MÜXALİFƏT BİRLİYİN REALLAŞACAĞINA HƏLƏ DƏ ÜMİD EDİR

	30 iyul 2010


Onlayn ictimai-siyasi qəzet

Siyasət

MÜXALİFƏT BİRLİYİN REALLAŞACAĞINA HƏLƏ DƏ ÜMİD EDİR

Arif Hacılı: “Birliyə kimlərin mane olduğu bəllidir”
Mirmahmud Mirəlioğlu: “Səmimi şəkildə birlik istəyənlərə mane olmaq mümkün deyil”
Sərdar Cəlaloğlu: “Son vaxtlar müşahidə olunan söz atışması birliyin bir daha baş tutmayacağına dəlalət eləmir”

Əsas müxalifət partiyalarının parlament seçkiləri ilə bağlı vahid birlik yaradacağı şübhə altına düşüb. Müsavat başqanı İsa Qəmbərin real müxalifət partiyalarının birliyinin yaradılması təklifinə “Azadlıq” blokundakı ALP-nin və VİP-in qarşı çıxıb. Bu partiyaların AXCP-yə təzyiq edərək Müsavatla yaxınlaşmasına imkan verməməsi birliyin yaranmayacağını deməyə əsas verir. Son günlər Əli Kərimliyə yaxın “Azadlıq” qəzetində İsa Qəmbərin təklifi əleyhinə kəskin yazılar dərc olunması isə belə qənaət yaradır ki, artıq AXCP ilə Müsavatın birliyinin reallaşmasını gözləməyə dəyməz.

Bir sıra ekspertlərdə belə qənaət yaranıb ki, artıq nəinki Müsavatla AXCP-nin birliyinin reallaşması, ümumiyyətlə müxalifətin birliyinin baş tutmasına ümid etməyə dəyməz.
Partiyaların rəhbərliyi bu məsələdə hansı fikirdədirlər? Birliyin reallaşacağına ümidləri qalıbmı?
Müsavat Partiyası Mərkəzi İcra Aparatının rəhbəri Arif Hacılı real müxalifət qüvvələrinin birliyinin baş tutacağı ilə bağlı ümidsiz olmadıqlarını bildirdi: “Biz əvvəlcədən real və səmimi müxalifət qüvvələrinin birliyinin tərəfdarı olmuşuq. İndi də bu mövqeyimizdə qalırıq. Son dövrlər İqbal Ağazadə-Lalə Şövkət duetinin İsa Qəmbərə və Müsavat Partiyasına qarşı məlum mövqeni tutması müxalifətin birliyinə mane qüvvələrin kimliyini ortaya qoyub. Bu cür araqarışdırmalara baxmayaraq, biz bundan sonra da real, səmimi müxalifət qüvvələrinin birliyi istiqamətində səylərimizi davam etdirəcəyik. Biz bu fikirdə deyilik ki, birliyi reallaşdırmaq mümkünsüzdür”.
KXCP sədri Mirmahmud Mirəlioğlu müxalifətin birliyinin baş tutacağına ümidinin ölmədiyini bildirdi: “Biz bu məsələnin reallaşması üçün müzakirələrimizi davam etdiririk. Əslində şəxsən bizimlə danışıqlarda heç kimin birliyin əleyhinə olduğunu müşahidə etməmişik. Birliyin əleyhinə olanlar yalnız öz əleyhlərinə olacaqlar və özlərinə zərbə vurmuş olacaqlar. Birlik mütləq baş tutacaq. Hansı miqyasda olacağını isə zaman göstərəcək. Səmimi şəkildə birlik istəyənlərə mane olmaq mümkün deyil. Hesab edirəm ki, son günlər müşahidə olunan qarşılıqlı ittihamların özü sonda ortaq məxrəcə gəlməklə nəticələnəcək”.
ADP sədri Sərdar Cəlaloğlu müxalifətin birliyinin baş tutmayacağı haqda rəylərlə razılaşmır: “Bəzi partiyalar, siyasətçilər arasında son vaxtlar müşahidə olunan söz atışması birliyin bir daha baş tutmayacağına dəlalət eləmir. Ona görə də mən bu cür konfliktli vəziyyətin birlik məsələsinə nöqtə qoyacağını düşünmürəm. Hamı birlik istəyəndə bu cür qarşılıqlı ittihamlar öz əhəmiyyətini itirəcək”.