RƏSUL QULİYEVİN ADAMI AYAZ MÜTƏLLİBOVA CAVAB VERDİ

	23 may 2012


Onlayn ictimai-siyasi qəzet

Siyasət

RƏSUL QULİYEVİN ADAMI AYAZ MÜTƏLLİBOVA CAVAB VERDİ

2012-02-04

“İnanmıram ki, Rəsul müəllim bu hakimiyyətdən kiminləsə gizli əməkdaşlıqda olsun”

“Rəsul Quliyev kiməsə, nəyəsə arxalanıb 2013-cü ildə keçiriləcək prezident seçkilərində qələbə qazanacağı barədə bəyanatlar verirsə, bu, onun öz işidir. Mən bu işlərə qarışmıram. Ancaq bu cür bəyanatları vermək üçün Azərbaycana gəlib ölkənin siyasəti ilə məşğul olmaq lazımdır”. Bu barədə Azərbaycanın eks-prezidenti Ayaz Mütəllibov "SalamNews"a müsahibəsində bildirib.

Özünün Azərbaycana nə zaman qayıdacağına gəlincə, eks-prezident deyib ki, Azərbaycana gəlişi keçmiş prezidentlər haqqında qanunun qəbulundan asılıdır: “Qanun layihəsi ikinci oxunuşda qəbul edilib və üçüncü oxunuşda qəbul edilməsini gözləyirəm. Azərbaycana gələndən sonra isə 2013-cü ildə keçiriləcək prezident seçkilərində iştirak etməyəcəm”.
A.Mütəllibovun R.Quliyevin barəsində dediyi fikirlərə eks-spikerin lideri olduğu Açıq Cəmiyyət Partiyasının Ali Məclisinin sədri Dayandur Qəmbərli “Yeni Müsavat”a açıqlamasında cavab verib. D.Qəmbərli bildirdi ki, A.Mütəllibov R.Quliyevin Azərbaycanda böyük nüfuzunun olmasından xəbərdardır, sadəcə, müəyyən məsələlərə görə onu dilə gətirmir: “Rəsul Quliyev Azərbaycan xalqının ona olan inamına, hörmətinə arxalanır. Ona görə də əminliklə bəyan edir ki, 2013-cü ildə prezident seçiləcək. Rəsul müəllim bəzilərindən fərqli olaraq hətta ölkəsində yaşamaya-yaşamaya da siyasət meydanında lider kimi qəbul olunan, siyasi gündəmdən düşməyən siyasətçidir. Bunu hər adam bacara bilməz. O, xalqına və bacarığına inanır, arxalanır. Verdiyi inamlı bəyanat da bundan irəli gəlir”.
Ali Məclis sədri onu da dedi ki, R.Quliyevin hərəkat yaratmasının, son vaxtlar daha da aktivləşməsinin arxasında hakimiyyətdəki güclü qruplaşmalardan birinin dayandığı barədə deyilənlər doğru deyil: “Rəsul müəllimin xarakterinə bələdəm. Mən onu separat danışıqlara gedən adam kimi tanımıram. İnanmıram ki, Rəsul Quliyev bu hakimiyyətdən kiminləsə gizli əməkdaşlıqda olsun. O, hakimiyyətə xalqının və özünün gücünə arxalanıb gəlmək iddiasındadır, hansısa məmurun dəstəyi ilə yox”.
D.Qəmbərli 2013-cü il prezident seçkilərində R.Quliyevin Azərbaycanda olmasının istisna edilmədiyini dedi.

Etibar SEYİDAĞA

1921 dəfə baxılıb