MÜXALİFƏT ABŞ SƏFİRLİYİ QARŞISINDA AKSİYA KEÇİRMƏYƏCƏK

	13 fevral 2012


Onlayn ictimai-siyasi qəzet

Siyasət

MÜXALİFƏT ABŞ SƏFİRLİYİ QARŞISINDA AKSİYA KEÇİRMƏYƏCƏK

2010-03-10

Demokratik düşərgə bəyanatlarla kifayətlənməyə üstünlük verir

“ABŞ Konqresinin Nümayəndələr Palatasının Xarici Əlaqələr Komitəsində qondarma ”erməni soyqırımı" ilə bağlı qərarın qəbulu ilə bağlı Amerikanın Azərbaycan səfirliyi qarşısında etiraz aksiyası keçirmək məsələsi gündəlikdə deyil".

Bu fikirləri Müsavat başqanının müavini Arzu Səmədbəyli bildirdi. Onun sözlərinə görə, partiyanın məsələ ilə bağlı açıqlaması olub və partiya başqanı İsa Qəmbər mətbuatda mövqeyini ifadə edib. Eyni zamanda Müsavat deputat qrupu parlamentdə mövqeyini açıqlayıb: “Biz bu hadisəyə öz fikrimizi dərhal bildirdik. Amma konkret olaraq hansısa siyasi aksiyanın hazırlanması ilə bağlı qərar yoxdur. Hillari Klintonun və Ağ Evin sözçüsünün mövqeyindən belə bəlli olur ki, bu məsələ səsverməyə çıxarılmayacaq. Fikrimizcə, prezident Obama da bu məsələnin Nümayəndələr Palatasının gündəliyinə çıxarılmasında maraqlı olmayacaq”. Bununla belə, A.Səmədbəyli prosesi diqqətdə saxlamağı zəruri sayır: “Türkiyə rəhbərliyi haqlı olaraq kifayət qədər prinsipial və Amerikaya təpkili davranış sərgilədi. Bizim borcumuzdur ki, bu məsələdə Türkiyənin yanında olaq və eyni qərarlar qəbul edək”.
Ümid Partiyasının sədri, millət vəkili İqbal Ağazadə səfirlik qarşısında aksiya keçirməyəcəklərini bildirdi: “Ehtiyac yoxdur. Bu, səfirliyin siyasəti deyil ki... Bundan o tərəfə nəsə etməklə nəyincə dəyişəcəyini güman etmirəm”. İ.Ağazadə prosesdə müsbət dinamika əldə etməkdən ötrü münasibətlərin yaxşılaşdırılması istiqamətində addımlar atmağı zəruri sayır: “Müxalifətin hamısı etiraz etdi, Konqresə etiraz məktubları göndərdi. Digər addımlara ehtiyac görmürəm”.
“Aksiyanın nə əhəmiyyəti var ki? Ciddi şəkildə diplomatik və siyasi təzyiqlər etmək lazımdır”. Bunu isə qəzetimizə açıqlamasında ADP sədri Sərdar Cəlaloğlu bildirdi və rəhbərlik etdiyi təşkilatın ABŞ səfirliyi qarşısında etiraz tədbiri planlaşdırmadığını vurğuladı.
ABŞ-a etirazlar isə davam edir. Vətəndaş Həmrəyliyi Partiyası dünən yaydığı bəyanatında Nümayəndələr Palatasının Xarici Əlaqələr Komitəsində qondarma “erməni soyqırımı”nın qəbul edilməsini kəskin pisləyib: “Bu qərarın tarixi ədaləti bərpaya deyil, siyasi təzyiq vasitəsinə xidmət etdiyini bəyan edirik. 1915-ci ilin aprel ayında Osmanlı imperiyasında baş verən hadisələri yalnız erməni ideoloqlarının təbliğatı ilə ermənilərə qarşı soyqırım aktı kimi qəbul etmək Türk və İslam dünyasına qarşı dünyanın ikili standartlarla yanaşmasından başqa bir şey deyil”.
Qeyd edək ki, Amerika səfirliyi qarşısında ilk aksiyanı srağagün Bütöv Azərbaycan Gənclər Təşkilatının (BAGT) fəalları keçirib. Azərbaycan və Türkiyənin bayraqları, Xocalı faciəsini əks etdirən fotolarla səfirlik önünə yığışan gənclər “Azərbaycan-Türkiyə!”, “Erməni soyqırımına yox deyək!” şüraları səsləndirib. Lakin polis müdaxiləsi nəticəsində onlar səfirliyin qarşısından uzaqlaşdırılıb.

Cavid TURAN

454 dəfə baxılıb