VƏKİLLƏ YAP-çı DEPUTATIN SÖZ SAVAŞI QIZIŞIR

	23 may 2012


Onlayn ictimai-siyasi qəzet

Siyasət

VƏKİLLƏ YAP-çı DEPUTATIN SÖZ SAVAŞI QIZIŞIR

2012-02-10

Aslan İsmayılov: “Siyavuş Novruzovun sahiblərinə səslənirəm, onun ipini yığsınlar”

YAP-ın icra katibinin müavini, deputat Siyavuş Novruzov öz ampluasına sadiq qalaraq növbəti qalmaqallı açıqlama ilə çıxış edib. O, YAP-ın saytında dərc olunan növbəti müsahibəsində demokratik düşərgədə olan bir çox insanların ünvanına təhqiramiz ifadələr işlədib. Bir neçə gün öncə də o, vəkil Aslan İsmayılovun haqqında xoşagəlməz ifadələr səsləndirmişdi. Təbii ki, Aslan İsmayılov da bunu cavabsız qoymamışdı və ona tutarlı bir reaksiya vermişdi. Dünənki açıqlamasında isə S.Novruzov daha da qəzəblənərək vəkilin haqqında əndazəni aşan ifadələr işlədib.

O, “bəziləri var ki, adını vəkil qoyub, amma vəkillik tamam başqa bir institutdur. Məsələn, mən 12 ildir ki, millətimin vəkiliyəm və bununla da fəxr edirəm. Vəkillik peşəsi çox gözəl bir peşədir. Amma ayrı-ayrı idarə və müəssisələrdə işləyib, rüşvət üstündə, oğurluq üstündə qovulub sonradan vəkillik peşəsini seçmək dəllallıqdır. Aslan İsmayılov bu gün vəkilliklə yox, dəllallıqla məşğuldur” deyə qeyd edib: “...Aslan İsmayılov mənim keçdiyim yolların heç 10 faizini keçməyib. Təkcə parlament jurnalistləri tərəfindən hər il təsis olunan ən fəal deputatlar sırasında qalib oluram, seçicilərin hüquqlarının müdafiəsi ilə məşğul olan ən fəal deputatlardan sayılıram. Mən 20 ildir eyni əqidəyə malikəm, eyni yoldayam. Aslan İsmayılovun isə sürtülmüş sifəti hər 6 aydan bir fərqli istiqamətlərə baxır. Aslan İsmayılov bir dəfə göstərsin ki, məhkəmədə kasıb bir adamın hüququnu müdafiə edib. Harada imkanlı adam varsa, Aslan İsmayılov onun vəkili olur. Çünki o, yala qulluq edir. Aslan İsmayılov istəyirsə, mən "Azercell"dən onun mənə ayda neçə dəfə zəng edib hansısa KİV orqanında iqtidarı təriflədiyi ilə bağlı sözlərini mətbuata təqdim edim. Aslan İsmayılov mənim qapımı açıb-örtməyi belə özünə şərəf bilir... Aslan İsmayılovun danışığına qulaq asan istənilən bir adam görür ki, onun başında papağı, əlində sazı çatmır”...
S.Novruzovun bu açıqlamasına Aslan İsmayılov çox qısa cavab verdi: “Mən bu adamın kimliyi, ağlının hansı səviyyədə olması barədə ötən açıqlamamda ətraflı danışmışam. Görünür, düz hədəfi vurduğumdan Siyavuş Novruzov belə bərk qeyzlənib və bir səhifəlik müsahibəsinin yarısını mənə həsr edib. Ona geniş cavab vermək fikrim yoxdur. Sadəcə, bu adamların sahiblərinə səslənirəm ki, onun ipini yığsınlar. İngilis yazıçısı Oskar Uayld demişkən, düşməni də seçəndə ehtiyatlı olmaq lazımdır”.

Elşad MƏMMƏDLİ

4423 dəfə baxılıb