KXCP-nin MƏRKƏZİ SEÇKİ QƏRARGAHI YARADILDI

	23 may 2012


Onlayn ictimai-siyasi qəzet

Siyasət

KXCP-nin MƏRKƏZİ SEÇKİ QƏRARGAHI YARADILDI

2012-01-31

Mirmahmud Mirəlioğlu özünə yeni müavin təyin etdi

KXCP Ali Məclisinin sessiyası keçirilib. Partiyanın mətbuat xidmətindən verilən məlumata görə, sessiyanın təşkilati məsələlər üzrə bölümündə partiya sədrinin təqdimatı ilə Qaya Əliyevin KXCP sədrinin beynəlxalq məsələlər üzrə müavini vəzifəsinə namizədliyi irəli sürülüb və məsələ müsbət həll olunub. Ali Məclis Qaya Əliyevi KXCP sədrinin beynəlxalq məsələlər üzrə müavini vəzifəsinə təsdiq edib.

Sonra KXCP Ali Məclisinin “İnsan haqları və demokratiya” komissiyasının tam tərkibinin formalaşdırılması Ali Məclis rəhbərliyinə tapşırılıb. Həmçinin sosial iqtisadi siyasət komissiyası yaradılması və Şahin Vəliyevin komissiyanın sədri seçilməsi qərarı verilib.
Sessiya KXCP Mərkəzi Seçki Qərargahının 9 nəfərdən ibarət tərkibini seçib. Qərargaha sədrliyi KXCP sədrinin seçki məsələləri üzrə müavini Ədalət Yusub edəcək.
Sessiyanın sonunda Ali Məclis ölkədəki ictimai- siyasi vəziyyət, hökumətin yürütdüyü siyasətlə bağlı bəyanat qəbul edib. Bəyanatda Fransa Senatının qondarma “erməni soyqırımı”nı tanımayanlara cəza tətbiq edilməsi haqqında qəbul etdiyi qanunla bağlı Azərbaycan hökumətinin zəif mövqe ortaya qoyması pislənilir. Sənəddə son günlər havaların kəskin soyuması, yağan yağış və qarın Bakı da daxil olmaqla, bütün ölkəni iflic vəziyyətə salması, hökumətin təsirli tədbirlər görməməsi onun yarıtmaz, xalqa zidd siyasəti ilə izah olunur. Ölkədə insan haqlarının ağır vəziyyətdə olması, siyasi məhbusların hələ də azadlığa buraxılmaması, mülkiyyət hüquqlarının kobud şəkildə tapdanması, mediaya hücumların səngiməməsi qeyd olunaraq vəziyyətin normallaşması üçün hökumətin konkret addımlar atması tələb olunur.
Bəyanatda İctimai Televiziyadan müstəqil, müxalif fikirlərə efir vaxtı ayrılması tələbi də əksini tapıb.

E.SEYİDAĞA

275 dəfə baxılıb