İP XALQI HƏRƏKATA QOŞMAQ PLANI HAZIRLAYIB

	23 may 2012


Onlayn ictimai-siyasi qəzet

Siyasət

İP XALQI HƏRƏKATA QOŞMAQ PLANI HAZIRLAYIB

2012-02-07

Sistemli proqramda sosial şəbəkələrdə tələbələrlə xüsusi iş aparılması nəzərdə tutulub

İctimai Palata son sessiyasında “2012-ci ildə İctimai Palata fəaliyyətinin məqsəd və hədəfləri” adlı sənədi qəbul etməklə 2012-ni xalq hərəkatı ili elan edib. Bu isə ortaya suallar çıxarıb. İP xalq hərəkatını hansı resurslarla, nə ilə reallaşdırmağı planlaşdırır? Xalqı siyasi proseslərə necə, hansı siyasi üsullarla qoşacaq?

İctimai Palatanın Koordinasiya Şurasının üzvü, sənədin müəlliflərindən biri Pənah Hüseyn bildirdi ki, 2012-ci ili köklü demokratik dəyişikliklər ili elan edib. Bu köklü dəyişikliklər ili də konkret olaraq “Demokratiyaya keçidin Yol Xəritəsi”ndə nəzərdə tutulan islahatlar proqramı şəklində ortaya qoyulub. Eyni zamanda köklü demokratik dəyişikliklər azadlıqlar və ədalət uğrunda dinc, ardıcıl çoxsaylı kütləvi aksiyalar formasında ümumxalq etiraz hərəkatının başlanması, hazırlanması, təşkili və həyata keçirilməsi 2012-ci ildə İctimai Palatanın fəaliyyətinin başlıca hədəfini təşkil edir: “O cümlədən prioritet vəzifə kimi 2012-ci ildə kütləvi aksiyaların keçirilməsi istiqaməti elan olunub. Bunun üçün kütləvi aksiyalar ideyasının təbliği, aksiyaların ideoloji, psixoloji, siyasi, təşkilati və texniki əsaslarının yaradılması, o cümlədən ərazi və təşkilatlar üzrə strukturlaşdırılmış, mərkəzləşdirilmiş mitinq komitələrinin yaradılması sənəddə istiqamətlərin içərisində yarımistiqamətlər kimi nəzərdə tutulur. O ki qaldı konkret olaraq bu ildə prioritet istiqamət kimi kütləvi hərəkatın elan olunmasının nəyə əsaslanmasına, bu, Azərbaycan cəmiyyətinin bir tərəfdən köklü demokratik dəyişikliklər tələbinin güclənməsi, ikincisi isə avtoritar idarəçilik rejimindən narazılığının kəskin şəkildə artması ilə əlaqələndirilir. Hesab edirik ki, bu, sosial tələbin və narazılığın siyasi, təşkilati ifadəsi kimi İctimai Palatanın özünün istər tərəfdarlarının sayı, istər təşkilati mexanizmlərinin indiki səviyyəsi imkan verir ki, sistemli şəkildə bu iş qurulsun və həyata keçirilsin. O baxımdan, qarşıya qoyulan hədəfə yerinə yetirilməsi mümkün olan bir vəzifə kimi baxırıq. İstinad nöqtəsi əlbəttə ki, ilk növbədə İctimai Palatanın üzvləri və yerli şöbələri olacaq”.
Xalqı prosesə hansı üsullarla qoşmağa gəlincə, P.Hüseyn İctimai Palatanın bu istiqamətdə də proqramının olduğunu dedi: “İctimai Palatanın qəbul elədiyi fəaliyyət planı kompleks proqramdır, sistemli şəkildə bir-biri ilə bağlıdır. Proqramda 12 istiqamət nəzərdə tutulur ki, bunların içərisində milli demokratik qüvvələrin birliyinə nail olmaq önə çəkilir. Digər tərəfdən isə indiki rejimə qarşı çıxış eləyən bütün qüvvələrin birliyinə nail olmaq vəzifəsi qarşıya qoyulub. Bunlar bir-biri ilə bağlı olsa da, həm də fərqli çərçivələri olan məsələlərdir. Bu istiqamətdə ciddi təbliğati, təşkilati işlərin görülməsi və həyata keçirilməsi nəzərdə tutulur. İkincisi, gəncləri kütləvi şəkildə prosesə cəlb etmək proqramda əksini tapır. Hər bir ictimai-siyasi köklü dəyişikliklərin əsas hərəkətverici qüvvəsini gənclik təşkil edir. O baxımdan da demokratik qüvvələrin birliyi ilə yanaşı gənclər hərəkatları ilə aparılan iş və konkret olaraq İctimai Palatanın özünün gənclik qollarının möhkəmlənməsi, fəaliyyətinin gücləndirilməsi nəzərdə tutulur. O cümlədən gəncliyin əsas mütəşəkkil şəkildə mövcud olduğu tələbə gəncliyin rolunun artırılması, prosesə cəlb edilməsi də proqramda nəzərdə tutulur. İstər ənənəvi təşkilatlanma, istər müasir təşkilatlanma forması olan sosial şəbəkələr formasında təşkilatlanma həqiqətən çox ciddi mərhələyə çatmaqdadır. Sosial şəbəkələrdə gənclərlə ciddi iş aparılacaq. Kütləvi hərəkatın hazırlanmasında bunun müsbət təsiri olacaq”.
Həmsöhbətimizin sözlərinə görə, İctimai Palatanın özünün kölgə idarəçilik strukturunun bütün iearxiyalar üzrə yaradılması məsələsi də bu işə xidmət edəcək: “Çünki aparılan hesablamalar göstərir ki, kölgə idarəçilik strukturunun aşağılardan başlayaraq yuxarılara qədər qurulması təxminən 50 min nəfərin bu şəbəkəyə cəlb edilməsini nəzərdə tutur ki, bunların da çoxu potensial kütləvi hərəkatın iştirakçılarıdır. Vətəndaşların mülkiyyət, sosial hüquqları ilə bağlı müdafiə işi də proqramda bu məqsədə də xidmət edir. Bir sözlə, biz bir-biri ilə sıx əlaqədə olan, bir-birini stimullaşdıran bir sistemli fəaliyyəti həyata keçməyi planlaşdırırıq. Bunun nəticələri dinc, kütləvi xalq hərəkatının yaranmasına imkan verəcək”.

Etibar SEYİDAĞA

711 dəfə baxılıb