İSA QƏMBƏRİN BAŞQANLIQDA QALMASININ ƏN OPTİMAL VARİANTI TAPILIB

	23 may 2012


Onlayn ictimai-siyasi qəzet

Siyasət

İSA QƏMBƏRİN BAŞQANLIQDA QALMASININ ƏN OPTİMAL VARİANTI TAPILIB

2012-02-13

Artıq rəhbərlikdəki bir sıra şəxslər arasında ilkin razılıq əldə edildiyi deyilir

Dünən Müsavat Partiyasının Şirvan şəhər təşkilatının ümumi yığıncağı keçirilib. Ümumi yığıncaqda ölkədə və Şirvan şəhərində ictimai-siyasi vəziyyət müzakirə edilib. Ümumi yığıncaqda əsas müzakirə mövzusu Müsavat Partiyasının martın 3-4-də keçirilməsi planlaşdırılan 8-ci qurultayı və qurultaya hazırlıq məsələləri olub. Şirvan şəhər təşkilatının qurultay nümayəndələri seçilib. Ümumi yığıncaqda Qurultaya Hazırlıq üzrə Təşkilat Komitəsinin üzvü Valeh Hümbətoğlu iştirak edib.

Müsavat Partiyasının qurultayına isə 20 gündən az vaxt qalıb. Qurultaya Bakı Əl Oyunları İdman Sarayının ayrılması üçün Bakı Şəhər İcra Hakimiyyətinə Müsavat Partiyasının göndərdiyi müraciətə isə 3 həftə keçməsinə baxmayaraq cavab verilməyib. Belə görünür ki, hakimiyyət cavabı gecikdirməklə Müsavatı qeyri-müəyyən vəziyyətdə qoymaq və qurultay hazırlıqlarına mənfi təsir etmək istəyir.
Müsavat başqanının müavini, qurultaya hazırlıq komitəsinin üzvü Gülağa Aslanlı bildirdi ki, meriyadan hələ də cavab gözləyirlər. Cavab mənfi olacağı halda hansı addımların atılacağına gəlincə isə G.Aslanlı dedi ki, bu məsələ yalnız meriyanın cavabından sonra müzakirə oluna bilər: “Müsavatın qurultayında, qonaqlarla birlikdə, təxminən 1000 nəfərin iştirakı gözlənilir. Ona görə də məkan seçimində biz bunu nəzərə almışıq. Bakı Şəhər İcra Hakimiyyəti də bu məsələləri nəzərə almalıdır”.
Hakimiyyət qurultaya yer ayırmayacağı halda ali toplantının vaxtının dəyişəcəyi ehtimalına gəlincə, G.Aslanlı bildirdi ki, istənilən variantın seçilməsi Qurultaya Hazırlıq üzrə Təşkilat Komitəsinin və partiyanın rəhbər strukturunun qərarından sonra məlum olur: “Qurultayın vaxtının dəyişməsi məsələsi hazırda müzakirə mövzusu deyil”. G.Alanlı qurultaya hazırlıq işlərinin davam etdiyini və yüksək səviyyədə qurultay keçirəcəklərini dedi.
Ali toplantıya hazırlıqla yanaşı Müsavat üzvləri arasında İsa Qəmbərin partiyanın başqanı postunda qalması və bunun nizamnamə pozuntusuna yol verilmədən reallaşdırılması istiqamətində müzakirələr də gedir. İsa Qəmbərin başqanlıqda qalmasında təkid edənlərin ən optimal variantı tapdıqları deyilir. Qurultayda həmin variantın tətbiq olunması barədə partiya rəhbərliyindəki bir sıra şəxslər arasında ilkin razılıq əldə olunduğu iddia edilir. Bu variant qurultayın elan olunmuş vaxtda-martın 3-4-də keçirilməsini, iki seçkinin - Məclis və Mərkəzi Nəzarət Təftiş Komissiyası (MNTK) üzvlərinin seçkisinin qurultayda keçirilməsini, başqan seçkisinin isə bu qurultayda keçirilməməsini nəzərdə tutur. Eləcə də partiya nizamnaməsinə heç bir dəyişiklik edilmir. Qurultay sadəcə, başqanın səlahiyyət müddətini uzadır. Bununla da İsa Qəmbər 2013-cü il prezident seçkilərinə qədər başqan qalır. Beləliklə, həm Müsavat prezident seçkilərinə İsa Qəmbərin başqanlığı altında gedir, həm də nizamnamə pozuntusuna yol verilmir.
Müsavat Partiyası MNTK sədri İbrahim İbrahimli də bu variantın mümkünlüyünü və onun nizamnamə pozuntusu olmadığını təsdiqləyib.
İsa Qəmbər isə nə bu variant barədə, nə də ümumiyyətlə başqan seçkisi mövzusunda heç bir fikir bildirmir.

ETİBAR

2290 dəfə baxılıb