MÜXALİFƏT YAP-dan GƏLƏN DİALOQ TƏKLİFİNƏ CAVAB VERDİ

	23 may 2012


Onlayn ictimai-siyasi qəzet

Siyasət

MÜXALİFƏT YAP-dan GƏLƏN DİALOQ TƏKLİFİNƏ CAVAB VERDİ

2012-02-11

Dialoqun mövzusu ilə bağlı Müsavatla AXCP-nin mövqeyi haçalandı

YAP icra katibinin müavini Siyavuş Novruzov YAP-ın illik hesabatının, o cümlədən maliyyə hesabatının açıqladığını nümunə kimi göstərərək müxalifət partiyalarını da analoji hesabatları açıqlamağa çağırıb. O deyib ki, müxalifət partiyaları maliyyə hesabatı açıqlamırlar. Açıqlasınlar görək hansı mənbədən maliyyələşirlər: “Əlbəttə, onlar qaranlıq mənbələrdən maliyyələşirlər, ona görə də hesabat verə bilmirlər”.

S.Novruzov müxalif partiyaları maliyyələşmə mövzusunda dialoqa da çağırıb: “Biz Azərbaycanın taleyüklü məsələləri ilə bağlı daim dialoq aparmağa hazır olduğumuzu bəyan etmişik. Siyasi partiyalar bir-biri ilə düşmənçilik aparmalı deyil ki... Amma onların yalnız bir fikri var ki, Azərbaycanda qarışıqlıq düşsün, gərginlik yaransın və hakimiyyətə gəlsinlər”.
YAP-çı deputatın çağırışına və iddialarına müxalifətin münasibətinə gəlincə, Müsavat Partiyası başqanının müavini Gülağa Aslanlı öncə bildirdi ki, müxalifətin ölkədə qarışıqlıq yaratmağa çalışdığı barədə iddialar əsassızdır. Müxalifət Azərbaycanda demokratik islahatların dinc yolla həyata keçirilməsində maraqlı olduğunu dəfələrlə bəyan edib, konkret addımlarla sübuta yetirib. Ölkədə daim gərgin siyasi mühitin olmasında hakimiyyət dairələrinin maraqlı olduğu da dəfələrlə sübuta yetirilib: “Müxalifətin önəmli hissəsinin təmsil olunduğu İctimai Palata ötən il ”Demokratiyaya yumşaq keçidin Yol Xəritəsi" adlı sənəd hazırlayıb hakimiyyətə təqdim etdi. Bu sənəd bizim ölkədə qarşıdurmanın olmasında maraqlı olmadığımızı rəsmən ortaya qoyur. Hakimiyyət isə həmin sənədi qəbul etmədi. Təkcə bu fakt onu təsdiqlədi ki, gərginliyin tərəfdarı müxalifət yox, iqtidardır. «Yol Xəritəsi»ndə dialoq məsələsi də əksini tapır. Bu da onu göstərir ki, biz islahatlar, milli məsələlərlə bağlı dialoqun tərəfdarıyıq. Hakimiyyət təmsilçiləri isə dialoq tərəfdarı olduqlarını desələr də əməldə bunun əksini ortaya qoyurlar".
G.Aslanlı dedi ki, S.Novruzovun təklif etdiyi maliyyə hesabatı məsələsində dialoq keçirilməsi əslində Azərbaycan üçün milli əhəmiyyətli məsələ deyil. Lakin müxalifət istənilən mövzuda dialoq aparmağa hazırdır: “Bizim heç bir qaranlıq fəaliyyətimiz yoxdur ki, dialoqdan qaçaq”.
AXCP sədrinin müavini Fuad Qəhrəmanlı isə müxalifətin qarışıqlıq yaratmaq istədiyi barədə S.Novruzovun iddialarına G.Aslanlının verdiyi cavaba yaxın münasibət ortaya qoysa da YAP-la partiyaların maliyyə hesabatı mövzusunda dialoq aparılmasının əleyhinədir. F.Qəhrəmanlı hesab edir ki, partiyalar arasında dialoq üçün bu cür mövzu təklif olunması primitiv və yanlışdır. Çünki dialoqun predmeti ölkədə demokratik islahatların keçirilməsi ilə bağlı ola bilər: “Dialoq özlüyündə bir siyasi aksiya kimi hakimiyyət və müxalifət arasında birgə səylər tələb edən problemlərin həlli ilə bağlı ortaq məxrəc anlayışını daşıyır. Dialoq siyasi məhbusların azad olunması, sərbəst toplaşma azadlığının təmin edilməsi, ölkədə seçkilərin demokratik keçirilməsi, iqtisadi, siyasi, hüquqi sahədə islahatların aparılması və s. mövzularda ola bilər. YAP-ın açıqladığı maliyyə hesabatı saxtadır, bu səbəbdən də hakim partiya bu mövzuda da danışa bilməz. Bu mövzuda da onların dialoq təklifini qeyri-səmimi saymaq olar”.

ETİBAR

1586 dəfə baxılıb