FALÇI 40 MANATA MÜXBİRİMİZİN BƏXTİNİ AÇDI

	16 mart 2010


Onlayn ictimai-siyasi qəzet

Proje

FALÇI 40 MANATA MÜXBİRİMİZİN BƏXTİNİ AÇDI

Baxıcı Fatma: “Məleykə Əsədova ilə Brilliant Dadaşova mənim yanıma gəlir”

İnsanlar ta qədimlərdən falçılara, öncəgörənlərə maraq göstərib. Kimin işi çətinə düşəndə, çıxılmaz vəziyyətlə üzləşəndə falçıya üz tutur. Hətta tanınmış simalar da bu baxıcıların xidmətindən geniş istifadə edirlər. Maraqlıdır ki, Allah tərəfindən vergi aldığını, insanların taleyi haqda əvvəlcədən məlumat verməyi bacardıqlarını iddia edənlər indi onları falçı adlandıranda qəzəblənirlər. Özlərinə təzə ad qoyublar: öncəgörənlər.

İslama görə, fala baxmaq böyük günahlardan olduğu kimi, fala baxdırmaq və falçı yanına getmək də günah sayılır.
Amma günümüzdə ən kiçik bir problemə görə falçı yanına qaçan insanlarımız yetərincədir. Maşallah olsun falçılar da, fəaliyyətlərini əməlli-başlı genişləndiriblər. Biz də fala baxdırdıq. Lakin bu, dini cahilliyimizdən yox, jurnalist marağımızdan irəli gələn bir addım oldu. Üz tutduğumuz baxıcı Fatmanın yanına bizdən əvvəl oğlunun bəxtini açdırmaq üçün iki valideyn də gəlmişdi. Bakının Zabrat yolu deyilən ərazisində yaşayan Fatma xanım özünü mahir öncəgörücü hesab edir. O, bizdən əvvəlki müştərilərinə bir çox şeylər üçün əməl-dua yazmışdı və onlardan istifadə qaydalarını göstərirdi. Məsələ isə belə idi ki, həmin adamların oğlu bir qadına vurulub, daha sonra ayrılmaq istəyib. Həmin qadın da oğlana əməl etdirib ki, evlənməsin. Əməldən sonra da oğlan xəstələnib, müalicə olunmalıdır. İndi valideynlər baxıcıdan “imdad” diləyirlər. Fatma xanım isə öz “mərhəmətini” bəxtsiz cavandan əsirgəmək fikrində deyil: “Bu duanı pencəyin içinə tikin, mütləq ya qara rəngli, ya da tünd göy rəngli parçaya tikilməlidir. Qadından ayrılması üçün bu duanı qıfılla bağlamışam, dənizə atılmalıdır. Dua xristian qəbiristanlığında qəbrin ayaq ucunda basdırılmalı, 20-30 il orda qalmalıdır. Ruzi üçün yazılmış duanı bar verən ağacın dibində basdırın. Bu paltarı əslində geyinməlidir, amma əmələ-duaya inamı olmadığı üçün balışının altına da qoysam olar, amma gərək xəbəri olmasın. Yolunun açılması, evlənməsi də marta düşür”.

“Xəstələri müalicə edirəm”

“Belə xəstələri müalicə edə bilərsinizmi” sualına isə baxıcı Fatmanın cavabı olduqca maraqlı oldu: “Bu oğlana xristian baxıcı əməl edib. Mənim də rus tanışım var, ona görə rusa müraciət elədim, həmin əməli o açdı. İndi o da gəlib Biləcəriyə, qızı əməliyyat olunub. Mən bu oğlanın işini verdim ona, əməli o açdı. Ona pulu ayrı verirəm, müştərinin verdiyi puldan mənə on-iyirmi manat pul qalır. Həmin pulun da iyirmi manatını taksiyə vermişəm, onlar nəsə hədiyyə versə mənə qalan o olar”.
Baxıcının burda da müştəriləri var, İsmayıllıda da: “Mən çox qazanmaq üçün belə pis şəraiti olan evdə qalıram. Ay ərzində on beş gün burda, on beş gün rayonda qalıram. Rayonda olub Bakıya gələ bilməyənlər üçün rayonda baxıram”.

