“HÖKUMƏTDƏN NƏSƏ İSTƏSƏYDİM, İNDİ SPİKERİN YANINDA OTURARDIM”

	23 may 2012


Onlayn ictimai-siyasi qəzet

Siyasət

“HÖKUMƏTDƏN NƏSƏ İSTƏSƏYDİM, İNDİ SPİKERİN YANINDA OTURARDIM”

2012-02-19

Novella Cəfəroğlu özünə qarşı ittihamlara cavab verdi

Bir qrup qeyri-hökumət təşkilatı ilə köşə yazarı Şahvələd Çobanoğlu arasında münaqişə yaranıb. O, “Azadlıq” qəzetinin dünənki sayında Dilarə Əliyeva adına Qadın Hüquqlarını Müdafiə Cəmiyyətinin sədri Novella Cəfəroğlunu topa tutub. O yazıb ki, bu günlərdə tanınmış hüquq müdafiəçisi N.Cəfəroğlu “Eurovision”la bağlı aparılan “Azad musiqi qeyri-azad ölkədə” və ya “Demokratiya üçün oxu!” şüarları ilə təqdim edilən kampaniyanı pisləyib, bunu ermənilərin arzusu ilə bir səviyyəyə qoyub: “Üstəlik, Azərbaycan hakimiyyətini xaricdə tənqid eləməyin düz olmadığını söyləmişdi və s. Hələ bu kampaniyaya qarşı hökumətyönlü QHT-lərin bəyanatında onun təşkilatının imzası olduğunu kənara qoyuram”.

Jurnalist hüquq müdafiəçisinin mövqeyini hökumətin mövqeyi ilə müqayisə edib.
N.Cəfəroğlu isə qarşı tərəfin ittihamları ilə razılaşmır. Hüquq müdafiəçisi “Yeni Müsavat” a açıqlamasında bildirdi ki, hüquq müdafiə təşkilatlarının Monitorinq Qrupu siyasi məhbusların azadlığa buraxılmasında, vətəndaşların pozulan mülkiyyət hüququnun dialoq yolu ilə həll olunmasında maraqlıdır: “Azərbaycana 2000-3000 jurnalist gələcək. Müsabiqədən 3-5 şəkil çəkəndən sonra Azərbaycanı gəzəcəklər, gördüklərini yazacaqlar. Onların hər birinin yanına bir polis qoyası deyillər ki?! Biz deyirik ki, siyasi məhbuslar azadlığa buraxılmalıdır, insanlara verilən kompensasiya 1500 manatla yox, bazar qiymətlərinə uyğun hesablanmalıdır. Şüarçılıqla indiyə qədər nəyə nail olmuşuq? "Eurovision" mahnı müsabiqəsidir. Heç kəs bu müsabiqəyə qatılmamaq haqqında bəyanat verməyəcək.
Məsələ burasındadır ki, gələn jurnalistlərə nə deyəcəyik? Biz iqtidarın da, müxalifətin də, QHT-lərin də bir masa ətrafında oturmasının tərəfdarıyıq. “Facebook” da yazıblar ki, bu deputatlar gedib hakimiyyətdən, nə isə aldılar. Bəs, Novella nə alıb? Mən 70 yaşındayam. Üç professor oğlum var. Heç kimə ehtiyacım yoxdur. Mən hakimiyyətdən nə isə istəsəydim 1993-cü ildə Heydər Əliyevin yanında olardım, indi gedib spikerin yanında oturardım. Mən nə müxalifətdən, nə də iqtidardan heç vaxt heç nə istəməmişəm. Mən Azərbaycan üçün işləmişəm. Səs-küylə heç kimi həbsxanadan buraxmayıblar. Monitorinq Qrupu öz işini görür".

Leyla İLQAR

1798 dəfə baxılıb