HAKİMİYYƏT MÜSAVATA CAVABI GECİKDİRİR

	23 may 2012


Onlayn ictimai-siyasi qəzet

Siyasət

HAKİMİYYƏT MÜSAVATA CAVABI GECİKDİRİR

2012-02-06

Partiyanı qeyri-müəyyən vəziyyətdə qoymaq istəyirlər

Müsavat Partiyasının qurultayına bir aydan az vaxt qalıb. Martın 3-4-də keçirilməsi planlaşdırılan qurultaya Bakı Əl Oyunları İdman Sarayının ayrılması üçün Bakı Şəhər İcra Hakimiyyətinə Müsavat Partiyasının göndərdiyi müraciətə isə iki həftə keçməsinə baxmayaraq cavab verilməyib. Belə görünür ki, hakimiyyət cavabı gecikdirməklə Müsavatı qeyri-müəyyən vəziyyətdə qoymaq və qurultay hazırlıqlarına mənfi təsir etmək istəyir. Müsavat başqanının müavini, qurultaya hazırlıq komitəsinin üzvü Gülağa Aslanlı bildirdi ki, meriyadan hələ də cavab gözləyirlər.

Cavab mənfi olacağı halda hansı alternativləri tərcih edəcəkləri məsələsinə gəlincə isə G. Aslanlı dedi ki, bu məsələ yalnız meriyanın cavabından sonra müzakirə oluna bilər: “Müsavatın qurultayında, qonaqlarla birlikdə, təxminən 1000 nəfərin iştirakı gözlənilir. Ona görə də məkan seçimində biz bunu nəzərə almışıq. Bakı Şəhər İcra Hakimiyyəti də bu məsələləri nəzərə almalıdır”. G.Alanlı qurultaya hazırlıq işlərinin davam etdiyini və yüksək səviyyədə qurultay keçirəcəklərini dedi.
Qurultaya hazırlıqla yanaşı Müsavat üzvləri arasında İsa Qəmbərin partiyanın başqanı postunda qalması və bunun nizamnamə pozuntusuna yol verilmədən reallaşdırılması istiqamətində müzakirələr də gedir. İsa Qəmbərin başqanlıqda qalmasında təkid edənlərin ən optimal variantın formulunu tapdıqları deyilir. Qurultayda həmin variantın tətbiq olunması barədə partiya rəhbərliyindəki bir sıra şəxslər arasında ilkin razılıq əldə olunduğu iddia edilir. Bu variant qurultayın elan olunmuş vaxtda martın 3-4-də keçirilməsini, iki seçkinin Məclis və Mərkəzi Nəzarət Təftiş Komissiyası (MNTK) üzvlərinin seçkisinin qurultayda keçirilməsini, başqan seçkisinin isə bu qurultayda keçirilməməsini nəzərdə tutur. Eləcə də partiya nizamnaməsinə heç bir dəyişiklik edilmir. Qurultay, sadəcə, başqanın səlahiyyət müddətini uzadır. Bununla da İsa Qəmbər 2013-cü il prezident seçkilərinə qədər başqan qalır. Beləliklə, həm Müsavat prezident seçkilərinə İsa Qəmbərin başqanlığı altında gedir, həm də nizamnamə pozuntusuna yol verilmir.
Müsavat Partiyası MNTK sədri İbrahim İbrahimli də bu variantın mümkünlüyünü və onun nizamnamə pozuntusu olmadığını təsdiqləyib.
İsa Qəmbərin bu varianta necə münasibət sərgiləyəcəyi isə hələ ki, məlum deyil.

ETİBAR

820 dəfə baxılıb