SABİQ YAP-çı COŞDU | Siyasət

	23 may 2012


Onlayn ictimai-siyasi qəzet

Siyasət

SABİQ YAP-çı COŞDU

2012-02-08

Ariz Abduləliyev: “Azərbaycanın adının dəyişdirilməsinin əleyhinəyəm”

“Azərbaycanın adının dəyişdirilməsi ilə qətiyyən razı deyiləm. Bu təkliflə çıxış edənlər gündəmə gəlmək naminə populist ideyalar səsləndirirlər. Təəssüf ki, bəzi siyasətçilər və deputatlar arasında belə fikirləri səsləndirənlər tapılır. Bizim ölkəmizin adı var. O da Azərbaycandır”.

Bu sözləri Yeni Azərbaycan Partiyasının keçmiş üzvü, “91-lər”in vacib fiqurlarından biri olan Ariz Abduləliyev Azərbaycanın adının dəyişdirilərək Şimali Azərbaycan Respublikası qoyulması təklifinə dair münasibətini bildirərkən deyib.
Qeyd edək ki, Milli Məclisin son iclasında deputat, Bütöv Azərbaycan Xalq Cəbhəsi Partiyasının sədri Qüdrət Həsənquliyevin səsləndirdiyi bu təklifi YAP icra katibinin müavini, deputat Siyavuş Novruzov da dəstəkləyib.
A.Abduləliyev dedi ki, Azərbaycan adına tək coğrafi məkan kimi yanaşmaq olmaz: “Bunun siyasi prosedurları da var. Biz beynəlxalq hüquqi sənədlərə Azərbaycan Respublikası kimi imza atmışıq. Bu problemlər necə olacaq? Mən bu təklifə emosional çılğınlıq kimi yanaşıram. XXI əsrdə məsələlərin bu cür emosional qoyulmasına razı deyiləm. Onda gərək İrandan soydaşlarımızın yaşadığı coğrafi məkanlara Cənubi Azərbaycan adı verilməsini tələb edək. Azərbaycan sözündə tariximiz də mədəniyyətimiz də var. Bunu ideologiyalaşdırmaq lazım deyil. Niyə Şimali və Cənubi Koreya adından nümunə götürməliyik? AFR və ADR niyə birləşdi? Əgər Azərbaycanı birləşdirə bilsək, başqa məsələ. Cənubi və Şimali Koreya dünya xəritəsində var. Biz özümüzü Şimali Azərbaycan adlandırsaq, sabah bizdən soruşsalar ki, Cənubi Azərbaycan haradır? Cənubi Azərbaycanı xəritədə göstərə biləcəyik? Yox”.

Leyla İLQAR

1148 dəfə baxılıb