AMİP-dən “AZADLIQ” BLOKUNA SƏRT İTTİHAMLAR

	13 fevral 2012


Onlayn ictimai-siyasi qəzet

Siyasət

AMİP-dən “AZADLIQ” BLOKUNA SƏRT İTTİHAMLAR

2010-03-11

“Onların ipi hakimiyyətdəki müxtəlif qrupların əlindədir”

Azərbaycan Milli İstiqlal Partiyası (AMİP) ölkədə uğurlu, normal seçki blokunun yaranmasını mümkün hesab etmir. Ona görə də parlament seçkilərində təkbaşına iştirakla bağlı qərar verib. Bu barədə AMİP katibi Əli Orucov əməkdaşımızla söhbətində bildirib.

Ə.Orucov qeyd edib ki, seçkidə təkbaşına iştirak qərarı vermələri müxalifət düşərgəsindən kənarda qalmaq kimi başa düşülməməlidir. Nəticəsi olmayan birlik müzakirələrinin mediaya çıxarılmasının tərəfdarı olmadıqlarını söyləyən AMİP katibi hesab edir ki, müzakirələrin nəticəsi xəbər olaraq ictimaiyyətə çatdırılmalıdır: “Bir sıra partiyalar isə əksini edir. Nəticə olmamış müəyyən açıqlamalarla çıxış edirlər. Sonda isə heç bir nəticə olmur, cəmiyyətdə ruh düşkünlüyü daha da dərinləşir və xəyal qırıqlığı yaşanır”.
Ə.Orucov AMİP-in birlik istiqamətində müzakirələrə qatılmamasının, seçkiyə təkbaşına getmək qərarının həm də bəzi müxalifət partiyalarına inamının yoxluğu ilə bağlı olduğunu bildirdi: “Həmin partiyalarla seçkiyə bir yerdə getmək özünü aldatmaq olardı. Çünki həmin partiyalar müttəfiqini yarı yolda qoymaq təcrübəsinə malikdir. İmzalarına hörmət etmirlər. Bu sıraya AXCP-ni və onun daxil olduğu ”Azadlıq" blokunu daxil etmək olar. AMİP “Azadlıq” blokunun olduğu birlikdə təmsil olunmaz. AXCP atdığı imzaya, verdiyi vədə sadiq təşkilat deyil. Bu partiya əslində müxalifətin birliyində də maraqlı deyil. Belə partiyalarla bir yerdə olmaq məsələsinə həssaslıqla yanaşırıq. AMİP hansısa birliyə ölçüb-biçmədən, gözüyumulu qatılmağı zərərli hesab edir".
Ə.Orucov müxalifətin geniş koalisiyasının yaranacağına inanmamalarını həm də partiyalar arasında gərginliyin hökm sürməsi ilə əsaslandırdı: “Birlik istədiyini bəyan edən liderlər arasında münasibətlər soyuqdur. Onlar bir-birinə inanmır. Bir-birinə şübhə ilə yanaşır. Belə bir şəraitdə normal, effektli birliyin yaranması mümkün deyil”.
AMİP yetkilisinin fikrincə, perspektivli koalisiyanın yaranmasını mümkünsüz edən daha bir faktor bir çox partiyaların ipinin öz əllərində olmamasıdır: “Onların ipi hakimiyyətdəki müxtəlif qrupların və ölkə xaricində bəzi dairələrin əlində olduğundan müstəqil qərarlar verə bilmirlər. Yeri gəlmişkən, açığı, mən Liberal Partiya rəhbərliyinin Müsavat başqanı İsa Qəmbərin ad çəkmədən səsləndirdiyi məlum bəyanata o cür kəskin reaksiyalar verməsindən şübhələndim. Bu günə qədər də məndə sual yaranıb ki, niyə məhz Liberal Partiyanın rəhbərliyi İsa Qəmbərin bəyanatını öz üzərinə çəkdi. Axı İsa bəy ad çəkməmişdi. Adamdan soruşarlar ki, sənin adını çəkilməyib, o zaman nədən bu qədər narahatsan. Başqa partiyalar niyə o cür reaksiya vermədi? Liberal Partiyanın rəhbərliyinin İsa Qəmbərin bəyanatına o cür reaksiyası ”qarğa, məndə qoz var" deyimini xatırlatdı".

Etibar SEYİDAĞA

601 dəfə baxılıb