HAMBURQ - BİSMARKIN VƏ MİRZƏ SAKİTİN ŞƏHƏRİ

	13 fevral 2012


Onlayn ictimai-siyasi qəzet

Proje

HAMBURQ - BİSMARKIN VƏ MİRZƏ SAKİTİN ŞƏHƏRİ

2010-05-24

Xəbər verdiyim kimi, Almaniyanın Hamburq şəhərinə səfərimiz azərbaycanlı jurnalistlər Şahvələd Çobanoğlu və hazırda qazamatda saxlanılan Emin Milli və Adnan Hacızadənin Herd Buserius adına “Şərqi Avropada azad söz” ödülünün təqdimatı ilə bağlı idi. Ancaq girişdə Hamburq şəhəri haqda bəzi qeydləri yazmağın yeri var. Bu şəhər Almaniya Federativ Respublikasında müstəqil şəhər-dövlət statusuna malikdir, federasiyanın 16 subyektindən biridir. Tarixə görə, 19-cu əsrdə Almaniyanın birləşdirilməsində, dövlət kimi formalaşmasında xüsusi rol oynamış Otto fon Bismark Hamburqu çox sevirmiş; elə şəhər-dövlət statusunu da Hamburqa o verib.

Şəhər qədim kilsələrlə doludur Hamburq parlamentinin binası

Bismark istefaya çıxandan sonra da bu şəhərin ətrafındakı evdə yaşayıb. Hazırda şəhərdə Bismarkın heykəli var, bir də Hamburq dükanlarında “Bismark” adlı su satılır.
Hamburq sözünün anlamı “ham” - çay sahili və “burq” - qala sözlərindən yaranıb. Maraqlıdır ki, buradakı “burq” sözü ərəbcədən bizim dilimizə keçmiş “bürc” sözü ilə eyni mənadadır. Şəhərin öz gerbi və himni var. Gerbdə şəhər qalasının qapısı təsvir olunub, ona görə almanlar Hamburqu “dünyanın qapısı” adlandırır. Nəzərə alsaq ki, Hamburq Avropanın ən böyük liman şəhərlərindən biridir, bu söz təsadüfən deyilmir. Şəhərin deviz-şüarı isə belədir: “Əcdadlarımızın bizim üçün qazandığı azadlığı qoy gələcək nəsillər şərəf və ləyaqətlə qorusun”. Bizim Azərbaycanda şüarı belə cümlə olan şəhər təsəvvür etməyə çalışın...

Hamburqda südün litri bizim pulla 50 qəpikdir Alman polisi ilə şəkil çəkdirmək də xoşdur

Sovet adamlarının yaxşı tanıdığı alman kommunisti Ernest Telman Hamburqda doğulub. Bundan başqa, Hamburq dahi bəstəkarlar İohan Bramsın və Feliks Mendelsonun da (bu bəstəkar məşhur “Toy marşı” ilə hamıya tanışdır) vətənidir. 20-ci əsrin musiqisinə silinməz təsir buraxmış məşhur ingilis qrupu “Bitlz” isə ilk musiqi çalışmalarına məhz burada, Hamburqda başlayıb.
Əlbəttə, çoxlarının yanlış olaraq Amerika mətbəxinin kəşfi saydığı hamburgerin də vətəni Hamburqdur.

Şəhərdən mənzərə Burda qazlar da azaddır

Ümumiyyətlə, şəhərdə tarixi irsə örnək götürüləsi münasibət var. Burada heç kəsin ağlına gəlmir ki, Hacıbala kimi alət götürüb qədim kilsə və qalaların divarlarını qaşısın. Şəhərdə hündür binalar əsasən kənarlarda tikilib.
Hər yerdə alman dəqiqliyi, qayda-qanuna alman hörməti hiss olunur. Hamburq haqda daha səyahət tonunda bir şeylər yazmaq istəmirəm, indi hər kəs internetdən bu məlumatları əldə edə bilər. Nadir hallarda rastına çıxan polisin üzügülərliyi, velosiped sürənlərin çoxluğu, yerli maaşla nisbətdə dükanlardakı ucuzluq və sairə - bu, indi Avropanın az qala hər yerində belədir.

Şahvələd Çobanoğlu çıxış edir Mirzə Sakit

Şərqi Avropadan - Rusiya, Gürcüstan, Azərbaycan, Belarus və Ermənistandan gəlmiş jurnalistlərə mükafat Hamburq parlamentinin binasında verilirdi. Yeri gəlmişkən, bu parlamentin deputatları yalnız günün yarısı yığışırlar, o biri yarısında hər kəs öz ilk peşəsi ilə məşğuldur. Məsələn, deputatlar arasında bir elektrik də var. Vitse-spikerlərdən biri isə Haqverdi soyadlı türkdür. Təqdimat mərasimində yerli parlamentin rəhbərliyi də iştirak edirdi və Şahvələd Çobanoğlunun yekun sözü ilə, bütün mükafatçılar adından tək çıxış etməsi, çıxışın çox bəyənilməsi bizi qürurlandırdı.
Hamburq azərbaycanlıları Mədəniyyət Mərkəzinin sədri, 13 ildir Almaniyada yaşayan Azər Rövşənlə görüşümüz də yadda qalan oldu. Azər bəyin ürəyi daim Azərbaycanla döyünür, bunu pafosla yazmadığımı bilməyiniz üçün onun vetenim.azersayt.com adlı internet bloquna baxmağınız yetər.
Satirik şair Mirzə Sakitin də hazırda Hamburqda yaşadığını yazmışdıq. Mirzə burada ikiotaqlı evlə təmin edilib, almanca öyrənir, ancaq çox sıxıntı çəkdiyini qüssə ilə yazıram. Biz Mirzənin evində olanda o internetlə Bakı ilə əlaqə saxladı, məlum oldu ki, azərbaycanlı məmurlar onun Böyük Şordakı evinə gedən qaz xəttini yenidən kəsiblər. Halbuki Almaniya onu hər cür kommunal xərcdən azad edib. Bizdən hava limanında ayrılanda Mirzənin ağlaması qürbətin nə olduğunu deyirdi.
3 günlük Hamburq səfərindən yadıma düşənlər hələlik bunlardır.

Zamin HACI

2228 dəfə baxılıb