SƏRDAR CƏLALOĞLU MÜSAVAT FUNKSİONERLƏRİNİ ƏRƏBƏ BƏNZƏTDİ

	13 fevral 2012


Onlayn ictimai-siyasi qəzet

Siyasət

SƏRDAR CƏLALOĞLU MÜSAVAT FUNKSİONERLƏRİNİ ƏRƏBƏ BƏNZƏTDİ

2010-03-13

Arif Hacılı isə ərəb atalar sözünün əslində ADP sədrinə aid edilməli olduğunu bəyan etdi

ADP sədri Sərdar Cəlaloğlu Müsavat Partiyasına və bu partiyanın funksionerlərinə qarşı açıqlamalarla çıxış edib. “Hürriyyət” qəzetinə müsahibəsində S.Cəlaloğlu Müsavatın bəzi funksionerlərini ərəb psixologiyalı adamlar adlandırıb:

“Ərəblərin bir atalar məsəli var; ərəblər bir şeydə razılaşmırlar ki, heç bir şeydə razılaşmasınlar. Mən Müsavatın bəzi funksionerlərində ərəb psixologiyası görürəm. Onların bir tərəfdən birlik istədiklərini bəyan etmələri digər tərəfdən kimlərinsə bu birlikdə olmasına qarşı çıxmalarının adı birlik adıyla birliyi pozmaqdır. Əgər doğrudan da kimsə birlik istəyirsə, nəyə görə birliklərin əleyhinə addım atırlar? Azərbaycan xalqı heç bir partiyanın mövcudluğunda indeksləşməyib. O cümlədən Azərbaycan müxalifəti də hər hansı bir partiyanın monopoliyasında ola bilməz. Mən düşünürəm ki, hansısa bir qüvvənin özünü başqa qüvvələrdən üstün əlahiddə bir mövqeyə qoymağa haqqı yoxdur. Yalnız zəiflər birləşməkdən qaçırlar. Qorxurlar ki, orada əriyərlər, maraqlarını müdafiə edə bilməzlər”.
Müsavat Partiyası Mərkəzi İcra Aparatının rəhbəri Arif Hacılı isə “Yeni Müsavat”a açıqlamasında bildirdi ki, onlara qarşı Sərdar Cəlaloğlu tərəfindən ittihamların irəli sürülməsi xüsusilə əsassızdır. O baxımdan ki, istər AXCP-nin, istərsə də DUİ-nin birliklə bağlı təkliflərində ADP-nin adı çəkilmir. Müsavat Partiyası isə ADP ilə heç bir şərt irəli sürmədən seçkilərlə bağlı əməkdaşlıq məsələlərini müzakirə etməyə hazırdır: “Bilirsiniz ki, AXCP ”Azadlıq" bloku ilə Müsavat Partiyasının birliyinin yaradılmasını məqsədəuyğun saydığını bəyan edib. DUİ ilkin məsləhətləşmələrdə Müsavat Partiyası, “Azadlıq” bloku və DUİ-nin iştirakı ilə bir formatın müəyyənləşməsini təklif edib. Gördüyünüz kimi ən çox müzakirə olunan aktual təkliflərdə heç bir siyasi qurum ADP-nin bu prosesdə iştirakını nəzərdə tutmur. Konkret Müsavat Partiyasına gəldikdə isə, şəxsən mən Sərdar Cəlaloğluna ADP ilə Müsavatın əməkdaşlığı barədə müzakirələrə hazır olduğumuzu bildirmişəm. Sərdar Cəlaloğlu öz təşəbbüsü ilə bu müzakirələrlə bağlı Müsavat başqanı İsa Qəmbərlə görüşüb. Ancaq ADP ilə Müsavat Partiyasının əməkdaşlığı məsələsinin müzakirəsinin mümkün olmadığını bildirərək deyib ki, əgər müxalifət birliyindən söhbət gedirsə, bu prosesdə bir sıra digər partiyaların, o cümlədən Ümidin və Liberal Demokrat Partiyasının da iştirakı zəruridir. Yəni bu cür konstruktiv olmayan təklifləri irəli sürən bir şəxsin həmin ərəb misalını bizim üzərimizə yönəltməsi əslində tamamilə əsassızdır".
Müsavat rəsmisi vurğuladı ki, əslində indiki siyasi şəraitdə bu misal bilavasitə Sərdar Cəlaloğlunun özünün hərəkətlərinə uyğun çəkilə bilər.

Etibar SEYİDAĞA

899 dəfə baxılıb