MÜXALİFƏTİN BİRLİYİ REALLAŞMAQ ƏRƏFƏSİNDƏ

	13 fevral 2012


Onlayn ictimai-siyasi qəzet

Siyasət

MÜXALİFƏTİN BİRLİYİ REALLAŞMAQ ƏRƏFƏSİNDƏ

2010-03-16

Sabah Müsavatla DUİ rəhbərliyinin müzakirəsi başlayır

partiyalar parlament seçkilərində birliklə bağlı önəmli qərarlar vermək ərəfəsindədir. Ötən həftənin sonunda müxalifətin 4 önəmli liderinin öz aralarında üç dəfə mediadan gizli görüş keçirməsi, görüşlərdə irəli sürülən təkliflər və ilkin razılaşmalar bunu deməyə əsas verir. Görüşlərdən birində əldə olunan razılaşmaya görə, artıq sabah saat 11-də Müsavat Partiyası ilə Demokratiya Uğrunda Hərəkatın rəhbərlərinin müzakirələri keçiriləcək.

Görüş KXCP qərargahında olacaq. Əldə etdiyimiz məlumatda deyilir ki, sabahkı görüşdə Müsavatla DUİ-nin, xüsusilə də KXCP-nin seçkilərdə əməkdaşlığı haqqında qərar verilməsi gözlənilir. Növbəti mərhələdə isə AXCP-nin bu əməkdaşlığa cəlb edilməsi planlaşdırılsa da, sözügedən partiyanın sədri Əli Kətimlinin KXCP sədri ilə görüşdə irəli sürdüyü təklifdən görünür ki, bu planın həyata keçməsi o qədər də real görünmür.
Əli Kərimli Mirmahmud Mirəlioğlu ilə görüşdə DUİ-nin “Azadlıq” bloku ilə birliyini təklif edib. Müsavatın isə bir müddət keçdikdən sonra bu birliyə qoşulmasını mümkün saydığını bildirib. AXCP sədri indiki psixoloji durumun Müsavatla “Azadlıq” blokunun bir yerdə olmasına imkan vermədiyini söyləyib. Dünən əldə etdiyimiz məlumatda isə bildirilir ki, AXCP sədrinin KXCP sədrinə təklif etdiyi birlik modelində Ümid Partiyası ilə ADP-nin də adı yoxdur.
ADP sədri Sərdar Cəlaloğlu isə təklif olunan birlik modelində ADP-nin adının olmamasını qeyri-adi qarşılamır: “ADP məgər nədir ki? Yeni birlik modelində ADP-nin olması təklif edilmirsə, burada qəribə nə isə axtarmaq lazım deyil. Müxalifətin birliyinə nail olmaq üçün o cür variant mümkündürsə, ADP orada yoxdursa belə, o variantı alqışlamaq lazımdır. Bu gün biz ideal variantların arxasınca gedərkən bir şeyi unutmamalıyıq ki, real variantlara daha çox önəm verilməlidir”
Müsavat Partiyası Mərkəzi İcra Aparatının rəhbəri Arif Hacılı Rəsulzadə-Elçibəy siyasi xəttinə bağlı olan qüvvələrin bir arada olması təklifinin reallaşması istiqamətində səylərin davam etməkdə olduğunu bildirdi: “Bununla yanaşı, Müsavat hər bir dairədən güclü namizədin müdafiə edilməsi iddiasını irəli sürüb ki, bu da siyasi partiya nümayəndələrinin, ziyalıların, ictimai xadimlərin və digər şəxslərin seçki kampaniyası dövründə müdafiə olunması üçün imkan yaradır. İstənilən halda, Müsavat Partiyası müəyyən koalisiyada seçkidə iştirak edəcək. Müsavatın təklənməsi məsələsinə gəlincə, mənə elə gəlir ki, bu, absurd iddiadır. Əgər Müsavat digər partiyalarla bir yerdə olmayacaqsa, Azərbaycan xalqı ilə birlikdə tək qalacaq. Yaxın dövrlərdə keçirilən seçkilərin tarixinə diqqət yetirsəniz, görərsiniz ki, istər təklikdə, istər blokda, istər prezident seçkilərində namizədlə iştirak etsin, bütün seçkilərdə protest elektoratı ya təklikdə Müsavata, ya da onun iştirak etdiyi bloka səs verib. Ona görə də bu məsələlərlə bağlı Müsavatın xüsusi narahatlığı yoxdur”.
A.Hacılı bir çox AXCP funksionerinin açıqlamasını izlədiyini qeyd etdi və müəyyən nəticəyə gəldiyini dedi: “Gəldiyim nəticə ondan ibarətdir ki, Xalq Cəbhəsi elitasına daxil olan şəxslərin əksəriyyəti seçkilərdə Müsavatla bir yerdə olmaq istəyindədir. Bu cür istəklər təşkilatın bundan sonrakı dövrdə qəbul edəcəyi qərarlara təsir edə bilər. Biz hesab edirik ki, Azərbaycanda müxalifətin birliyi dedikdə ilk növbədə Müsavat, AXCP, KXCP kimi təşkilatların birliyi nəzərdə tutulur. İstər Azərbaycan, istər beynəlxalq ictimaiyyət, öncə bu cür birliyi onlar müxalifətin birliyi kimi dəyərləndirir. Əgər biz müxalifətin birliyi çağırışlarını edir, ancaq AXCP ilə əməkdaşlığa hazır olmadığımızı bəyan ediriksə, bu çağırışları səmimi hesab etmək olmaz. Eyni zamanda əgər AXCP liderləri müxalifətin birliyi arzusunda olduqlarını bildirirlərsə, ancaq Müsavatdan kənar hansısa birlik yaratmaq cəhdlərində bulunurlarsa, təbii ki, bu halda onların müxalifətin birliyinin yaradılması istiqamətindəki çağırışlarının səmimi olmadığı aşkara çıxacaq”.
Ümid Partiyasının sədri İqbal Ağazadə bildirdi ki, əgər sözügedən görüşdə “Azadlıq” bloku-DUİ birliyi modeli müzakirə olunubsa, buna normal yanaşır: “Allah xeyir versin. Təki Azərbaycan cəmiyyəti üçün xeyirli və uğurlu birlik olsun”.

Etibar SEYİDAĞA

470 dəfə baxılıb