MARTDA RƏSULÇULARIN 100 MİNLİK AKSİYASI OLMAYACAQ

	23 may 2012


Onlayn ictimai-siyasi qəzet

Siyasət

MARTDA RƏSULÇULARIN 100 MİNLİK AKSİYASI OLMAYACAQ

2012-02-21

Müqavimət Hərəkatı Rəsul Quliyevin anonsunu reallaşdırmadı

Açıq Cəmiyyət Partiyasının lideri, eks-spiker Rəsul Quliyev bir neçə ay öncə verdiyi bəyanatda mart ayına qədər Bakıda aksiyalar keçirəcəklərini anons etmişdi. ACP lideri bildirmişdi ki, Bakıda təşkil ediləcək aksiyalar eyni zamanda bütün regionlarda davam edəcək: “Ola bilsin ki, ilk günlərdə aksiyalarda 30 min insan iştirak eləsin. Sonrakı günlərdə isə onların sayı 100 minə çatacaq”.

Mart ayına az müddət qalıb. Rəsul Quliyevin vəd etdiyi aksiyalara onun liderlik etdiyi partiyada və təmsil olunduğu Demokratik Cəmiyyət Uğrunda Müqavimət Hərəkatında hazırlıq işləri gedirmi?
ACP sədri Vaqif Mahmudov bildirdi ki, hazırda gündəmin əsas məsələsi Xocalı soyqırımı ilə bağlı tədbirlərə hazırlaşmaqdır. Ona görə də bu gün konkret hansısa tarixdə etiraz aksiyalarına hazırlıq aparılmır: “Xocalı soyqırımı tədbirlərimiz başa çatdıqdan sonra Müqavimət Hərəkatında kütləvi aksiyalar məsələsi müzakirə olunacaq və qərarlarla bağlı məlumat veriləcək. Mitinqlərin konkret nə vaxt keçiriləcəyi hələ bəlli deyil. Aksiyaların kütləviliyinə gəlincə, Rəsul Quliyev deməmişdi ki, 100 min nəfərlik mitinq keçirəcəyik. Rəsul müəllim demişdi ki, ilk mərhələdə təxminən 30 min nəfərlik aksiyalar keçirilsə, sonrakı mərhələdə aksiyalarda kütləviliyin 100 min nəfərə qalxacağı mümkündür”.
Demokratik Cəmiyyət Uğrunda Müqavimət Hərəkatının İdarə Heyətinin üzvü, Azadlıq Partiyasının sədri Əhməd Oruc isə bildirdi ki, kütləvi aksiyaları Hərəkatın fəaliyyət formalarından biri kimi qəbul olunub: “Azərbaycanda hərəkatın pik nöqtəsinin 2013-cü il prezident seçkilərinə qədər gəlib çatmasını planlaşdırırıq. Əsas məqsəd ölkədə demokratik seçki keçirilməsinə nail olmaqdır. İndiki mərhələdə isə kütləvi aksiyalar planlaşdırılmır. İndiki mərhələ hərəkatın təşkilatlanması mərhələsidir. Yaxın bir neçə ay ərzində biz Hərəkatın Mərkəzi Aparatının, Məclisinin, rayon şöbələrinin formalaşdırılması istiqamətində işlərimizi planlaşdırırıq. İndiki mərhələdə aksiya keçirməməyimiz həm də onunla bağlıdır ki, cəmiyyətdə, ictimai rəydə aktivlik yoxdur. Aktivliyə nail olmaq üçün hesab edirik ki, öncə hərəkatın təşkilatlanması həyata keçirilməlidir”.

ETİBAR

1533 dəfə baxılıb