QAR MÜXALİFƏTİ DONDURDU | Siyasət

	23 may 2012


Onlayn ictimai-siyasi qəzet

Siyasət

QAR MÜXALİFƏTİ DONDURDU

2012-02-09

Müsavat və Ümid istisna olmaqla, partiyaların qərargahları bağlı olub

Bakıda görünməmiş kəskin hava şəraiti müxalifət partiyalarının işinə də ciddi problemlər yaradıb. Belə ki, dünən bəzi partiyaların qərargahında istilik sistemi sıradan çıxıb. Bundan əlavə, yolların buz bağlaması və şəhərdə nəqliyyatın olmaması partiya yetkililərinin işə gəlməsinə əngəl yaradıb.

Bu səbəbdən bəzi müxalifət partiyalarının rəhbərləri bir neçə günlük işə çıxmamağı qərara alıblar. Eyni zamanda onlar havaların soyuq olmasını nəzərə alaraq qərargahda çalışan texniki işçilərə gəlməməyi tapşırıblar. Bunu ötən gün müxalifət partiyalarının mərkəzi qərargahları ilə əlaqə saxladıqda öyrəndik.
İlk zəng etdiyimiz partiya Müsavat Partiyası oldu. Partiyanın qəbul otağından zəngimizə cavab verən şəxs bildirdi ki, başqan İsa Qəmbər səhər saatlarından iş otağındadır və hazırda qərargahda onun sədrliyi ilə müşavirə gedir. Toplantının isə bir neçə saat çəkəcəyi gözlənilir.
ADP qərargahına da zəng etdik. Lakin saat 13:26 olmasına baxmayaraq telefonu qaldıran olmadı. Odur ki, bir neçə saatdan sonra partiyanın qərargahına yenidən telefon açdıq. Bu dəfə də zəngimiz cavabsız qaldı.
AMİP-də də eyni vəziyyət oldu. Dəfələrlə etdiyimiz zənglərə baxmayaraq sorğumuza cavab verən tapılmadı.
AXCP-nin qərargahı olmadığından partiya rəhbərliyinə zəng etməyə lüzum görmədik.
KXCP-yə etdiyimiz zənglərə də cavab verən olmadı.
Ümid Partiyasında isə işin normal getdiyi bəlli oldu. Qərargahdan sorğumuza cavab verən şəxs bildirdi ki, havaların soyuq keçməsinə baxmayaraq partiyanın rəhbərliyi iş başındadır: “Burda işıqla bağlı problem yoxdur. Bütün otaqlarda istilik sistemi normal işləyir”.
Qeyd edək ki, dünən bəzi dövlət qurumlarının işçiləri də işə çıxmayıblar.

SEYMUR

424 dəfə baxılıb