İCTİMAİ PALATA MƏTBUATA TƏZYİQLƏRLƏ BAĞLI XÜSUSİ TOPLANTIYA HAZIRLAŞIR

	23 may 2012


Onlayn ictimai-siyasi qəzet

Siyasət

İCTİMAİ PALATA MƏTBUATA TƏZYİQLƏRLƏ BAĞLI XÜSUSİ TOPLANTIYA HAZIRLAŞIR

2012-02-09

Rahim Hacıyev: “Vəziyyətin ciddiliyini nəzərə alan İP məsələnin ictimai müzakirəyə çıxarılmasını qərara aldı”

İctimai Palatanın Koordinasiya Şurasının dünən saat 15.00-a təyin olunan toplantısı təxirə salınıb. Qurumun katibliyindən verilən xəbərə görə, toplantının təxirə salınması kəskin hava şəraiti ilə bağlıdır. Yolların buz bağlaması, çovğun Koordinasiya Şurasının üzvlərinin bir araya gəlməsini çətinləşdirdiyi üçün ümumi razılıqla iclasın keçirilməməsi məqsədəuyğun hesab olunub. Koordinasiya Şurasının toplantısı gələn həftə keçiriləcək.

Fevralın 14-də isə İctimai Palata son zamanlar qəzetlərə təzyiqlərin artması, onların vəzifəli məmurlar tərəfindən məhkəmələrə verilməsi, xüsusən də qəzetlərin yayımına maneələr yaradılması ilə bağlı dəyirmi masa keçirəcək.
Bu barədə məlumat verən İP Koordinasiya Şurasının üzvü, “Azadlıq” qəzeti baş redaktorunun birinci müavini Rahim Hacıyev bildirdi ki, müstəqil mətbuatın durumu, söz azadlığı və qəzetlərin yayımı ilə bağlı kritik vəziyyət yaranıb. Vəziyyətin ciddiliyini nəzərə alan İctimai Palata məsələnin ictimai müzakirəyə çıxarılmasını qərara aldı: “İctimai Palata ictimaiyyət üçün böyük əhəmiyyət kəsb eləyən problemləri qaldırır, onların müzakirəsini təşkil edir, həlli yollarını axtarır. Çox təəssüflər olsun ki, mətbuata təzyiqlər səngimir. Əksinə, bir qədər də artıb. Elə bu yaxınlarda ”Azadlıq" və “Yeni Müsavat” qəzetlərinin nazirin oğlunun şikayəti ilə cərimələnməsi göstərdi ki, azad mətbuat hədəfdədir. “Yeni Müsavat” qəzetinin üstündə isə daha çox məhkəmə iddiası var. İcra hakimiyyətindən asılı olan məhkəmə sisteminin əli ilə qəzetlər sıxışdırılır. Başqa bir problem isə ondan ibarətdir ki, hakimiyyət ən müxtəlif üsulları tətbiq etməklə, mətbuatı zəiflədir. Bu üsullardan biri mətbuatın yayılmasına problemlər yaratmaqdır. Əl yayımın qarşısı alınıb. Mümkün qədər əhalinin az hissəsinin mətbuatla təmasda olmasına nail olmağa çalışırlar. Qəzet köşklərinin götürülməsi, onların yerinə başqa köşklərin qoyulmaması prosesi gedir. Bəzi yerlərdə isə yeni görkəmdə köşklər qoyulur ki, onlar bir başa hakimiyyətin nəzarətindədir. Həmin köşklərdə demək olar ki, qəzet satışı həyata keçirilmir. Balaca supermarketlərə bənzəyir. O köşkləri təşkil edən və işlədənlər üçün qəzet satışı sonuncu dərəcəli məsələdir. Bu, bilavasitə hakimiyyətin qəzetlərin satışının mümkün qədər azaldılması siyasətinin tərkib hissəsidir. Vəziyyətin bu həddə çatmasını nəzərə alan İctimai Palata qərara gəldi ki, məsələni xüsusi müzakirəyə çıxarmaq, cəmiyyəti məlumatlandırmaq, səfərbər etmək və problemin aradan qaldırılması istiqamətində addımlar atmaq zərurəti yaranıb. Ona görə də bu mövzu ilə bağlı ayrıca dəyirmi masa keçiriləcək".
R.Hacıyev dedi ki, dəyirmi masaya Mətbuat Şurasından, hakimiyyətdən, mətbuat yayımı firmalarından qonaqların dəvət olunub-olunmaması məsələsi İctimai Palatanın Koordinasiya Şurasında müzakirə ediləcək və müvafiq qərar qəbul olunacaq.

ETİBAR

277 dəfə baxılıb