MÜSAVATI TƏKLƏMƏK PLANI İŞƏ SALINIB

	12 fevral 2012


Onlayn ictimai-siyasi qəzet

Siyasət

MÜSAVATI TƏKLƏMƏK PLANI İŞƏ SALINIB

2010-03-12

“Azadlıq” blokunun ADP və Ümidə qucaq açması bu planın tərkib hissəsi imiş

“Azadlıq” blokunun ADP və Ümid Partiyası ilə seçki ittifaqı yaradacağı haqda yazdıqlarımız reallaşır. Artıq adıçəkilən partiyaların təmsilçiləri “Azadlıq” bloku-ADP-Ümid danışıqlarının getdiyi və yaxın günlərdə yeni seçki blokunun elan olunacağını rəsmən açıqlayırlar. Ümid Partiyası Ali Məclisinin sədri Ənvər Ağazadə bildirib ki, hazırda ADP, Ümid Partiyası və “Azadlıq” bloku arasında seçki blokunun yaradılması ilə bağlı müzakirələr başlayıb. Müsavat Partiyasından başqa, vaxtilə Qarabağ və Respublika Uğrunda Hərəkatda təmsil olunan partiyaların birliyinin yaradılması ilə bağlı yaxın günlərdə yekun qərar ola bilər.

Amma sonrakı mərhələdə digər partiyaların da bu bloka qoşulması mümkün olacaq.
“Azadlıq” blokundakı tanınmış siyasətçilərdən biri əməkdaşımızla söhbətində bildirib ki, sözügedən formatda blokun yaradılması ideyası Liberal Partiyanın lideri Lalə Şövkətdən gəlib. Məqsəd Müsavat Partiyasını kənarda saxlayıb təkləndiyi görüntüsünü yaratmaqdır. Adının çəkilməsini istəməyən həmin siyasətçi Ümid Partiyasının Müsavatla münasibətlərinin gərgin olduğunu əsas gətirərək qeyd edib ki, Ümidin Müsavatın təklənməsi ideyasına canbaşla dəstək verməsi başadüşüləndir. ADP-nin bu plana qoşulması isə anlaşılan deyil.
Məsələ ilə bağlı fikirlərini öyrəndiyimiz ADP sədri Sərdar Cəlaloğlu isə “Azadlıq” bloku-ADP-Ümid birliyi reallaşsa belə, bu birliyin Müsavatı təkləmək məqsədilə yaradılmış birlik kimi qəbul edilməsinin yanlış olduğunu bildirdi: “Müsavat özü-özünü kənarda saxlayır. Müsavat Partiyası özü istəmirsə, biz onu zorla birliyə gətirə bilmərik. Müsavatı kənarda biz yox, özü qoyur. Müsavat potensial birləşəcəyi qüvvələrə qarşı şərt, ittihamlar irəli sürür. Belə bir situasiyada biz istəsək də Müsavatla həmin qüvvələrin birliyinə nail ola bilməyəcəyik. Müsavat özü bu cür xətt seçib. Görünür, bu cür yol getmək onlar üçün daha məqsədəmüvafiqdir”.
Müsavat Partiyası isə “Azadlıq” bloku-ADP-Ümid Partiyası birliyi reallaşacağından narahat deyil. Çünki bu partiyanın rəhbərliyi təcrübəyə əsaslanaraq əmindir ki, Müsavat hansı formatda seçkilərdə iştirak edirsə, seçicilərin əksəriyyəti məhz həmin formata səs verirlər. Müsavat seçkiyə təkbaşına qatılsa, seçicilərin əksəriyyətinin Müsavat Partiyasına, hansısa blokda seçkiyə qatılarsa isə həmin bloka səs verəcəyi şübhəsizdir. Buna əmin olduqlarını bildirən Müsavat Partiyası Mərkəzi İcra Aparatının rəhbəri Arif Hacılı qeyd etdi ki, ölkədə çoxlu sayda müxtəlif siyasi partiyalar, müxtəlif bloklar, namizədlər iştirak etsə də Azərbaycan seçicisi həmişə konkret bir qüvvəyə səs verib. 2000-ci ildən bu günədək Müsavat Partiyası hansı seçkidə iştirak edibsə, həmin qüvvə məhz Müsavat olub. Protest elektoratının seçkilərdə Müsavat Partiyasına səs verdiyi faktdır. 2010-cu il parlament seçkilərində protest elektoratı Müsavat Partiyasına səs verəcək. Müsavat seçkiyə təkbaşına qatılsa, seçicilərin əksəriyyətinin Müsavat Partiyasına, hansısa blokda seçkiyə qatılarsa isə həmin bloka səs verəcəyi şübhəsizdir".