mətbuat xidmətinin rəhbəri Əsabir Məmmədov: “Hacıqabul 4-5 il əvvələ kimi ucqar bir qəsəbə kimi idi, son vaxtlarsa artıq şəhərə çevrilib”

Son aylar Hacıqabul rayonu mətbuatın gündəmindən düşmür. Rayonda gedən abadlıq-quruculuq işləri çərçivəsində büdcədən yeyintiyə yol verildiyi, hətta pul silmək üçün avtomobil yollarına metlax vurulması haqda xəbərlər dərc olunmuşdu. Hacıqabulun icra başçısı Əhməd Muxtarov “Yeni Müsavat” qəzetində də tənqid olunmuşdu.

O yazıların birində qeyd olunurdu ki, başçı quruculuq işləri adı altında səkilərə metlax vurdurur. Kvadratmetri 5-6 manat olan metlaxı kağız üzərində 40-50 manata qədər şişirdib yolların kənarlarına döşətdirir. Dünyanın heç yerində isə maşın yoluna metlax vurulmasına rast gəlinməyib. Məqalədə deyilirdi ki, dəmiryol stansiyasına gedən yola da metlax döşənir. Habelə rayonun sosial problemlər məngənəsində boğulduğu, işsizlik, kommunal çətinliklərin mövcudluğu deyilirdi.

Ancaq icra başçısı və rayonda görülən işlərlə bağlı yazılanlara indiyə qədər rəsmi şəkildə münasibət bildirilməyib. Biz də “Yeni Müsavat” olaraq yayılan məlumatlara aydınlıq gətirmək məqsədilə ötən gün Hacıqabulda olduq. Əhalinin problemləri ilə yaxından tanış olduq, rayonda hansı abadlıq işlərinin getdiyini araşdırdıq.
Ondan başlayaq ki, bizə bələdçilik edən Hacıqabul Rayon İcra Hakimiyyəti (RİH) mətbuat xidmətinin rəhbəri Əsabir Məmmədov rayon haqda xeyli məlumat verdi. O, öncə rayondakı işsizlik problemindən danışdı. Dedi ki, Hacıqabulda son 6 ildə 1850 iş yeri açılıb: “Onun 1609-u daimi iş yeridir. Rayonda 428 fərdi ev tikilib, 42 kommersiya obyekti inşa olunub. Əvvəla, Hacıqabul 4-5 il əvvələ kimi ucqar bir qəsəbə kimi idi. Son vaxtlar isə bura artıq şəhərə çevrilib. Büdcəmiz də rayonlar arasında ən az büdcəsi olan rayonlardandır. Buna baxmayaraq, ötən 5 ildə 9 yeni məktəb tikilib, 25-ə yaxın zavod, emal müəssisəsi, 5 mərtəbəli yaşayış evi, şəhid və əlil ailələri üçün 16 mənzilli bina istifadəyə verilib. Gömrük, polis, prokurorluq binaları yenidən tikilib, mədəniyyət evi yenilənib, tamaşa zalı müasir standartlara uyğunlaşdırılıb”.

Ə.Məmmədov kommunal problemlərdən də söz açdı: “Rayonun 30 kəndində birpilləli qaz təminatı sisteminin çəkilişi davam edir. Artıq 9 kəndə qaz verilib. Rayonda isə qaz problemi yoxdur. Əhalinin 25 faizi fasiləsiz, qalan hissəsi isə fasilələrlə içməli su ilə təmin olunur”.
Sonra Ə.Məmmədovla birgə metlax döşəndiyi deyilən ərazilərə baxış keçirdik. Müsahibimizin sözlərinə görə, metlaxın kvadratmetri 5-6 manatdır: “Metlaxın vurulmasının 40-50 manata başa gəlməsi şişirdilmiş rəqəmdir. Əslində meydan və parkların səkilərinə döşənən metlaxın hər kvadratmetri 50 manat yox, 16 manat 93 qəpikdir. Həmin tametin 1 kvadratmetrinin alış qiyməti 10 manatdır. Onu da deyim ki, Heydər Əliyev küçəsinə tamet döşəməyə başlamışdıq. Hətta 10 metrə qədər yerə tamet vurulmuşdu. Sonra isə bizə xəbər verildi ki, küçənin kanalizasiya xətləri yenilənəcək. Ona görə də iş dayandırıldı. Vurulmuş tamet də söküldü. İş olan yerdə hansısa problemlər də olmamış deyil. Biz gözləyirik ki, kanalizasiya xətləri yenilənsin və həmin küçəni bağlayıb oranı dəmiryol vağzalına kimi park edəcəyik”.

Həmin küçədə görülən işlərin aidiyyəti olmayan bir quruma verilməsi barədə iddialara gəlincə isə Ə.Məmmədov bununla razılaşmır: “Belə deyil, tametlərlə üzləmə işləri tenderin qalibi olmuş ”Uğur-2011" MMC və “Təmir-İnşaat” tərəfindən həyata keçirilir. Şəhərdəki işıqlandırma işlərini 50 saylı yol idarəsinin müdiri Firqət Qubanov yox, “Sahil Servis-R” MMC icra edir".
Rayonun İsmət Qayıbov, Məhəmməd Əsədov küçələrinin kənarına hasarların çəkilməsinin şahidi olduq. Ə.Məmmədov deyir ki, bu hasarların çəkilməsi heç də sahibkarların obyektlərinin fəaliyyətinə əngəl törətmir. Divarlar hörüləndə sahibkarların razılığı alınıb. Büdcədən yolların asfaltlanması üçün ayrılmış 400 min manatın pay-püş edilməsi haqda ittihamlara cavab verən Ə.Məmmədov iddia edir ki, yol tikintisinə 380,1 min manat sərf olunub.

Müşahidələrimizə əsasən deyə bilərik ki, rayondakı kənar küçələr, ara məhəllələrin yolları diqqətdən kənarda qalıb. Bu ərazilərin yolları palçıq içində, baxımsız vəziyyətdədir. RİH nümayəndəsi gələcəkdə bu işlərin də görüləcəyini dedi.

“Yeni Müsavat”ın reportyor qrupu Bakı-Hacıqabul

792 dəfə baxılıb