İCTİMAİ PALATA MƏTBUATA TƏZYİQLƏRLƏ BAĞLI XÜSUSİ TOPLANTI KEÇİRƏCƏK

	23 may 2012


Onlayn ictimai-siyasi qəzet

Siyasət

İCTİMAİ PALATA MƏTBUATA TƏZYİQLƏRLƏ BAĞLI XÜSUSİ TOPLANTI KEÇİRƏCƏK

2012-02-13

Dəyirmi Masada Mətbuat Şurasından, hakimiyyətdən, yayım firmalarından təmsilçilərin də iştirakı gözlənilir

Sabah saat 12-də İctimai Palata son zamanlar qəzetlərə təzyiqlərin artması, xüsusən də qəzetlərin yayımına maneələr yaradılması ilə bağlı Dəyirmi Masa keçirəcək. İP Koordinasiya Şurasının üzvü Mehriban Vəzirin bu toplantının keçirilməsi üçün ciddi zərurət yarandığını bildirdi.

Müstəqil mətbuatın durumu, qəzetlərin yayımı ilə bağlı kritik vəziyyət yarandığını söyləyən KŞ üzvü vəziyyətin ciddiliyini nəzərə alan İctimai Palatanın məsələnin ictimai müzakirəyə çıxarılmasını qərara aldığını və bu toplantıda təkcə jurnalistlərin deyil, hər kəsin ciddi yanaşaraq iştirak etməsinin vacibliyini dedi: “Azad mətbuatın susdurulması cəmiyyət üçün böyük təhlükədir. İctimai Palata ictimaiyyət üçün böyük əhəmiyyət kəsb eləyən problemləri qaldırır, onların müzakirəsini təşkil edir, həlli yollarını axtarır. Çox təəssüflər olsun ki, mətbuata təzyiqlər səngimir. Əksinə bir qədər də artıb. Elə bu yaxınlarda ”Azadlıq" və “Yeni Müsavat” qəzetlərinin nazirin oğlunun şikayəti ilə cərimələnməsi göstərdi ki, azad mətbuat hədəfdədir. İcra hakimiyyətindən asılı olan məhkəmə sisteminin əli ilə qəzetlər sıxışdırılır. Başqa bir problem isə ondan ibarətdir ki, hakimiyyət ən müxtəlif üsulları tətbiq etməklə mətbuatı zəiflədir. Bu üsullardan biri mətbuatın yayılmasına problemlər yaratmaqdır. Əl yayımın qarşısı alınıb. Mümkün qədər əhalinin az hissəsinin mətbuatla təmasda olmasına nail olmağa çalışırlar. Qəzet köşklərinin götürülməsi, onların yerinə başqa köşklərin qoyulmaması prosesi gedir. Bəzi yerlərdə isə yeni görkəmdə köşklər qoyulur ki, onlar bir başa hakimiyyətin nəzarətindədir. Həmin köşklərdə demək olar ki, qəzet satışı həyata keçirilmir. O köşkləri təşkil edən və işlədənlər üçün qəzet satışı sonuncu dərəcəli məsələdir".
Mehriban Vəzir hesab edir ki, bu, bilavasitə hakimiyyətin qəzetlərin satışının mümkün qədər azaldılması siyasətinin tərkib hissəsidir: “Vəziyyətin bu həddə çatmasını nəzərə alan İctimai Palata qərara gəldi ki, məsələni xüsusi müzakirəyə çıxarmaq, cəmiyyəti məlumatlandırmaq, səfərbər etmək və problemin aradan qaldırılması istiqamətində addımlar atmaq zərurəti yaranıb. Ona görə də bu mövzu ilə bağlı ayrıca Dəyirmi Masa keçiriləcək. Toplantıda ciddi müzakirələr aparılacaq”.
Dəyirmi Masada Mətbuat Şurasından, hakimiyyətdən, mətbuat yayımı firmalarından təmsilçilərin də iştirakı gözlənilir.

ETİBAR

144 dəfə baxılıb