ZƏNGİLAN ƏRAZİSİNDƏ ŞƏHƏR SALMAQ AVANTÜRASI ERMƏNİLƏRDƏ DƏ ETİRAZ DOĞURDU

	23 may 2012


Onlayn ictimai-siyasi qəzet

Qarabağ xəbərləri

ZƏNGİLAN ƏRAZİSİNDƏ ŞƏHƏR SALMAQ AVANTÜRASI ERMƏNİLƏRDƏ DƏ ETİRAZ DOĞURDU

2011-11-17

Bakıdan və Sumqayıtdan gedənlər bu ideyanı pisləyir: “Biz başqa ölkəyə köçərik, amma o şəhərdə yaşamarıq”

Ermənilərin Azərbaycanın işğal edilmiş ərazilərində şəhər salmaqla bağlı ötən həftə İrəvanda ortaya atdıqları avantürist ideya elə ermənilərdə də etiraz doğurub. Vaxtilə Bakıdan və Sumqayıtdan köçən ermənilər deyirlər ki, onlar heç cür bu şəhərdə yaşamazlar və başqa ölkəyə köçməyi daha üstün tutarlar. Xatırladaq ki, ötən həftə İrəvanda Azərbaycandan olan erməni qaçqınlarının üçüncü qurultayı zamanı işğal altında olan Zəngilan rayonu ərazisində, Həkəri çayının sahillərində 20 min kvadratkilometr ərazidə “Baqaran” adlı yeni şəhər salmaq layihəsi təqdim olunub.

İdeya müəlliflərinə görə, bu şəhərdə Azərbaycandan olan erməni qaçqınlar kompakt şəkildə məskunlaşdırılmalıdır. İddialara görə, şəhərin tikintisi üçün artıq 350-yə yaxın erməni iş adamı maliyyə ayırmağa hazırdır. Ermənistanın indiki iqtisadi imkanları fonunda ideya nə qədər fantastik görünsə də istənilən halda düşmənin işğal altındakı ərazilərdə möhkəmlənmək üçün avantürist planlar üzərində işlədiyini təsdiq edir. Xatırladaq ki, ermənilər Kəlbəcər rayonunu Göyçə ilə birləşdirmək üçün yol çəkilişinə də başlayıb. Bu yolun açılması ilə Kəlbəcərə daha çox erməninin köçürülməsi planlaşdırılır.
“Kavkazskiy uzel” saytının yazdığına görə, Xankəndindəki Qarabağın erməni qaçqınları ictimai təşkilatının sədri Saro Saroyan İrəvanda təqdim olunan layihəni “siyasi baxımdan düşünülməmiş səhv addım” adlandırıb. Onun sözlərinə görə, qaçqınların öz yaşayış yerlərini yenidən dəyişməsi ehtimalı çox azdır. “Bir çoxları Rusiyaya və daha uzaqlara gedib, orada məskunlaşıblar. İnanmıram ki, onlar yeni tikilməyə başlayan şəhərdə yaşamağa razılaşarlar. Əgər onları Şuşada və Stepanakertdə yaşamağa dəvət etsələr, başqa məsələ. Qarabağda və Ermənistanda məskunlaşanlar isə vaxtilə Bakı, Sumqayıt, Gəncədən gələnlərdir. Bu insanlar da şəhərdən uzaqda yaşamağa razı olmazlar” deyə o bildirib. Saryanın fikrincə, yeni şəhər tikmək ideyası cəmiyyətdə parçalanmaya səbəb olacaq, onu yerlilərə və qaçqınlara böləcək: “Bundan əlavə, mən istisna etmirəm ki, beynəlxalq instansiyalar işə qarışıb azərbaycanlı qaçqınları da ora yönəldərək deyəcək ki, bir halda ki, hamınız qaçqınsınız, onda bir yerdə yaşayın”.
Digər erməni qaçqın təşkilatının təmsilçisi, Sumqayıtdan olan Ruzanna Avakyan isə yeni şəhər ideyasına qəzəbli reaksiya verərək deyib ki, şəxsən o heç vaxt bu şəhərdə yaşamazdı: “Hətta mənə ev və iş versələr də getmərəm. Azərbaycanla sərhəddə yaşamaq istəmirəm, oraya köçməkdənsə beynəlxalq təşkilatlara müraciət edərəm ki, məni başqa ölkəyə köçürsünlər”. R.Avakyana görə, bu layihə göstərir ki, erməni qaçqınlarını məskunlaşdıqları yerlərə layiq bilmirlər: “Əgər bizə ayrıca şəhər lazım olsaydı çoxdan tələb eləmişdik ki, Rusiyanın harasındasa şəhər tiksinlər və hamımız ora köçüb gedərdik”. Xatırladaq ki, Azərbaycan tərəfi ermənilərin işğal edilmiş ərazilərdə şəhər salmaq ideyasını hələlik XİN sözçüsü səviyyəsində pisləyib.

F.MƏMMƏDOV

6279 dəfə baxılıb