MÜXALİFƏT ƏLİ HƏSƏNOVUN DEDİKLƏRİNİ FƏRQLİ QARŞILADI

	13 fevral 2012


Onlayn ictimai-siyasi qəzet

Siyasət

MÜXALİFƏT ƏLİ HƏSƏNOVUN DEDİKLƏRİNİ FƏRQLİ QARŞILADI

2010-03-14

Qabil Hüseynli: “Siyasi opponentlik və dialoq məsələlərində hakimiyyətin görməli olduğu işlər hələ qalır”

İqtidar-müxalifət münasibətlərinin durumu vaxtaşırı müzakirə mövzusu olur. Prezident Administrasiyası ictimai-siyasi şöbəsinin müdiri Əli Həsənovun qəzetimizdəki sonuncu müsahibəsində də bu mövzuya geniş yer ayrılıb. İqtidar rəsmisi deyib ki, Azərbaycan siyasi palitrasının müəyyən özünəməxsus oyun qaydaları olduğu üçün əlamətdar günlərlə bağlı qarşılıqlı şəkildə təbrikləşmə və ya hansısa tədbirlərdə birgə iştirak hallarına rast gəlinmir.

Ə.Həsənov etiraf edib ki, Türkiyə siyasi palitrasında iqtidar-müxalifət münasibətlərindəki davranış qaydaları müəyyən mənada Azərbaycana nümunə ola bilər. O, 1998-ci il prezident seçkilərindən sonra mərhum prezident Heydər Əliyevin bir tədbirdə iki müxalifətçi partiya liderinə yaxınlaşaraq onlarla salamlaşmasını da xatırladıb və Azərbaycanda siyasəti düşmənçilik səviyyəsinə qaldırmaq istəyən insanların olduğunu deyib: “Təəssüf ki, cəmiyyətdəki siyasi barış, siyasətin müəyyən çərçivələrdə hörmətlə, əfəndi səviyyəsində aparılması çoxlarını qane etmir”.
Bununla belə, Ə.Həsənov etiraf edib ki, cəmiyyətin birliyi, o cümlədən siyasi birlik həm daxildə, həm də xaricdə bəzi qüvvələri, xüsusən anti-Azərbaycan qüvvələri qane etmir. O, Azərbaycana təzyiqlərin olduğunu da etiraf edib.
Maraqlıdır, iqtidar təmsilçisinin dedikləri müxalifətdə necə qarşılanıb?
Müsavat Partiyası başqanının müavini Qabil Hüseynli iqtidar rəsmisinin dediklərinə münasibət bildirərkən öncə Ə.Həsənovu yubileyi münasibətilə təbrik etdi: “Siyasi opponent olsaq da Əli Həsənov cənablarını 50 yaşının tamam olması münasibətilə təbrik edir və ona işində uğurlar arzulayıram”.
Müsavat funksionerinin fikrincə, siyasi opponentlik məsələlərində, xüsusilə iqtidar-müxalifət münasibətlərində Azərbaycanda yerinə yetirilməsi zəruri olan məsələlər hələ də qalır: “Bunların arasında xüsusilə müxalifətin fəaliyyət imkanlarının, onun qanunla təsbit edilən hüquqlarının həyata keçirilməsinə real imkanlar yaradılması məsələsi də var. Problem xüsusilə də müxalifətin kütləvi tədbirlər keçirməsi və lazımi iş şəraiti ilə təmin edilməsi ilə bağlıdır. Söhbət müxalifətin qərargahla təmin edilməsindən və ona normal iş şəraitinin yaradılmasından gedir. Bu məsələlərdə Əli müəllim müəyyən səmimiyyət nümayiş etdirsə də sonadək bütün problemləri nədənsə açmaq istəmir. Xüsusilə müxalifət-iqtidar dialoqunun zəruriliyi məsələsində öz arqumentlərini irəli sürür. Halbuki təkcə Qarabağ məsələsində yox, bir sıra ölkədaxili məsələlərlə bağlı da iqtidar-müxalifət dialoquna ehtiyac var”.
Q.Hüseynli Türkiyə nümunəsi ilə bağlı səslənən fikirlərə də münasibətini açıqladı: “Türkiyədə iqtidar müxalifətlə dialoq qurmaq üçün əldən gedir. Amma bir çox məsələlərdə müxalifət iqtidarla dialoqa getmək istəmir. Ona görə də əgər biz ölkədə həqiqi siyasi, milli həmrəyliyə nail olmaq istəyiriksə, o zaman siyasi dialoq mexanizmi işlənib hazırlanmalıdır. Bu mexanizm müxalifətə və iqtidara ölkənin həyati əhəmiyyətli məsələləri barədə öz fikirlərini deməsinə, bunu əsaslandırmasına, eləcə də problemlərdən çıxış yollarına dair konseptual baxışları şərh etməsinə şərait yaradardı”.
Q.Hüseynli Ə.Həsənovun Azərbaycana təzyiqlərin edilməsi ilə bağlı fikirlərini bölüşdüyünü vurğuladı: “Doğrudan da Azərbaycana təzyiqlər var. Amma bu təzyiqlərin bir qismi açıq təcavüzkar, düşmənçilik niyyətlərindən doğur. Bir qisminin olmaması üçünsə iqtidar səy göstərməlidir. Yəni Azərbaycan xarici siyasəti çalışmalıdır ki, o, xarici təzyiqləri minimuma endirsin və onların olmasına şərait yaratmasın. Qondarma ”erməni soyqırımı"na münasibətdə Qərb dövlətləri sırf xristian təəssübkeşliyindən irəli gələn yanaşma sərgiləyir. Amma elə məsələlər də var ki, o təzyiqlərin yaranmasında bəzən özümüz də günahkar oluruq. Buna da imkan verməməliyik. Elə hərəkət etməliyik ki, həmin təzyiqlərin yaramasına şərait olmasın".

E.PAŞASOY

625 dəfə baxılıb