İCTİMAİ PALATA “EUORVİSİON” ÖNCƏSİ AKSİYALAR KEÇİRMƏYƏ BİLƏR, ƏGƏR...

	23 may 2012


Onlayn ictimai-siyasi qəzet

Siyasət

İCTİMAİ PALATA “EUORVİSİON” ÖNCƏSİ AKSİYALAR KEÇİRMƏYƏ BİLƏR, ƏGƏR...

2012-02-13

Pənah Hüseyn: “Bu məsələdə seçim iqtidarındır”

İctimai Palatanın bəzi bəyanat və açıqlamalarında “Euorvision” musiqi yarışması mərkəzi xətt almaqdadır. İP Koordinasiya Şurasının üzvü, AXCP sədri Əli Kərimli qurumun son sessiyasında bəyan edib ki, “Eurovision” Azərbaycan üçün bir fürsətdi. İP qətiyyən bu tədbirin ölkəmizdə keçirilməsinə mane olmamalıdır. Əksinə, bununla bağlı dünya və iqtidara mesajlar verməlidir.

Mesaj isə bundan ibarət olmalıdır ki, ya Azərbaycandakı vicdan məhbusları azad olunmalıdır, ya da “Eurovision” üçün ölkəmizə gələn minlərlə jurnalist yalnız siyasi məhbuslardan və korrupsiyadan danışacaq. Əli Kərimli bunun üçün ciddi hazırlıqların da olduğunu açıqlayıb. Hazırlıqların bir məqamını açıqlayan AXCP sədri hakimiyyətə xəbərdarlıq edib ki, minlərlə adam siyasi dustaqların şəkilləri olan köynəklər geyinib, dünyanın hər yerindən gələn jurnalistlərin qarşısına çıxacaq: “Hakimiyyətə deyirəm ki, bu cür arzuolunmaz situasiya istəmirsə, vicdan məhbusları azad edilməlidir”.
İP-in ötən vicdan məhbusları ilə bağlı keçirdiyi Dəyirmi Masada da məhbuslar azad edilməyəcəyi halda “Eurovision” yarışmasından dünyanın diqqətinin Azərbaycanda vicdan məhbusların olduğuna yönəldilməsi üçün istifadə olunacağı müzakirə edilib. Srağagün isə İP Koordinasiya Şurasının üzvü Pənah Hüseyn bizə açıqlamasında məlumat verdi ki, “Eurovision” mahnı yarışması öncəsi həm vicdan məhbuslarının azad olunması tələbi ilə, həm də ümumiyyətlə, ölkədəki vəziyyətlə, islahatlar tələbi ilə kütləvi etiraz aksiyalarının keçirilib-keçirilməməsi İctimai Palatada müzakirə olunur. Ən müxtəlif aksiyaların keçirilməsi təklifləri var: “O cümlədən mənim tərəfimdən təklif olunub ki, bu məsələ xüsusi sessiyanın müzakirəsinə çıxarılsın və konkret münasibət müəyyən edilsin. Yəni bu gün üçün bu məsələ barədə hər hansı siyasi qərar yoxdur. Hesab edirəm ki, İctimai Palatanın ”Eurovision" mahnı yarışması öncəsi tutacağı mövqe hakimiyyətin vicdan məhbusları ilə bağlı tutacağı mövqe ilə əlaqəli olmalıdır. Qərar qəbul edilərkən baxılmalıdır ki, vicdan məhbusları azadlıqdadır, ya yox. Dünyanın bir sıra nüfuzlu beynəlxalq insan haqları təşkilatları tərəfindən vicdan məhbusu kimi tanınmış 16 vicdan məhbusunun olduğu bir şəraitdə “Eurovision” kimi tədbirin burada keçirilməsi anormal hal olar. Xüsusən buna bizim sükut etməyimiz və heç nə olmayıbmış kimi davranmağımız da mümkün deyil. Bunu nə bizim öz vicdanımız, nə tərəfdarlarımız qəbul edər. Azərbaycan cəmiyyəti də bunu başa düşməz".
P.Hüseyn vurğuladı ki, ümumi yanaşmada İctimai Palata “Eurovision” kimi böyük bir tədbirin Azərbaycanda keçirilməsinin əleyhinə olmayıb, indi də əleyhinə deyil və bunun dövlətimizin təbliği üçün istifadə olunmasını məqsədəuyğun hesab edir: “Bu məsələdə seçim İctimai Palatanın yox, iqtidarındır. ”Eurovision"un mümkün qədər normal keçməsi iqtidar vicdan məhbuslarını azad etsə, təbii ki, vicdan məhbusları məsələsi ilə bağlı həmin yarışma qabağı aksiyalar da olmayacaq, vicdan məhbusları azad edilsə həmin yarışma öncəsi ümumiyyətlə, kütləvi aksiyalar keçirilməsində İctimai Palatanın tərəddüdlər götürməsi də mümkündür".

E.SEYİDAĞA

1247 dəfə baxılıb