YENİ BİRLİK FORMATI ORTAYA ÇIXIB | Siyasət

	12 fevral 2012


Onlayn ictimai-siyasi qəzet

Siyasət

YENİ BİRLİK FORMATI ORTAYA ÇIXIB

2010-03-10

Sərdar Cəlaloğlu: “Müsavat Partiyası özü istəmirsə, biz onu zorla birliyə gətirə bilmərik”

“Biz blok yaratmaq istiqamətində praktiki addımlar atmağa başlamamışıq ki, həmin addımların da nəticəsiz olduğunu bildirək və prosesə son qoyaq. Bir variant alınmırsa, orada ilişib qalan deyilik”. Bu barədə ADP sədri Sərdar Cəlaloğlu müxalifətin birliyi məsələsinə nöqtə qoyulduğu haqda deyilənlərə münasibət bildirərkən söylədi. Başqa variant üzərində işlədiklərini qeyd edən ADP sədri birlik məsələsinin gündəmin bir nömrəli məsələsi olduğunu vurğuladı.

ADP-"Azadlıq" bloku-Ümid Partiyası formatında seçki blokunun yaradılacağı haqda yayılan məlumatların nə dərəcədə doğru olmasına gəlincə, S.Cəlaloğlu bildirdi ki, bu format mümkün variantlardan biridir: “Bu, əslində ən müvəffəqiyyətli variantlardan biridir. Çünki həmin partiyaları diqqətlə təhlil edəndə görünür ki, onların iştirakı ilə Azərbaycanın bütün regional elektoratını özündə cəmləşdirən blok alınar. Bu formatda birlik, yaranacağı halda, müxalifətin əsas güc mərkəzlərindən biri olacaq”.
Müsavatsız birliyin nə dərəcədə güclü olacağı məsələsinə gəlincə, S.Cəlaloğlu qeyd etdi ki, Müsavat özü-özünü kənarda saxlayır: “Müsavat Partiyası özü istəmirsə, biz onu zorla birliyə gətirə bilmərik. Müsavatı kənarda biz yox, özü qoyur. Müsavat potensial birləşəcəyi qüvvələrə qarşı şərt, ittihamlar irəli sürür. Belə bir situasiyada biz istəsək də Müsavatla həmin qüvvələrin birliyinə nail ola bilməyəcəyik. Müsavat özü bu cür xətt seçib. Görünür, bu cür yol getmək onlar üçün daha məqsədəmüvafiqdir”.

Etibar SEYİDAĞA

798 dəfə baxılıb