İQBAL AĞAZADƏ DƏ MÜSAVAT BAŞQANINI İTTİHAM ETDİ

	30 iyul 2010


Onlayn ictimai-siyasi qəzet

Siyasət

İQBAL AĞAZADƏ DƏ MÜSAVAT BAŞQANINI İTTİHAM ETDİ

“İsa Qəmbərin açıqlamaları Azərbaycan müxalifətini parçalamaq məqsədi güdmürmü?”

“Əgər İsa Qəmbərin əlində dəlillər varsa, ortaya qoysun, hakimiyyət içindən gələn məlumatlar əsasında danışmağa ehtiyac yoxdur. Hakimiyyət daxilindəki mənbədən aldığı dezinformasiyalarla Azərbaycan müxalifətinin və seçicisinin taleyini bu şəkildə bərbad hala salmaq, nəticə etibarilə demokratik prinsiplərə belə zərbə vurmaq olmaz”.

Bunu APA-ya açıqlamasında Ümid Partiyasının sədri İqbal Ağazadə deyib. ALP lideri Lalə Şövkətin APA-ya müsahibəsində Müsavat rəhbərliyi ilə bağlı suallarının çox məntiqli olduğunu bildirən İ.Ağazadənin sözlərinə görə, İ.Qəmbərin bu ittihamlara verdiyi cavabların bir sıra məqamları ortaya çıxarıb: “Xüsusilə İsa Qəmbər bildirir ki, xüsusi xidmət orqanları bu barədə məlumatlıdır və öz məlumat mənbəyinin də hakimiyyətin içində olduğunu deyir. Əgər Azərbaycanın hansısa strukturu siyasi partiyalar içərisində agentura şəbəkəsinə xidmət edən və Azərbaycanın mənafelərini satan qüvvələrin olduğunu bilirsə, bu partiyaların heç biri məsuliyyətə cəlb olunmursa, onda həmin orqanlar və adamlar ciddi məsuliyyət daşımalıdır. İkinci tərəfdən, İsa Qəmbər qeyd edir ki, onun informasiya mənbələri hakimiyyətin içindədir. Təbii ki, hakimiyyətin heç bir reaksiya vermədiyi və tədbir görmədiyi faktı ortadadırsa, deməli, bunlar yanlış informasiyalardır. Amma sual olunur: onda İsa Qəmbər bu informasiyaları səsləndirməklə Azərbaycan müxalifətini parçalamaq niyyəti güdmürmü? 2010-cu il seçkiləri öncəsi İsa Qəmbərin çıxışından sonra partiyalar arasındakı münasibətlər hansı səviyyəyə gəldi? Bu miqyasda münasibət nəticə etibarilə 2010-cu ildə seçkilərə birgə qatılmaq perspektivini çox aşağı endirir. Bu da onu deməyə əsas verir ki, İsa Qəmbərə belə informasiyalar düşünülmüş şəkildə verilir, o da bu informasiyaları tirajlayır”.
Qeyd edək ki, Lalə Şövkət APA-a müsahibəsində Müsavat başqanı İ.Qəmbəri müxalifətdə xarici ölkələrin xüsusi xidmət orqanlarına işləyən partiyaların olduğunu dilə gətirməsi ilə bu düşərgəyə böyük zərbə vurduğunu, bu partiyanın rəhbərliyini bolşevik təfəkkürlü üslubdan istifadə etməklə Müsavatın tarixinə xəyanət etdiyini bildirib. Buna cavab olaraq isə İ.Qəmbər “Yeni Müsavat” qəzetinə açıqlamasında müxalifətdə xarici ölkələrin agentlərinin olması barədə məlumatları hakimiyyətdəki mənbələrindən aldığını bildirib. O, həmçinin bu açıqlamalarının hədəfə dəydiyini qeyd edib.
“Reaksiyalardan görünür ki, mənim dediklərim hədəfə dəyib”. Bu fikirləri də İsa Qəmbər “Yeni Müsavat” qəzetinə söyləyib.