MÜSAVAT- AXCP BİRLİYİ BAŞ TUTMADI | Siyasət

	12 fevral 2012


Onlayn ictimai-siyasi qəzet

Siyasət

MÜSAVAT- AXCP BİRLİYİ BAŞ TUTMADI

2010-03-10

Arif Hacılı: “AXCP başqa mövqe tutdu”

Müsavat başqanı İsa Qəmbərin Müsavat-AXCP-KXCP birliyinin yaradılması təklifinə AXCP-nin müsbət cavab verməməsi sözügedən formatda birliyin yaranmayacağını deməyə əsas verir. Son vaxtlar AXCP rəhbərliyinə daxil olan şəxslərin Müsavata qarşı fikirlər səsləndirməsi və Əli Kərimliyə yaxın “Azadlıq” qəzetində İsa Qəmbərin əleyhinə kəskin yazılar dərc olunması isə belə qənaət yaradır ki, artıq birliyin reallaşmasını gözləməyə dəyməz.

Artıq Müsavat Partiyası da bu formatda birliyin reallaşma perspektivinə inanmır. Bu, Müsavat Partiyası Mərkəzi İcra Aparatının rəhbəri Arif Hacılının “Yeni Müsavat”a açıqlamalarından da görünür. A.Hacılı bildirdi ki, Müsavat Partiyası ilə AXCP-nin birliyi istiqamətində müzakirələrin getməsi mövzusu şişirdilirdi. Belə bir birliyin yaranması ideyası, sadəcə olaraq, Müsavat Partiyası rəhbərliyinin məramı kimi ortalığa çıxıb: “Biz Rəsulzadə-Elçibəy yoluna bağlı olan siyasi qüvvələrin nüvəsini təşkil etdiyi birliyin yaradılmasını məqsədəuyğun hesab etdiyimizi açıqlamışıq. Eyni zamanda hesab edirik ki, belə bir nüvə Müsavat, AXCP və KXCP-dən ibarət yaradıla bilər. Ancaq açığı belə birliyin yaradılması istiqamətində hansısa konkret fəallıq göstərilməyib. AXCP tərəfindən verilən açıqlamalar onu göstərdi ki, onlar daha çox ”Azadlıq" bloku tərkibində, həmin blokla birgə fəaliyyət göstərməyə üstünlük verirlər. Biz də onların bu mövqeyinə hörmətlə yanaşırıq. “Azadlıq” bloku xeyli müddətdir ki, fəaliyyət göstərən blokudur. Görünür, AXCP rəhbərliyi hesab edir ki, bu blokun bundan sonra da fəaliyyəti daha səmərəlidir. Halbuki bizim irəli sürdüyümüz təklif heç də “Azadlıq” blokunun bundan sonra da özünü qoruyub saxlamasını istisna etmirdi. Yəni AXCP Müsavat Partiyası ilə əməkdaşlıq və müttəfiqlik münasibətləri qura, eyni zamanda “Azadlıq” bloku tərkibində də fəaliyyətini davam etdirə bilərdi. Ancaq bu təşkilat başqa mövqe tutdu".
“AXCP ilə birlik baş tutmadı, KXCP -Müsavat birliyi reallaşa bilərmi” sualına A.Hacılı belə cavab verdi: “Rəsulzadə-Elçibəy yoluna bağlı siyasi qüvvələr dedikdə burada, məsələn, ya Müsavat Partiyası, ya AXCP yoxdursa, bu birliyi tam birlik kimi qəbul etmək çətindir. Bu baxımdan hesab etmirəm ki, Müsavatla KXCP-nin bloku bütövlükdə Rəsulzadə-Elçibəy yoluna bağlı olan siyasi qüvvələrin birliyi kimi qavranıla bilər. Ona görə də Müsavat-KXCP birliyi mövzusu o qədər də aktuallıq kəsb etmir”.