YAP-çı DEPUTATIN “QARABAĞ VETERANIYAM” DEMƏSİNƏ SƏRT REAKSİYALAR

	23 may 2012


Onlayn ictimai-siyasi qəzet

Siyasət

YAP-çı DEPUTATIN “QARABAĞ VETERANIYAM” DEMƏSİNƏ SƏRT REAKSİYALAR

2012-02-11

Şahmurad Məmmədov: “Naxçıvanda və Qarabağda döyüşlərdə olmuşam, orada da Siyavuş adı eşitməmişəm”
Asəf Quliyev: “YAP-çılar döyüşlərdə iştirak etməyənlərə müharibə veteranı adı verirlər, Siyavuş Novruzov da onlardan biri...”

YAP-ın icra katibinin müavini Siyavuş Novruzov “Bizim Yol”a müsahibəsində deyib ki, Qarabağ müharibəsi veteranıdır. Bildirib ki, o, Naxçıvanda və Qubadlıda xidmət edib. S.Novruzovun Qarabağ müharibəsində iştirakı ilə bağlı dediklərinə aydınlıq gətirmək üçün sovet dönəmində Naxçıvanın Ordubad şəhərində Sərhəd Qoşunları üzrə komendant olan, rus qoşunları Naxçıvandan çıxarılandan sonra isə Milli Müdafiə Komitəsində Ordubad Regional Qərargahının zabiti olan Şahmurad Məmmədova müraciət etdik.

Ş.Məmmədov dedi ki, Naxçıvanda olarkən Siyavuş adlı döyüşçü eşitməyib: “Bildiyimə görə, Siyavuş Novruzov o vaxtlar kiminsə Silləvuranı olub. Özü də Şiyavuş kimdir ki, Naxçıvanda kimsə də onu tanısın? 1992-ci ilin iyun ayında Milli Müdafiə Komitəsi ləğv edildi və hərbi qurumlar Müdafiə Nazirliyinə təhvil verildi. 1992-ci il iyun ayının 27-dən mən Naxçıvan Sərhəd Dəstəsinin bir nömrəli hərbi qulluqçusu, Naxçıvan Sərhəd Dəstəsinin qərargah rəisi olmuşam. Heç vaxt Siyavuş adını eşitməmişəm. 1993-cü ilin avqustuna kimi həmin vəzifədə olmuşam. Ondan sonra həmin ilin oktyabrından Qarabağda döyüşlərdə olmuşam, orada da Siyavuş adı eşitməmişəm”.
AXCP-də İdarə Heyətinin üzvü, o zaman Naxçıvanda partiya xətti ilə silah-sursat və maddi-texniki təminat məsələlərinə nəzarət edən Asəf Quliyev isə sorğumuzla bağlı bunları dedi: “Naxçıvana hücumlar 1990-cı il yanvarın 17-də başlayıb. 1993-ü ildə isə atəşkəs olub. O dövrdə nəinki Siyavuş Novruzov Naxçıvanda olub, o heç orada görünməyib də. Bakıda yaşayıb, Heydər Əliyev Naxçıvana gələndən sonra bir-iki dəfə onunla görüşə gəlib və Bakıya qayıdıb. O, Naxçıvanda döyüşməsi ilə bağlı tamamilə yanlış məlumat verir. Ondan veteran olmaz. O dövrdə döyüşənlər bir kənarda qalıb, bu YAP-çılar özlərinə, döyüşlərdə iştirak etməyənlərə müharibə veteranı adı verirlər. Siyavuş Novruzov da bunlardan biridir”.
A.Quliyev Naxçıvanda döyüşlərdə iştirak edənlərin hər biri barəsində sənədləşmə aparıldığını da qeyd etdi: “Elə şəxslər vardı ki, döyüşdə iştirak etmirdi, amma döyüş bölgəsinə silah-sursat, ərzaq yardımı daşıyırdı. Hətta o şəxslər barəsində də sənədləşmə aparılırdı. Deməyim odur ki, Naxçıvanda döyüşlərdə iştirak edənlər, ora yardım aparanlar siyahıya alınıb. Siyavuş Novruzovun adı həmin siyahılarda olmayıb. Yəni o nə döyüşüb, nə də Naxçıvana yardım edib. Dedikləri yalandan başqa bir şey deyil”.
1992-ci ildə Azərbaycan Respublikası müdafiə nazirinin baş referenti olmuş Müsavat başqanının müavini Arzu Səmədbəyli deyir ki, Siyavuş Novruzov boş-boş danışmaqla məşğuldur: “Bu adam ziyalılara, ölkənin işıqlı adamlarına çamur atmaqla məşğuldur. Keçmişdə də elə belə olub. Qarabağ veteranı sənədi ala bilər, amma döyüşlərdə iştirak etməsi barədə dedikləri növbəti boş bəyanatıdır”.

E.MƏMMƏDƏLİYEV

1640 dəfə baxılıb