“MƏNİ QANA SÜRÜKLƏYİRLƏR” | Siyasət

	09 fevral 2012


Onlayn ictimai-siyasi qəzet

Siyasət

“MƏNİ QANA SÜRÜKLƏYİRLƏR”

2010-02-08

Hafiz Hacıyev: “Birdəfəlik elan etsinlər ki, Azərbaycan xalqı yiyəsizdir”
“Mənə qarşı hücumun arxasında son dövrlər üzərinə gedib ifşa etdiyim yüksək vəzifəli məmur dayanır”

“Ayın 4-də avtomobilimin qarşısını kəsib məni öldürəcəyi ilə hədələyən şəxsin kimliyi bəlli olsa da, müvafiq rəsmi orqanlar heç bir ölçü götürmürlər”. Bu barədə “Yeni Müsavat”a açıqlamasında prezidentliyə keçmiş namizəd Hafiz Hacıyev məlumat verdi. Onun dediyinə görə, Daxili İşlər Nazirliyi polis mayoru Firdovsi Quliyevi cəzalandırmaq əvəzinə barışıq təklifi edir.

“Mən Daxili İşlər Nazirliyinə bəyan etmişəm ki, heç bir barışığımız yoxdur və olmayacaq. Barışsam, kim təminat verir ki, sabah həyatıma daha bir təhlükə yaradılmayacaq. Kim təminat verir ki, bu gün avtomobilimin qarşısını ”Cip"lə kəsən polis bağışlansa, sabah o, avtomobilini üstümdən keçirməyəcək. Mənə qarşı qanunsuzluq edən şəxs qanuni cəzasını almalıdır. Mən geri çəkiləsi deyiləm. Həmin polis mayoru işdən çıxarılanadək mübarizəmi davam etdirəcəyəm. Ya bu cür özbaşınalıqlara yol verənlər cəzalandırılmalıdır, ya da birdəfəlik elan etsinlər ki, bu ölkədə dərəbəylikdir, Azərbaycan xalqı polis rejimində yaşayır, yiyəsizdir. Bundan sonra biz Azərbaycandan köçmək barədə düşünməliyik. Partiya sədrləri olaraq biz xarici demokratik ölkələrə müraciət edib siyasi sığınacaq almalıyıq. Ona görə ki, qarşıdan gələn parlament seçkilərində bizə qarşı çox oyunlar qurulacaq. Qanunların işləmədiyi, cəzasızlıq hökm sürən ölkədə başımıza hər an oyun gətirilə bilər. İki dəfə prezidentliyə namizəd olmuş bir partiya sədrinə küçənin ortasında bu cür açıq-aşkar hörmətsizlik edilirsə, görün adi insanların başına nə müsibətlər açılır".
H.Hacıyev prezident İlham Əliyevin Almaniyadan vətənə dönməsini gözlədiyini dedi: “Prezident qayıdan kimi başıma gələn haqq-hesabla bağlı şəxsən ona məlumat verməyə çalışacağam”.
H.Hacıyev şübhələnib ki, ona qarşı qanunsuzluq edən şəxsin arxasında yüksək vəzifəli məmur dayanır: “Mən bu işin arxasına həm də ona görə düşmüşəm ki, mənə qarşı zorakılığın sifariş olub-olmadığını tam dəqiqləşdirim. İstisna deyil ki, bu qanunsuzluğun sifarişçisi son dövrlər üzərinə gedib ifşa etdiyim hansısa nazir və ya digər yüksək vəzifəli məmurdur”.
H.Hacıyev məmurlara xitabən bildirdi ki, ölümdən qorxmur, xalqı talayan, prezidentə xəyanət etməyə hazır olan məmurlara qarşı mübarizəsini davam etdirəcək: “Bir qrup məmur var ki, ”Yeganə" restoranının VİP salonunda müntəzəm toplaşıb ölkədə sabitliyin pozulması, xalqın prezidentə qarşı çıxması kimi məsələləri müzakirə etdiyi haqda məlumatlarım var. Onlara məlumat çatıb ki, mən bu məsələlərdən xəbərdaram. Ona görə də vəlvələyə düşüblər. Ola bilsin ki, məni qorxutmaq üçün qarşımı kəsdirirlər, məni qana sürükləyirlər".

E.SEYİDAĞA

2681 dəfə baxılıb