MÜSAVATIN QURULTAYI TƏXİRƏ SALINDI | Siyasət

	23 may 2012


Onlayn ictimai-siyasi qəzet

Siyasət

MÜSAVATIN QURULTAYI TƏXİRƏ SALINDI

2012-02-21

Ali tədbirin harada keçirilməsini müəyyən etmək üçün İşçi Qrupu yaradıldı

Dünən Müsavat Partiyasının Qurultaya Hazırlıq üzrə Təşkilat Komitəsinin toplantısı keçirilib. Toplantıda partiyanın martın 3-4-nə təyin edilən qurultayına Bakı Şəhər İcra Hakimiyyətinin (BŞİH) yer ayırmamasından sonra yaranmış vəziyyət müzakirə edilib. Təşkilat Komitəsi BŞİH-in Müsavat Partiyasına VIII Qurultayının keçirilməsi üçün müvafiq zal verilməsindən imtina etməsini pisləyib. BŞİH-in qərarının qanunsuz olduğu vurğulanıb və qərardan məhkəməyə, dövlət orqanlarına və beynəlxalq qurumlara müraciət olunması qərara alınıb.

Müsavat başqanının müavini Tofiq Yaqublunun verdiyi məlumata görə, Qurultaya Hazırlıq üzrə Təşkilat Komitəsi 3 saat yaxın davam edən müzakirələrdən sonra qurultayın martın 3-4-də reallaşdırılmasının mümkün olmadığı qənaətə gəlib. Vaxtın həddən artıq az qalması belə vəziyyət yaradıb ki, hakimiyyət hətta bundan sonra yer ayırsa da martın 3-4-də qurultay keçirilməsi mümkün deyil: “Qarşıdakı müddət seçkili orqanlara namizədlərin irəli sürülməsi, bir sıra təşkilati-texinki işlərin həyata keçirilməsi üçün yetərli deyil. Qurultaya Hazırlıq üzrə Təşkilat Komitəsi qərar verdi ki, 3-4 martda qurultay keçirilməsi təxirə salınsın. Qurultaya yer müəyyənləşdirilməsi məqsədi ilə təkliflərin hazırlanması və qurultay keçirilə biləcək zalların hüquqi sahibləri ilə danışıqlar aparmaq üçün İşçi Qrupu yaradıldı. Partiyanın qurultayının yaxın zamanlarda keçirilməsi məqsədəuyğun hesab edildi. Ən qısa müddətdə qurultayın keçirilməsinə normal şəraiti olan yer müəyyənləşdirildikdən sonra qurultayın keçiriləcəyi günlərin bəyan edilməsi qərara alındı. İşçi Qrupu yeni variantlar istiqamətində axtarışlar edəcək. Yeni yerlər müəyyənləşdirilib Təşkilat Komitəsinə məlumat verildikdən sonra qurultayın vaxtı təyin ediləcək və Bakı Şəhər İcra Hakimiyyətinə rəsmi müraciət göndəriləcək. Qurultayın xaricdə keçirilməsi təklifləri də var və ciddi təkliflərdir. İşçi Qrupu bu variant istiqamətində də iş aparacaq. Bu variantın üzərində dayanılması da mümkün variantlardan biridir”.
P.S. Dünən hökumət də Müsavatın qurultayı ilə bağlı mövqeyini açıqlayıb. Prezident Administrasiyası ictimai-siyasi şöbəsinin müdiri Əli Həsənov APA-ya deyib ki, Müsavata qurultay üçün yer ayrılmaması barədə mətbuatda yazılanlar bu partiya tərəfindən təşkil olunmuş piar kampaniyasıdır. Müsavat da daxil olmaqla dövlət qeydiyyatından keçmiş partiyaların əksəriyyətinə qurultay üçün müvafiq yerlər indiyədək ayrılıb, bundan sonra da ayrılacaq: “Bakı Şəhər İcra Hakimiyyəti Müsavata da qurultay keçirmək üçün müvafiq yer ayıracaq. Amma bu yer onların istədiyi, yoxsa BŞİH-in təklif etdiyi vahid yer olacaq, buna hər halda şəhər rəhbərliyi qərar verəcək”.

Etibar SEYİDAĞA

2032 dəfə baxılıb