“HÖKUMƏT ÖLKƏNİ BİRPARTİYALI SİSTEMƏ APARIR”

	03 sentyabr 2010


Onlayn ictimai-siyasi qəzet

Siyasət

“HÖKUMƏT ÖLKƏNİ BİRPARTİYALI SİSTEMƏ APARIR”

Əli Kərimli çətinliklərə baxmayaraq, AXCP-nin seçkidən çəkilməyəcəyini deyir

“2008-ci ildə Seçki Məcəlləsinə edilən neqativ dəyişikliklər indi tətbiq olunur. Son illərdə müxalifət heç olmasa qeydiyyat mərhələsini keçməyə nail olurdu. Artıq bu imkan da aradan qalxıb. Minlərlə bələdiyyə üzvlüyünə namizədi qeydə almadılar və bu, birinci neqativ dəyişikliyin təzahürü oldu”. AXCP sədri Əli Kərimli bələdiyyə seçkilərinin qeydiyyat mərhələsini “Media forum”a dəyərləndirərkən belə deyib.

O bildirib ki, hökumət illərdir ölkəni birpartiyalı sistemə doğru aparır və partiyaların fəaliyyəti buna görə məqsədyönlü şəkildə məhdudlaşdırılır: “Əvvəllər partiyalara normal qurultay, konfrans keçirmək, seçiciləri ilə görüşmək, heç olmasa öz ofislərində işləmək imkanı tanınırdı. İndiyə qədər, görüntü xatirinə də olsa seçkidə müxalifətin iştirakına imkan yaradılırdı. Artıq hökumət hesab edir ki, belə imitasiyaya da ehtiyac yoxdur. YAP-dan başqa digər partiya və blokların seçkidə iştirakına imkan verilmir. Bələdiyyə seçkiləri rəsmən birpartiyalı seçki olacaq və YAP-dan başqa partiyanın iştirakı olmayacaq”.
AXCP sədri deyir ki, əvvəlki seçkilərdə nəticələr xalqın iradəsini ifadə etməsə də seçki kampaniyasında müxalifətin məhdud da olsa televiziyaya çıxmaq, mitinqlər keçirmək imkanı vardı: “Lakin birinci seçkidir ki, kampaniya dövründə müxalifətin nə televiziyaya çıxışı, nə də mitinqlər keçirmək imkanı olacaq. Seçki təşviqatı üçün ayrılan televiziya vaxtının hamısından YAP istifadə edəcək. Çünki hər hansı başqa müxalif partiyanın qeydiyyatdan keçməsinə imkan verilməyib. Bu da onu göstərir ki, bələdiyyə seçkiləri rəqabət mühitində keçirilməyəcək”.
Ə.Kərimli AXCP-nin neçə namizədinin qeydiyyatdan keçməsi haqda məlumatsız olduğunu deyib: “Olduqca az sayda müxalifətçi qeydiyyatdan keçib, onların sayını dəqiq bilmirik. Çünki müəyyən olunmuş vaxt başa çatsa da bu barədə heç bir məlumat verilmir. Hətta namizədliyini şəxsən irəli sürənlər də bilmir ki, qeydiyyata alınıblar, ya yox”.
AXCP sədri seçkidə iştirak edəcəklərini söyləyib: “Düzdür, vəziyyət heç də sadə deyil. 2004-cü il bələdiyyə seçkilərinə qatıldıq. Sonra təqribən indikinə bənzər mənzərə ilə qarşılaşdıq və seçkiləri boykot edib namizədlərimizi geri çağırdıq. Buna baxmayaraq, namizədlərimizin bəzilərinin adını siyahıdan çıxarmadılar və özləri onları bələdiyyələrə keçirdilər. AXCP fəalları hətta seçiləndən sonra ərizə yazıb bələdiyyələrdə təmsilçilikdən imtina etdi. Bu dəfə isə insanlar seçkidə iştiraka meylli deyildi. Biz bir neçə seçkini dalbadal boykot etmişdik. Düşündük ki, bələdiyyə seçkilərində yüzlərlə insanın ən azı iştirak imkanı var. Bunu nəzərə alıb seçkiləri boykot etmədik. Sentyabrda partiya fəalları Ali Məclisin iclasında belə sual qoydu ki, seçkilərə getməyimizi təşviq edirsiniz, bu çətinlikləri keçəndən sonra boykot qərarı verilməyəcək ki... Biz də vəd etdik ki, seçkidə iştirak etmək istəyənlərin hüquqlarına hörmətlə yanaşacağıq. Ona görə də seçkidə iştirak edəcəyik. Qeydiyyatdan keçən yüzlərlə insanın istəyinə hörmətlə yanaşacağıq”.

Xəbər xidməti

886 dəfə baxılıb

[03.09.2010] - ALP İLƏ VİP-in BLOKUNA AD QOYULDU

[03.09.2010] - SABAH MÜSAVAT MƏCLİSİNİN İCLASINDA MÜHÜM QƏRARLAR VERİLƏCƏK

[02.09.2010] - MÜBAHİSƏLİ DAİRƏLƏRLƏ BAĞLI QƏRARI İKİ LİDER VERƏ BİLƏR

[01.09.2010] - ŞƏKİ MÜSAVATÇILARI ADİL QEYBULLANIN MÜDAFİƏSİNƏ QALXDI

[01.09.2010] - RAZILAŞDIRILMIŞ DAİRƏLƏRİN SAYI 80-ə ÇATDI

[01.09.2010] - ƏLİ ƏLİYEV “XAİN” ELAN ETDİYİ GƏNCİ PARTİYAYA QAYTARIB

[01.09.2010] - ETİBAR MƏMMƏDOV HƏLƏ SON QƏRAR VERMƏYİB

[01.09.2010] - ZİYA MƏMMƏDOVUN MALİYYƏLƏŞDİRDİYİ BLOK HANSIDIR?

[31.08.2010] - 17 SAYLI YASAMAL DAİRƏSİNDƏ GƏRGİN MÜBARİZƏ BAŞLAYIB

[31.08.2010] - FƏZAİL AĞAMALI DA DAİRƏSİNİ AÇIQLADI