HÜSEYNBALA MİRƏLƏMOV DA ADINI “QARA SİYAHI”ya YAZDIRDI

	13 fevral 2012


Onlayn ictimai-siyasi qəzet

Siyasət

HÜSEYNBALA MİRƏLƏMOV DA ADINI “QARA SİYAHI”ya YAZDIRDI

2010-03-11

YAP-çı deputat qələmi qırılanlar siyahısına düşə bilər

Vaxtaşırı ayrı-ayrı YAP-çı deputatlar hakim düşərgədə birmənalı qarşılanmayan açıqlamalarla çıxış edir. Faktiki olaraq onlar özlərini növbəti parlament seçkiləri ərəfəsində təhlükəli perspektivlə üzbəüz qoyur. Milli Məclisin deputatı, YAP Xətai rayon təşkilatının sədri Hüseynbala Mirələmovun simasında onların sırasına daha biri əlavə olunub.

Belə ki, YAP-çı deputat “Bizim Yol” qəzetinə açıqlamasında ona məxsus Şıx çimərliyindəki “1001 gecə” istirahət mərkəzinin əlindən alınması ilə bağlı xəbərə çox sərt reaksiya verib. Xəbəri nə təsdiq, nə də təkzib edən deputat “Məndən obyektimi zorla ala bilməzlər. Bu istəyə düşənlər qələt edir” deyə sualı cavablandırıb.
Yazıda deputata yaxın mənbələrə istinadən bildirilirdi ki, dəyəri 10 milyon dollar olan istirahət mərkəzini sahibindən cəmi 3 milyona alıblar. İddiaya görə, Mirələmovun obyektinin su qiymətinə alınması təzyiq nəticəsində baş verib. Yüksək vəzifəli şəxslərdən birinin gözü “1001 gecə”yə düşüb. Deputat əvvəlcə obyektini satmamaq üçün dirəniş göstərsə də sonra müxtəlif təzyiqlər onun geri çəkilməyə vadar edib.
Xatırladaq ki, vaxtilə Qaz Emalı Zavodunun rəhbəri olan Mirələmov Rövnəq Abdullayevin Dövlət Neft Şirkətinin prezidenti olmasından sonra işindən kənarlaşdırılıb. Tərəflər arasında uzun çəkən ziddiyyətlər Mirələmovun “vurulması” ilə nəticələnib.
Mirələmovun xəbəri birmənalı təkzib etməməsi təəccüb doğurmaqla yanaşı, onun sərt reaksiyası da anlaşılan deyil. Hər halda, onun Azərbaycan reallığından məlumatlı olmaması mümkün deyil. Zaman-zaman sərt reaksiyaları ilə məşhur olan həmkarlarının, yaxud partiyadaşlarının qələminin tezliklə qırılmasına şahidlik edənlərdən biri də Mirələmov olub. Yaxın tariximizdə Rza İbadov, Hüseyn Abdullayev kimi nümunələr var. Elə ötən ilin sonunda Masallıda iş adamının və oğlunun həbsinə etiraz edərək rayonda keçirilən mitinqdə icra başçısı haqda kəskin ifadələr işlədən, faktiki meydan sulayan digər YAP-çı deputat Əhəd Abıyev çox keçmədi ki, susduruldu. Deputat ona müraciət edən jurnalistlərə “mən vayqanlıyam, nə deyirəmsə, əksini yozurlar” deyib mövzunu qapatmağa və iş adamının müdafiəsindən kənara çəkilməyə üstünlük verdi. Hətta az öncə tənqid hədəfinə çevirdiyi Prezident Administrasiyasının rəhbəri Ramiz Mehdiyevə “ağsaqqalım” deyə müraciət etdi. Buna baxmayaraq, onun qardaşı Nadir Abıyev Masallı Rayon Fövqəladə Hallar Komissiyasının rəhbəri vəzifəsindən çıxarıldı.
Ünvanlı sosial yardımlarla bağlı sensasion açıqlama verərək ayrılan pulun qurtardığını bildirən Milli Məclisin Sosial siyasət komitəsinin sədri, YAP-çı deputat Hadı Rəcəbli də Əmək və Əhalinin Sosial Müdafiə Nazirliyini çətin vəziyyətə salmışdı. Onun bu açıqlaması da təsirsiz qalmadı. Mətbuatın yazdığına görə, H.Rəcəblinin rayonun maliyyə idarəsinin rəisi işləyən qardaşı İqbal Rəcəbli vəzifəsindən kənarlaşdırıb. Keçmiş icra başçısı Süleyman Mikayılovun Lənkəranda H.Rəcəbliyə məxsus olduğu bildirilən sanatoriya tipli istirahət mərkəzinə gözü düşməsi sonda konflikt yaradıb. H.Rəcəbliyə qarşı addımların bununla yekunlaşmayacağı və deputatın növbəti “sürprizlər”lə rastlaşacağı da iddia olunur.
Bu misallardan çıxış etsək deyə bilərik ki, Mirələmovu da yaxşı perspektiv gözləmir. Yeri gəlmişkən, Abıyev və H.Rəcəbli kimi o da cənub bölgəsindəndir və hakimiyyətdə onun ciddi dayağının olduğu şübhəli məsələdir.
Dünən məsələ ilə bağlı H.Mirələmovla əlaqə saxlayıb əlavə suallarımıza da cavab almaq istədik. Ancaq deputatın telefonuna zəng çatmadı.

VÜQAR

1880 dəfə baxılıb