VURĞUN ƏYYUB BAŞQANLIĞA NAMİZƏDİNİ AÇIQLADI

	23 may 2012


Onlayn ictimai-siyasi qəzet

Siyasət

VURĞUN ƏYYUB BAŞQANLIĞA NAMİZƏDİNİ AÇIQLADI

2012-02-12

Qubad İbadoğlu: “İndiki mərhələdə partiyada başqan seçkilərinin keçirilməsi məqsədəuyğun deyil”

Müsavat Partiyasının qurultayı yaxınlaşdıqca, təşkilat daxilində təbii olaraq iddialılar da daha açıq kontekslə danışmağa başlayırlar. Müsavat Divanının üzvü Vurğun Əyyub “Bizim yol” qəzetinə verdiyi müsahibəsində deyib ki, İsa Qəmbər başqanlıqdan getmək mövqeyində qalsa, dünya dağılmayacaq: “Müsavat Partiyası qurultayını keçirəcək və yeni başqan seçiləcək. Fikrimcə, İsa Qəmbərdən sonra da partiyanın bütövlüyünü qoruyan, onu irəliyə apara bilən şəxslər var”.

“Dediyiniz şəxslərdən biri Vurğun Əyyub ola bilərmi”, sualına o, belə cavab verib: “Bəli, mən özümü də həmin şəxslər sırasında görürəm. Sadəcə, mən bir sıra məsələləri götür-qoy elədim. Mənim üçün fərqi yoxdur ki, orada Vurğun Əyyub olsun və ya Qubad İbadoğlu olsun. Mənim üçün əsas odur ki, düşündüklərimi partiya həyatında realizə edə bilən adam olsun. Belə adamlardan birincisi elə Müsavatın Divan üzvü Qubad İbadoğludur. Başqan seçkiləri keçiriləcəksə, mən Qubad İbadoğlunu müdafiə edəcəyəm. Özünün gənc olması, perspektivi, beynəlxalq əlaqələri, cəmiyyətdəki müsbət imici və başqa məqamları nəzərə alaraq hesab edirəm ki, İsa Qəmbərdən sonra partiyanı ən yaxşı təmsil edəcək şəxslərdən birincisi Qubad İbadoğludur”.
V.Əyyubun bu mövqeyi ilə bağlı “Yeni Müsavat”a açıqlama verən Q.İbadoğlu dedi ki, Vurğun bəy həm Divan üzvüdür, həm də partiyanın siyasi elitasına daxil olan şəxsdir: “O, həm də cəmiyyətdə qəbul olunan ziyalılardan biridir. Ona görə də Müsavat Partiyasının indiki vəziyyəti, gələcəyi ilə bağlı onunla kifayət qədər müzakirələrimiz olur. Partiyanın perspektivinə, təşkilatın idarəetməsinə dair mövqelərimiz bir-birinə çox yaxındır. Biz hesab edirik ki, indiki mərhələdə partiyada başqan seçkilərinin keçirilməsi məqsədəuyğun deyil. Çünki növbəti il prezident seçkiləri keçiriləcək və biz istəyirik ki, partiyanın nizamnaməsi daxilində Müsavatın seçkilərə daha güclü namizədlə getməsi, daha ciddi hazırlaşması üçün səylərimizi əsirgəməyək. Ona görə də prezident seçkiləri ərəfəsində Müsavatın başqanının dəyişməsini arzulamırıq. Bu səbəbdən də bizim Vurğun bəylə müzakirələrimizdə başqanlığa namizədlə bağlı razılaşmamız, danışığımız olmayıb”.
Bununla belə, Q.İbadoğlu V.Əyyubun ona etimad göstərməsini müsbət qarşılayır: “Hesab edirəm ki, Vurğun Əyyub partiyada əməyi, nüfuzu olan şəxsdir, başqanlığa namizədliyə haqqı olan şəxslərdən biridir. Hesab edirəm ki, Müsavat Partiyasında gedən müzakirələr son nəticədə həm daxili demokratiya, həm də təşkilatın gələcəyinə tövhələr verəcək. Vurğun bəy, digər Divan üzvləri ilə birlikdə bizi birləşdirən amal da məhz bu töhfələrdən ibarətdir. Biz çalışırıq ki, prezident seçkilərinə qədər Müsavat Partiyasının qurultayı keçirilsə də, başqanlıq məsələsi gündəmdə olmasın. Əgər olacaqsa, bu istiqamətdə Müsavat Partiyasının siyasi elitasının, indiki rəhbərliyinin, Müsavatın Türkiyədə olan ağsaqqallarının mövqeyini, eyni zamanda ictimai rəyi və digər əhəmiyyətli faktorları nəzərə alacağıq”.

Elşad MƏMMƏDLİ

2358 dəfə baxılıb