Baxıcımız tanışlarını “KQB”yə işə düzəldə bilir

Biz falçının yanında olanda ona Validə adlı tanışı zəng vurmuşdu. Telefonla nə barədə danışdıqlarını xəbər aldım: “Mənim bir müştərim var ”KQB" də işləyir. Mən ona dua yazıram. Orda makinaçı işləyir, istəyir ki, onu da “KQB”yə buğalteriyaya işə düzəltsinlər. Mən də dedim ki, mənim bir yaxın adamım var, gəl deyim səni işə düzəltsin".
Fatma xanımın qarşısında əyləşib falıma baxdırıram. Fala baxdırmağa həvəsli olduğumu deyir: “Amma əmələ-duaya inanan deyilsən”. Baxıcı bir “qara xəbəri” üzümə deməkdən çəkinmir: “Sənə nikah görmürəm, bəxtində bağlılıq var”. Fatma xanım məni eqoist çıxarmağı da unutmadı. Dediyinə görə, mən hər adamı bəyənən deyiləm. Nəhayət bir xoş xəbər: mənə adı beş hərfdən ibarət bir oğlanın elçi gəlmək istədiyi Fatma xanıma agah olub. Sadəcə olaraq bəxtim bağlıdır. Yəqin baxıcı xanım bir azdan bəxtimi açmaq üçün “şirinlik” istəyəcək. Heç demə, vaxtilə anamın da bəxtini bağladıblarmış. Maraqlıdır, görəsən, anamın bəxtini hansı falçı “açıb”?

“40 manata bəxtini açaram”

Bu barədə düşünərkən bayaqkı ehtimalım özünü doğruldur. Falçı Fatma bəxtimi açmaq üçün məndən pul istəyir. Özü də cəmi 40 manat: “Əlavə bir dənə köynək, bir də şəkil lazım olacaq. Müsəlman işlərini və bəxt işlərini özüm işləyirəm. Amma mənə bir milyon da versələr pis iş görmürəm. Mənə verəcəyin 40 manatın 30 manatı əmələ qoyacağım şeylərə gedəcək, əmək haqqı olaraq oradan mənə 10 manat çatacaq. Köynəyi əyninə geyəcəksən, sonra yumadan yeddi yerə parçalayıb, hər birini bir yola atırsan, yolun açılır. Nal verərəm sənə, üç yol ayrıcına basdırırsan, duanı qırmızı parçaya tikib, üstündə saxlayarsan. Mumiyanı yazacağam ki, bar verən ağacın dibində basdırarsan, oğlanın elçi gəlməsi üçün isə evdə dua saxlayarsan”.

Jurnalistdən də müəllim olar?!

Falçı insanların peşəsini, kimliyini də müəyyənləşdirmək bacarığına malik olduğunu iddia edir. Lakin mənim ixtisasım deyəsən onu çaşdırır: “Əvvəllər tibb sahəsinə maraqlı olmusan, amma indi dil müəlliməsi olaraq görürəm səni. Hələ ki, oxuyursan, işləməyinə çox var”.
Baxıcı Fatmaya sual verəndə ki, tanınmışlardan yanınıza kim gəlir, olduqca məşhur müğənnilərin adını çəkdi: “Gəlib-gedənim çox olur. İndi ona görə adam azdı ki, mən bu vaxtlar adətən rayonda oluram. İndi təsadüfən burdayam. Sabah rayona gedirəm. Müğənnilərdən Məleykə Əsədova yayda yanımda olub. Brilliant Dadaşova da yanıma gəlirdi, mən onun ”CİP" maşınında da oturmuşam. Brilliantın bir rəfiqəsinin “İçəri Şəhər” metrosu tərəfdə evi var, mən onun evində də olmuşam".
Bu projemiz bizim bir daha falçılara inanmamaqda haqlı olduğumuz sübut etdi. Çünki yanında yarım saatdan çox olmağıma baxmayaraq, Fatma xanım jurnalist olduğumu və onun yanına nə üçün getdiyimi bilə bilmədi.

Şahnaz NOVRUZQIZI

2707 dəfə baxılıb

[15.03.2010] - DÜNYANIN YEDDİ NEFT MAQNATINDAN BİRİNİN KƏNDİ - BALAXANI

[08.03.2010] - MÜXBİRİMİZ ŞƏHƏRİN MƏRKƏZİNDƏ GÜL SATDI

[04.03.2010] - XARİCDƏN GƏTİRİLƏN AĞACLAR XƏSTƏLİK YAYIR

[01.03.2010] - TARİXİN SİRR ÜZÜ - ƏMİRCAN KƏNDİ

[28.02.2010] - BAKI KİNOTEATRLARI ÇAYXANAYA VƏ OYUN ZALLARINA ÇEVRİLİB

[27.02.2010] - MÜXBIRİMİZ “CİNLƏR DİYARINDA”

[24.02.2010] - ERMƏNİ VƏHŞİLİYİNİ TABLOYA KÖÇÜRƏN RƏSSAM

[29.01.2010] - FALÇI 40 MANATA MÜXBİRİMİZİN BƏXTİNİ AÇDI

[18.01.2010] - “HAMAMIN İÇİNDƏ, İÇİNDƏ VƏ ÇÖLÜNDƏ...”

[23.12.2009] - KİRAYƏLƏRDƏ QOCALAN GƏNC AİLƏLƏR